ပ္ဍဲကဵုအကာဲအရာပရေင်ဍုင်ကွာန်၊ ပရေင်ပၞာန်က္တဵုဒှ်မံင်တ္ရဲဏအ်ဝွံ နကဵုကောန်ဂကူမန်တအ် ဇြဟတ်ဂွံဇၞော်ဂှ် မန်တအ်ဖ္အိုတ် ဒးညဳသာမှဂွံရောင် ဒပ်ပၞာန်ဗၠးၜးဍုင်မည် MLA ဟီုရ။
ဒပ်ပၞာန်ဗၠးၜးဍုင်မည် MLA ဝွံ စွံတင်ပ္တဝ်က္ဍိုပ်ကဵု သ္ဂောံဖ္အိုတ်ကၠေံ ဝါဒမဟာဂကူကီု၊ သ္ဂောံဗ္တိုက်သရိုဟ်ကၠေံ သၞောတ်တၠအဝဵုအိုဿီုကီု ကၟိန်ဍုင်ဖေဝ်ဒရေဝ်ဒဳမဝ်ကရေဇြဳ ဂွံမံက်ဂတဝ် ကေုာံ သ္ဂောံကဵုဂီုကၠီုအလုံညးဍုင်ကွာန်မန်တအ်မာန်တုဲ စပံက်ပ္တန်ကၠုင်လဝ်ဒပ် နူကဵုသၞာံ ၂၀၂၂၊ ဂိတုသေပ်တေမ်ဗါတေံရောင် ဂးရ။
“ၜိုတ်ပၞာန်မန်လုပ်ကၠုင်ဂှ် ပိုယ်ဂၠာဲကဵုလွဟ်မာန်မံင်၊ ဟိုတ်ဂှ်ရ (သၟတ်တံ) လုပ်ပၞာန်အိုတ်ညိ။ ဇြဟတ်မိက်ဂွံဇၞော်ဗီုဂကူညးတၞဟ်တှ်ေ ဒးလုပ်ပၞာန်ဟေင်၊ လ္ပမိပ်ကဵုသဘင်တုဲ စွံအာရီုကဵုပရေင်ဂကူညိ” သာ်ဝွံ နူကဵုဌာနမဟာမိတ်ဆက်ဆောံ ဒပ် MLA ဗညာမာံကာန်စဳ ဟီုရ။
ညးမဒှ်သ္ဂံင် နူဒပ်ပၞာန်ဗၠးၜးဍုင်မည် MLA တအ်ဂှ် သ္ဂောံကတ်လ္ရတ်လဝ်ကွတ်ပၞာန် နူဇရေင် ဒပ်မဟာမိတ်သၟဝ်ကျာ TNLA (တအင်ပလံင်) တေံတုဲ ပြဟ်ဟ်ဏအ် သွက်ဂွံ လုပ်ပေါဲဗ္တိုက် ကဵုတၠအဝဵုပၞာန်ဂှ် ပံင်တောဲသ္ပလဝ်မဟာမိတ် ကုဗော်ဍုင်မန်တၟိ (ဗ္တိုက်သရိုဟ်တၠအဝဵုပၞာန်) ရောင် ဂွံတီကေတ်ရ။
စပ်ကဵုပရေင်မသ္ပလဝ်မဟာမိတ် ကုဗော်ဍုင်မန်တၟိ (ဗ္တိုက်သရိုဟ်တၠအဝဵုပၞာန်) ဂှ်တုဲ ဗီုပြင်လဵု၊ အဆံင်လဵု သွက်ဂွံပံင်တောဲအာညးသ္ကအ်နွံဂှ် ၜါလ္ပာ်ဟွံဂွံသဳကၠဳဟီုဂးလဝ်မွဲသာ်ဏီရောင် သ္ဂးရ။
“ဗော်ဍုင်မန်တၟိ ပါ်တိတ်ဏံ ယဝ်ရပန်တၠအဝဵုဍာံတှ်ေ ပိုယ်လေဝ် သ္ပမဟာမိတ်ဍာံကီုရ၊ အလုံသီု မွဲဗော် ယဝ်ရညးတံစှ်ေစးကဵု NCA တုဲ ပန်မ္ဂး မုသက်ဒးသ္ဂးနွံဏီရော။ ပိုယ်လေဝ် မင်စၟဳမံင်ရ။ ပ္ဍဲကဵုပရေင်ဍုင်ကွာန်လၟုဟ်ဏအ်ဂှ် ဂကူမန်ပိုယ် ဍိုန်လျမံင်နာနာသာ် ညံင်ရဴဂကူညး တၞဟ် ဇြဟတ်ဂွံဇၞော်ဟီုဂှ်တှ်ေ မန်ပိုယ်ဖ္အိုတ် ကၠောန်ညဳသာမှဂွံ” သာ်ဝွံ ဗညာမာံကာန်စဳ နူဒပ် MLA ဂှ် ဟီုရ။
ဗွဲကြဴနူကာလပၞာန်သီအဝဵုဍုင်တုဲ အပ္ဍဲဗွိုင်ဂကူမန်သၟးဂှ် ဂကောံဇြဟတ်ပၠန်ဂတး မပ္တံကဵု ဒပ်ပၠန်ဂတးဍုင်မန် (MSRF)၊ ဒပ်စဵုဒၞါဍုင်မန် (MSDF)၊ ဒပ်ပၞာန်ဗၠးၜးဍုင်မည် (MLA) စတမ်တအ် မံက်ဒှ်တိတ်ကၠုင် လၟိဟ်ဟွံအောန်နူ (၅) ဂကောံနွံရောင် ဂွံတီကေတ်ရ။
