ဘာကဝ်လိက် ကောန်ဂကူမန် ထ္ပက်လိက်ကသုက် MoU ကု တက္ကသိုလ် Payap ရောၚ်
ဂိတုပှော် (၅) စွေက် ၊ သၞာံ ၁၃၈၅ ၊ ဂျာန်နဝါရီ (၃၀) ၊ သၞာံ ၂၀၂၄။
ပ္ဍဲအရာသၠုၚ်အသိၚ် ပရေၚ်ပညာ ဂကူမန် ဂွံက္ဍကၠောံ ကဆံၚ်ပညာ ဍုၚ်သ္အာၚ်မာန် နဌာနပညာ ကောန်ဂကူမန် ရုန်ဂစာန်မံၚ် အဆက်က်ဂှ် နပရေၚ်အံၚ်ဇၞ: မတွံဂ: ပ္ဍဲဂိတု ဖေဖဝ်ဝါရီ (၈) ဏအ်မ္ဂ: သွက်ဂွံ ထ္ပက်လိက်ကသုတ် MoU ကု တက္ကသိုလ် Payap ဍုၚ်သေံ ဂွံလဝ် တၚ်တုပ်စိုတ် ယျရောၚ်ဂှ် ဂအုပ်ဘာကဝ်လိက်မန် နာဲပညာမန် ဟီုလဴကု ပရိုၚ်ဍုၚ်မန်တၟိရ။
“ပိုဲကျာမံၚ်ကဵုဍေံတအ် ဂွံတၟာလအ်ရ၊ လၟုဟ်နကဆံၚ်လက်ကရဴအိုတ် သီုၜါ်လ္ပာ် ခၞံလိက်ကသုတ် MoU တုဲ သ္ၚဳဂၠိပ် ည:သ္ကအ် ကဆံၚ်လက်ရဴအိုတ် တုပ်စိုတ်တုဲ သွက်ဂွံထပက် လိက်ကသုက် မဒှ်ရ” သာ်ဝွံ နာဲပညာမန် မဒှ် ဂအုပ်ဘာ ကဝ်လိက် ကောန်ဂကူမန် ဟီုလဴကီုရ။
အခန်ကၞာ ထ္ပက်လိက်ကသုက် အကြာ ဘာကဝ်လိက် ကောန်ဂကူမန် ကေုာံ တက္ကသိုလ် Payap ဂှ် ပ္ဍဲစၟတ်တ္ၚဲ ဖေဖဝ်ဝါရီ (၈) ဏအ် မ္ဂ: သွက်ဂွံ ကၠောန်ဗဒှ်အာ ပ္ဍဲဍုၚ်သေံ နွံရောၚ် ဂှ်လေဝ် မွဲအဆက်ဓဝ် ည:ဟီုလဴကီုရ။
ပ္ဍဲတၚ်တုပ်စိုတ် လိက်ကသုက် MoU သွက်ဂွံ ထပက် စၟတ်တဲကု တက္ကသိုလ် Payap ဍုၚ်သေံဂှ်တုန် − နတက္ကသိုလ် Payap သွက်ဂွံသ္ပ စၟတ်သမ္တီ ကွ:ဘာ ကဝ်လိက် ကောန်ဂကူမန်ဂမၠိုၚ် နကဆံၚ် ည:ကတ်လ္ၚတ် တက္ကသိုလ် ကဆံၚ်သၠုၚ်တုဲ၊ သွက်ဂွံဒုၚ်တဲ ကွ:ဘာ ကဝ်လိက်မန် ည:နွံပၟိက် မိက်ဂွံဆက်တိုန် တက္ကသိုလ် Payap ၊ အကြာ တက္ကသိုလ် Payap ကု ကဝ်လိက် ကောန်ဂကူမန် သွက်ဂွံ ထမံက်အာ သၞောတ် Dual Degree ၊ အကြာ တက္ကသိုလ် Payap ကု ကဝ်လိက် ကောန်ဂကူမန် သွက်ဂွံသၠုၚ် ပတိုန် ပရေၚ်ပံၚ်တောဲ စပ်ကဵု နဲကဲတန်ဗ္တောန် ကေုာံ ကွတ်အုပ်ဓုပ် ကောပ်ကာဲ တက္ကသိုလ်၊ နတၚ်တုပ်စိုတ် ၜါ်လ္ပာ် သွက်ဂွံ ပံၚ်တောဲ ဓမံက်အာ ရုပ်ရဴ စပ်ကဵု ကမၠောန်ဖောအ်ဗြေဝ် ပညာ မပ္တံ တၚ်နၚ် သာ်တအ် ပါလုပ်မံၚ်ရောၚ် ဂွံတီကေတ် နူဂအုပ်ဘာ ကဝ်လိက် ကောန်ဂကူမန်ရ။
ကွ:ဘာ မကတ်လ္ၚတ်မံၚ်ပညာ ပ္ဍဲကဝ်လိက် ကောန်ဂကူမန် သွက်ဂွံ ဂါံကၠောံ ဆက်ကတ်ပညာ ကဆံၚ် တက္ကသိုလ် ဍုၚ်သ္အာၚ်မာန် ရန်တုဲ အပၞောဝ် ဆိုက်ဗ္ဒက် ဂိုတ်ဂစာန်ကၠုၚ် လၟေၚ်ၚ်ဂှ်တုန်၊ နကိုပ်ကၠာအိုတ် ဂွံတၚ်တုပ်စိုတ် သွက်ဂွံ ထ္ပက်လိက်ကသုတ် MoU ကု Payap ဍုၚ်သေံ မဒှ်ရ။
မိမ ည:ဍုၚ်ကွာန် မန်တအ်ဂမၠိုၚ် ကောန်ဇာတ်ဇကုတအ် တိုန်ဘာ ကဝ်လိက် ကောန်ဂကူမန်တုဲ နူဂှ် မွဲကဆံၚ် ဆက်ဂါံ ကတ်လ္ၚတ်ကေတ် ပညာတက္ကသိုလ် ကဆံၚ်သၠုၚ် ပ္ဍဲဍုၚ်သ္အာၚ် မာန်ရရောၚ်ဂှ် မိကြက်နန် ဟီုလဴကု ပရိုၚ်ဍုၚ်မန်တၟိကီုရ။
“ပိုဲဖန်ဗဒှ်လဝ် ကဝ်လိက် ကောန်ဂကူမန်၊ ကောန်ၚာ် ပိုဲတအ်ဂမၠိုၚ် ကဝ်လိက်ဏအ် တုဲတှ်ေ ဆက်ကဵု အတေံဂွံဟာ၊ ဆက်ကဵု အဏအ် ဂွံဟာ၊ ဟွံသောၚ် ၜိုတ်ဏံ ဓဝ်ရဟာ မိမ ည:ဍုၚ်ကွာန်တအ် ဒဝိၚ် ညံၚ်ဟွံဂွံဒှ်တုဲ၊ သွက်ဂွံ ထ္ပက်အာ လိက်ကသုက်ကဵု တက္ကသိုလ်ဍုၚ်မ္ၚ: ဂမၠိုၚ်တအ်ဂှ် ပိုဲပြေၚ်ရေၚ်လဝ် နွံဒၟံၚ်ဏောၚ်” သာ်ဝွံ ည:တာလျိုၚ် ဌာနပရေၚ်ပညာ ကောန်ဂကူမန် မိကြက်နန် ဟီုလဴကလ:ကဵု ပရိုၚ်ဍုၚ်မန်တၟိကီုရ။
ဌာနပညာ ကောန်ဂကူမန်ဂှ် ၜိုန်ရ ဟွံဂွံ ထ္ပက်လဝ် လိက်ကသုက် တၚ်တုပ်စိုတ် ဏီကီုလေဝ် ပရေၚ်ပံၚ်တောဲ သွာၚ်ပညာ ကၠောန်ၜိုတ်မံၚ်ကု တက္ကသဵု ဇေၚ်မာဲနွံတုဲ နူဂှ် မွဲကဆံၚ် ညံၚ်ဂွံထ္ပက် လိက်ကသုက်မာန် အဃော ဂိုတ်ဂစာန်မံၚ် မဒှ်ရ။
ဆဂှ်သၟ:ဟွံက ကုတက္ကသဵု Purdue, Fort Wayne မၞုံကၟိန်ဍုၚ် အမေရိကာန်ဂှ် ည:တာလျိုၚ် ဌာနပညာ ကေုာံ ကဝ်လိက်တအ် အာလ္ၚတ်လဝ် ပ္ဍဲအမေရိကာန် ပ္ဍဲဂိတု သေပ်တေန်ဗာ သၞာံ ၂၀၂၃ တေံတုဲ ပ္ဍဲသၞာံ ၂၀၂၄ ဏအ် ညံၚ်ဂွံဂွံ တၚ်တုပ်စိုတ် သွက်ဂွံထ္ပက် လိက်ကသုက် မာန်ဂှ် အဃော ဂိုတ်ဂစာန်မံၚ် မဒှ်ရ။
ပရိုၚ်ဍုၚ်မန်တၟိ။
