ပေဲါပၞာန်ရုယှာကဵုယူခရိန်ဂှ် နူကဵုတံဝါဒိတေံ ဒှ်ပေဲါပၞာန် ပၠံၚ်တိဍာ်ရောၚ် ဗွဲယေဘုယျ ဟီုဂွံရ၊ ဆဂး လက်ကရဴဏံ ဟိုတ်နူပရေၚ်ရီုဗၚ်ထံက်ပၚ်နကဵုလွဟ်လက်နက်ဂတာပ်ခေတ်၊ကွတ်ပညာပၞာန် နူကဵုဂကောံနာတဝ်ကီု သီုကဵုဂကောံဍုၚ်ယူရောပ်ကေုာံ မဟာမိတ်ယူခရိန်တံကီုတုဲ ဍေံပြံၚ်လှာဲ ဒှ်အာပေဲါပၞာန် ပြိုၚ်ပ္ကာန်ဝါဒကွေတ်ဒဳမဝ်ကရေဇြဳကဵု ကွေတ်ကောန်မျူနေတ်၊သဵုရှေဝ်လေတ်၊တၠအဝဵုတံရ၊ ဟီုမွဲနဲပၠန်ဂှ် ဒှ်အာပေဲါပၞာန်ပြိုၚ်ပ္ကာန်ဇြဟတ် အကြာဍုၚ်မဟာအဝဵုဂၠးကဝ်တံရ၊
အခိၚ်လၟုဟ်မ္ဂး ရုပ်ရဴဍေံ သာတုဲ မံက်တိတ်ကၠုၚ် ဗွဲမကၠးဖ္ဍးရ၊ ရုယှာ၊ကြုက်၊ကဝ်ရဳယျာသၟဝ်ကျာ၊အဳရာန်ကေုာံဍုၚ်ကောန်မျူနေတ်လ္ၚဵုကေုာံဍုၚ်ဆက်ဆောံမံၚ်ကဵုရုယှာနကဵုပရေၚ်ပၞာန်၊ ပိုန်ဂြပ် ညံၚ်ရဴ ဗေလ်လာရု၊ ဍုၚ်ဗၟာ၊ သဳရဳယျာ၊ မာလဳ တံဂှ် ဒှ်ဍုၚ်ထံက်ဂလာန်၊ ဒှ်ဍုၚ်စဵုဒၞာမံၚ်ပြဝရုယှာတံရ၊ မုဟိုတ်ရော ဟီုမဂး အခိၚ်စုတ်မာဲ ပ္ဍဲကုလသမဂ္ဂ ဒိတ္ထဳ ( ဖေဖဝ်ဝါရဳ ၂၃၊၂၀၂၃ ) ဖ္တိုက်ဖအောဝ် ရုယှာ ညံၚ်ဂွံရုပ်ပၞာန် တိတ်နူဍုၚ်ယူခရိန်ဂှ် ဍုၚ်ထံက်ဂလာန် (၁၄၁)ဍုၚ်၊ ဍုၚ်ဒစဵုဒစး (၇) ဍုၚ်၊ ဍုၚ်ဟွံစုတ်မာဲ (၃၂) ဍုၚ် နွံကၠုၚ်ရ၊ ပ္ဍဲဂှ် နကဵုဍုၚ်ဗၟာဂှ် စုတ်မာဲ ထံက်ဂလာန်ဂးကီုလေဝ် မၞိဟ်စၞးနူအလဵုအသဳပၞာန်ဟွံသေၚ်တုဲ နူကဵုအလဵုအသဳပၞာန်ဗၟာတံဂှ် ညးတံဟီုလဝ်မ္ဂး ရုယှာတံ စဵုဒၞာမံၚ်စၟိန်ပြမာန်ဍုၚ်ညးတံရောၚ် ဂးလဝ်တုဲ အလဵုအသဳဗၟာ ဂွံလဝ်အဝဵုလၟုဟ်ဏံဂှ် ဒှ်ဍုၚ်ထံက်ဂလာန်ကဵုရုယှာရောၚ်ဂှ် ညးတံပၠောပ်လဝ်စရၚ်ရ၊ ညးတံ ချူစၟတ်သမ္တီလဝ် ပ္ဍဲလိက်ပရိုၚ် Kyiv Post အတိုၚ်သၟဝ်ဝွံရ ( https://www.kyivpost.com/post/13208 ( Myanmar
Elsewhere in the world, Myanmar’s military junta, which overthrew a democratically elected government two years ago, supports Russia, which it has said was “acting to protect its sovereignty,” and praised Russia’s role in “balancing global power.” )
အကြာဂှ် ဍုၚ်မဒုၚ်ယၟု မံၚ်လဒေါဝ်တုဲ ပ္တိတ်မံၚ်ပရဲ စပ်ကဵုပရေၚ်ပိုန်ဂြပ်ဂှ် ဒှ်ဍုၚ်ဂလာအိန္ဒိယျ၊ ဍုၚ်ကြုက်တံရ၊ ဍုၚ်ဂလာအိန္ဒိယျဂှ် ဒှ်ဍုၚ်ရာန်မံၚ်လွဟ်လက်နက်နူရုယှာ အခိၚ်ကၠာပေဲါပၞာန်ယူခရိန်ရ၊ အခိၚ်ပေဲါပၞာန်ဒှ်မံၚ်ဏံဂှ် ဍုၚ်ပလိုတ်ကဵုအမေရိကာန်တံ ကၟာတ်လဒဵုကၠေၚ်ရုယှာတုဲ ဂလာန်အိန္ဒိယျတံ ရာန်ကၠေၚ်နူရုယှာဂၠိုၚ်အိုတ်မွဲရ၊ ဍုၚ်ကြုက်လေဝ် ရာန်ဂလိုၚ်ပ္တိုန်ကၠေၚ်ရုယှာကီုရ၊ ဣဏံဂှ် ဒှ်ကဵုဇြဟတ်ကုရုယှာမွဲနဲမွဲဗီုကီုရ၊ လက်ကရဴဏံပၠန် ကပေါတ်လွဟ်စကာဍာန်အကာသ နူရုယှာ သွံကဵုလဝ်အိန္ဒိယျကီု၊ ဍုၚ်ဗၟာတံကီုဂှ် ရုယှာတံ ကလေၚ်အာတ်မိက်ကေတ်တုဲ ဒးကလေၚ်ကဵုဏာရောၚ် ပရိုၚ်လ္ၚဵုတံ ချူလဝ်နွံရ၊
ပေဲါပၞာန်ရုယှာကဵုယူခရိန်ဂှ် လၟုဟ်မ္ဂး ဍေံဂံါလုပ် ( ၁၉ ) ဂိတုရ၊ ရုယှာကီု ယူခရိန်ကီု သီုၜါလ္ပာ် ကြပ်အိုတ်ဍာ်ကွေံကွေံရ၊ နကဵုရုယှာဂှ် အဓိက ဒးကေတ်မံၚ်အရီုအဗၚ်လွဟ်လက်နက်နူဍုၚ်ကဝ်ရဳယျာသၟဝ်ကျာကဵုအဳရာန်တံ နွံမံၚ်ရောၚ် ဂှ် အမေရိကာန် ဟီုဂးလဝ်ရ၊ နူကဵုဂိတု ဂျူလာၚ်ဂှ် ဝန်စဵုဒၞာ ရုယှာ ယှိုဲဂူ အာစိုပ်လဝ် ဍုၚ်ကဝ်ရဳယျာသၟဝ်ကျာတုဲ တက်ကျာသဳကၠဳလဝ် ပရေၚ်သွံရာန်လွဟ်ကဵုရုယှာနွံရောၚ်ဂးရ၊ ယဝ်ခါရ ကဝ်ရဳယျာသၟဝ်ကျာ သွံလွဟ်ကဵုရုယှာမ္ဂး ဍုၚ်ကဝ်ရဳယျာသၟဝ်ကျာ ဒးဒုၚ်စသိုၚ်ဖဵုအဆက်ဍေံဏောၚ်ဂှ် နူကဵုညးကဵုကသပ်ဂီုကၠီုကောန်ဂကူ သ္ၚိသမ္မတ Jake Sullivan ဟီုလဝ်နူကနေံတေံရ၊ အကြာဏံ ပ္ဍဲဂိတုဏံလေဝ် ဍိုပ်သ္ကိုပ် ကဝ်ရဳယျာသၟဝ်ကျာ ကေမ်ကျုၚ် အာန် သွက်ဂွံအာရုယှာနွံမံၚ်ရောၚ်ဂှ် ပရိုၚ်တိတ်မံၚ်ရ၊ ညးဒှ်အာမ္ဂး သွက်ဂွံတက်ကျာ ပရေၚ်သွံရာန်လွဟ် ဒှ်မာန်ရောၚ်ဂးလဝ်ရ၊
ပေဲါပၞာန်ရုယှာကဵုယူခရိန်ဏံဂှ် ယဝ်ခါရ ရုယှာကျမ္ဂး ဍုၚ်ရုယှာမွဲဓဝ် ကျဟွံသေၚ်၊ ဗွဲတၟေၚ် ဍုၚ်မဟာမိတ်ရုယှာတံကီု၊ ဍုၚ်ရပ်လဝ်ကွေတ်ဝါဒကောန်မျူနေတ်တံကီု၊ ဍုၚ်မဆက်ဆောံမံၚ်ကဵုရုယှာနကဵုပရေၚ်ပၞာန် မပ္တံရာန်လွဟ်လက်နက်ကီု၊ နဲကဲပညာစပ်ကဵုကၠောန်ပ္တိတ်ကပေါတ်ပၞာန်ကီု တံဂှ်လေဝ် ဒးကျအာဖအိုတ်ရ၊ ပ္ဍဲဂှ်မ္ဂး ဍုၚ်ဗၟာလေဝ် ပါမွဲဍုၚ်ကီုရ၊
ယဝ်ခါရ ယူခရိန်ကျမ္ဂး ဍုၚ်ရပ်လဝ်ကွေတ်ဝါဒဒဳမဝ်ကရေဇြဳတံကီု၊ ဍုၚ်မဟာမိတ်ဂကောံဍုၚ်ယူရောပ်ကေုာံအမေရိကာန်ကီု၊ ဍုၚ်မပဓာန်စမံၚ် အမေရိကာန်ကဵုနာတဝ်တံကီု အသိၚ်ဍိုန်လျစှ်ေမာန်တုဲ ကြုက်၊ ရုယှာ ကေုာံ ကောန်ရဲတဝ်သွာညးတံ ကေတ်အာဒၞာဲ ပရေၚ်ပိုန်ဂြပ်၊ ပရေၚ်ကွတ်ပညာ၊ ပရေၚ်ပၞာန် လ္တူဂၠးကဝ်ဏံမာန်ရ၊ အလဵုအသဳပၞာန်ဗၟာတံလေဝ် ဒှ်ကၠုၚ်ဇြဟတ်စိုတ် (မာနပၞာန်တဴတိုန် ညံၚ်ရဴဇၞောဝ်အလာံ) တုဲ သၠိုၚ်ပ္တိုန်အသိၚ်ပေဲါဗ္တိုက် ဂြးရဲဂကောံပၠန်ဂတးတံ ဒှ်မာန်ရ၊
ယဝ်ခါရ ရုယှာကျမ္ဂး သွက်ဍုၚ်မန်ဗၟာပိုဲဂှ် နကဵုအလဵုအသဳပၞာန် မအလ ဍေံတံ ပဓာန်မံၚ်ကဵုရုယှာ နကဵုက္ၜၚ်ကျာပၞာန်၊လွဟ်လက်နက်ကီု၊ ပညာစပ်ကဵုကၠောန်ပ္တိတ်ကပေါတ်လွဟ်လက်နက်ကီု နွံမံၚ်ၜိုတ်ထေက်ကြိုက်တုဲ ဇြဟတ်ဍိုန်လျစှ်ေမာန်ရ၊ မွဲသာ်ပၠန်ဂှ် ရုယှာစှ်ေမ္ဂး သွက်ဂွံကဵုစဵုဒၞာ အလဵုအသဳပၞာန်ဗၟာ ပ္ဍဲမုက်ပၞာန်ကလုတ်တမာန်ဂှ်လေဝ် ဍေံယအ်စှ်ေအာမာန်ရ၊ မွဲလ္ပာ်ပၠန်ဂှ် ပရေၚ်ကၟာတ်လဒဵုပိုန်ဂြပ်၊ လှာဲဂတးဩန်ဒဝ်ဠာ၊ သွံရာန်လွဟ်လက်နက်၊ ပလံၚ်ကၠေၚ်က္ၜၚ်ကျာကဵု အလဵုအသဳပၞာန်မအလတံဂှ်လေဝ် နူကဵုဂကောံဍုၚ်ပလိုတ်၊ အမေရိကာန်တံ အာဍိုပ်တုဲ ကၠောန်သ္ပမံၚ်ဂှ် အသိၚ်ဍေံခိုဟ်ကၠုၚ်၊ လမျီုဍေံလုပ်ကၠုၚ်ဒှ်မာန်ရ၊ အဓိကဇၞော်အိုတ်ဂှ် အလဵုအသဳပၞာန်မအလတံ စိုတ်ဓါတ်စှ်ေ ညံၚ်ရဴတိုၚ်ပၞာၚ်ဒးလျးပၟတ် ဍေံပွံက်စှ်ေအောန်ကဵုဂၠိုၚ် ဒှ်ကၠုၚ်မာန်တုဲ အခိၚ်ဂှ်မ္ဂး လ္ပာ်ရဲပၠန်ဂတးတံ စိုတ်ဓါတ်ဗ္တိုက်ပၞာန်လှုၚ်တိုန်ကၠုၚ်မာန်ရ၊ ပၞာန်ဟီုဂှ် စိုတ်ဓါတ်စှ်ေအာဗက်ဏံဂှ် ကျလဝ်တုဲတုဲမံၚ်ရ၊ သွက်ဂွံဒးပသတိမွဲသာ်ဂှ် အခိၚ်ရုယှာကျဂှ် ယဝ်ရ ဂလာအိန္ဒိယျကဵုကြုက်တံ လုပ်ထံက်ပ္တိုန်ပၠန်မ္ဂး အလဵုအသဳမအလတံ အယုက်ဂၠိၚ် သၞိၚ်သ္ၚောဲတုဲ ပေဲါအံၚ်ဇၞးရဲပၠန်ဂတးတံဂှ် ဒှ်အခက်အခုဲ စဵုကဵုစိုပ်အာက္ဆံၚ်ဂြုဲဂြးစှ်ေလေဝ် ဒှ်မာန်ရောၚ်၊
ပေဲါပၞာန်ဟီုဂှ် အခိၚ်လဵုစဗ္တိုက်၊ အခိၚ်လဵုစဗဒှ် ညးမဗ္တိုက်တံ တီကေတ်မာန်ကီုလေဝ် အခိၚ်လဵုဒေံါ၊ အခိၚ်လဵုတုဲဂှ် ဟီုဗွဲချိုတ်ပၠိုတ်ဟွံဒးရ၊ ပေဲါပၞာန်ရုယှာကဵုယူခရိန်ဏံဂှ် ညးဂှ် ဇၞး၊ ညးဂှ်ကျ၊ မွဲဟွံကျ မွဲဟွံဇၞး တုပ်သရေဟာဂှ်လေဝ် ကုတ်ယတိတုဲ ဟီုလဴဟွံဒးဏီရ၊ အနာဂတ်ဂှ် ပဲါနူကျာ်အရှန်တံတုဲ ပိုဲပုထုဇန်ဓမ္မတာတံ ဂြၚ်တီကေတ်ဟွံမာန်ရ၊ သွက်ပိုဲဂွံတီဂှ် အခိၚ်မွဲဟေၚ် ဟီုလဴကဵုမာန်ရ၊ ဆက်တုဲ မၚ်ဗဵုအာပၠန်ရောၚ်။
ဗညာထဝ်ဝၚ် ချူပ္တိန်ထ္ၜးလဝ်ရောၚ်
