ဗော်ဍုင်မန်တၟိ ဇိုန်ဏှင်တဆိပ်ကြာမင်မွဲဓဝ်သစ္စသ္ဂံင်ပၠန်ဂတး ကု မိသာန်ယဳ (ကော်) မိယဳ
----------------------
ပရိုင်ဍုင်မန်တၟိ၊
ပ္ဍဲကဵုတ္ၚဲပၠန်ဂတးမန် (၇၆)ဝါ တုဲကၠုင်ဏအ် ပ္ဍဲအသေအဟာန်ဇိုန်ဏှင်လာပ်ဇဲပၠန်ဂတး မကၠောန်ဗဒှ် ပ္ဍဲဗဒိုပ်လုပ်ဍုင် ဌာန်ဂအုပ်ဗဟဵုဗော်ဍုင်မန်တၟိဂှ် နကဵုဗော်ဍုင်မန်တၟိ ဇိုန်ဏှင်ဏာ တဆိပ်ကြာမင်မွဲ ဓဝ်သစ္စသ္ဂံင်ပၠန်ဂတး မွဲတၠ ကု မိသာန်ယဳ (ကော်) မိယဳရ။
မိသာန်ယဳ (ကော်) မိယဳဝွံ ဒှ်သမ္ဘာ သ္ဂံင်နာဲတေဲ ညးမဒှ်သ္ဂံင်ဒုက္ခိတ မဒးလဝ်ဝပ်နူပေဲါဗတိုက်ဍုင်ရေဝ် နူသၞာံ ၁၉၉၀ ရ။ နာဲတေဲဝွံ ဒှ်သ္ဂံင် ညးမယိုက်ဂၠေင်ကၠုင်လဝ်တာလျိုင် နူသၞာံ ၁၉၈၃ တေံ မွဲတၠတုဲ ပ္ဍဲပေဲါဗတိုက် ဗော်ဍုင်မန်တၟိ လုပ်ဗ္တိုက်ဍုင်ရေဝ် သၞာံ ၁၉၉၀ ဂှ် ဒးအာလဝ်ဘဲဒဏ်လွဟ် ဇၞော်ကဵုဇြဟတ်ရ။ နအသိင်ဘဲဒဏ်ဂှ်ဟေင် နာဲတေဲ ဝွံ ပဲါနူသ္ကုတ်က္ဍိုပ်မွဲတုဲ အလုံခန္ဓကာယမွဲ ချဳဒရာင်ဟွံဂွံဒှ်ကၠုင် စဵုတ္ၚဲဏအ်ရ။
နာဲတေဲဝွံ နူကၠာ ဟွံဂွံဒးဘဲဒဏ်လွဟ်ဏီ ပ္ဍဲသၞာံ၁၉၈၉ ဂှ် သ္ပဒတဴအိန်ထံင်ကု မိယဳရ။ နာဲတေဲ ကေုာံ မိယဳ ညးၜါတၠ ပ္တန်အိန်ထံင်တုဲ ဂွံမွဲသၞာံဂှ် နာဲတေဲ ဒှ်အာ နဘဝသ္ဂံၚ်ဒုက္ခိတ ကတဵုချဳဒရာင်အာကၠုင်ဟွံဂွံ ဒှ်ကၠုင်တုဲ ပ္ဍဲပွိုၚ်ကာလ (၃၃)သၞာံ ဏအ် နကဵု သမ္ဘာမိယဳ ဂှ်ဟေင် နဇဲနွံနွံ၊ သစ္စနွံနွံ လွဳပရာမင်မွဲကၠုင် နာဲတေဲ စဵုတွဵုတ္ၚဲဏအ်ရောင်။
ညးမကလိဂွံတဆိပ်ကြာ “ မင်မွဲဓဝ်သစ္စသ္ဂံင်ပၠန်ဂတး” မိယဳဝွံ၊ ဒှ်ဇာတိကွာန် ကွာန်ဘာ၊ ပွိုၚ်ဍုင်ရေဝ်သၟဝ်ကျာတုဲ မဒှ်ကောန် နာဲလုင် မိမေတ်ရ။ ပ္ဍဲမိယဳ မကလိဂွံအာယုက် (၅၃)သၞာံ လၟုဟ်ဝွံဂှ် ဂွံဒုင်ကေတ်ဏာလဝ် တဆိပ်ကြာဝွံရ။
နကဵုဗော်ဍုင်မန်တၟိဝွံ ပ္ဍဲစၟတ်သမ္တီတ္ၚဲပၠန်ဂတးမန် မရနုက်ကဵု(၇၅)ဝါသၞာံတုဲကၠုင်တေံ ကု နာဲဍာံရောင် (ကော်) နာဲၜၚ်က္ဍဳ ညးမဒှ် မန်ဍုင်သေံဂှ် နကဵု လာပ်တဆိပ်ကြာ “ညးမဆာန်ဂကူ” ဂှ်လေဝ် ဇိုန်ဏှင်ကဵုကၠုင်လဝ်နွံရောင် ဂွံတီကေတ်ရ။
No comments:
Post a Comment