လလောၚ်ပရိုၚ် စပ်ကဵု ဥက္ကဋ္ဌဇၞော်ဂုဏ်တၟေၚ် နာဲထဝ်မန်စုတိ ကေုာံ ကဵုသမ္တီ စပ်ကဵု အစဳအဇန်စျာပန (ဘာသာမန်)

 လလောၚ်ပရိုၚ် စပ်ကဵု ဥက္ကဋ္ဌဇၞော်ဂုဏ်တၟေၚ် နာဲထဝ်မန်စုတိ ကေုာံ ကဵုသမ္တီ စပ်ကဵု အစဳအဇန်စျာပန (ဘာသာမန်)

========================================

ဥက္ကဋ္ဌဇၞော်ဂုဏ်တၟေၚ် နာဲထဝ်မန်ဝွံ ပ္ဍဲစၟတ်တ္ၚဲ သက္ကရာဇ်ဍုၚ် ၁၃၈၅၊ ဂိတုပုဟ် (၇) မံက်၊ သၞာံခရေတ် ၂၀၂၃ ဂိတု ဂျာန်နဝါရီ (၁၇) ကာလမကလိဂွံအာယုက် (၇၈) သၞာံဂှ် စုတိ ကလိလောန်အာ ဘဝပလိုက် နယဲ မၞိဟ်အာယုက်ဇၞော် ပ္ဍဲရုၚ်ဂဥုဲဇၞော် ဝၚ်က၊ ဍုၚ်သေံရ။ ရုပ်ကလာပ် ဥက္ကဋ္ဌဇၞော်ဂုဏ်တၟေၚ် မသှ်ေသၟေဟ်မံၚ်ဂှ် နူဇရေၚ်ရုၚ်ဂဥုဲဝၚ်က ကေတ်ဖျဴနၚ်တုဲ စွံပ္တန်လဝ် ပ္ဍဲကွာန်ပလိုၚ်ဂျပါန်ရ။

ဥက္ကဋ္ဌဇၞော်ဂုဏ်တၟေၚ် နာဲထဝ်မန်ဝွံ ကြဴနူ ဥက္ကဋ္ဌနာဲထေန် စုတိကလိလောန်အာ ပ္ဍဲသၞာံ ၂၀၀၅ တုဲ၊ စပ္တံနူ သၞာံ ၂၀၀၆ ဂှ် ကေတ်ကၠုၚ်တာလျိုၚ် နဒဒှ် ဥက္ကဋ္ဌ ဗော်ဍုၚ်မန်တၟိ စဵုစိုပ် သၞာံ ၂၀၁၉ ရ။ ပ္ဍဲကဵုသၞာံ ၂၀၂၀ ဂှ် ဟိုတ်နူ အာယုက်ဇရာ၊ ပရၚ်ထတ်ယုက် ဆုတ်ယောၚ်ကၠုၚ်တုဲ နဒဒှ် ဥက္ကဋ္ဌဇၞော် ဂုဏ်တၟေၚ် ဆက်ကေတ်ကၠုၚ် တာလျိုၚ်ဒဵုစိုပ် အခိၚ်မစုတိ အာဏအ်ရ။

ညးဝွံ စပ္တံနူသၞာံ ခရေတ် ၁၉၆၅ ဂှ် စလုပ်ယိုက်ဂၠေၚ် တာလျိုၚ် ပ္ဍဲဗော်ဍုၚ်မန်တၟိ စပ္တံနူ ကောန်သ္ဂံၚ် နူသွာၚ်ဒပ် ဆက်ပရိုၚ်တုဲ ကၠာဟွံဂွံ ယိုက်ဂၠေၚ် နဒဒှ် ဥက္ကဋ္ဌဗော်ဍုၚ်မန်တၟိဂှ် ပ္ဍဲသွာၚ်ဒပ် နဒဒှ် သ္ကိုပ်ပၞာန် ၊ ညးအုပ်ကာ ကမ္မတဳပၞာန် (ညးဂအုပ် က္ဍိုက်ပ်ပၞာန်) ကေတ်ကၠုၚ်တာလျိုၚ် နွံရ။

နာဲထဝ်မန်ဝွံ မဒှ်ကောန် ဒုတိယ နူမအံက် နာဲတံၚ်သိၚ်၊ မိၚိုဲကျဳတုဲ ကတဵုဒှ်မၞိဟ် ဇာတိကွာန် ကၟာဝက် ပ္ဍဲသက္ကရာဇ် ၁၃၀၈ ဂှ်ရ။ နယၟုကွာန် မေန်ယှိုဲထာ ပြာကတ် မၞိဟ်တီညာတ်ကီုရ။ နူတန်မူလ စဵုစိုပ် တန်သၠုၚ်ဂှ် ကတ်ကၠုၚ်ပညာ ပ္ဍဲကွာန်ကၟာဝက်ရ။ အခိၚ် ဥက္ကဋ္ဌဇၞော်ဂုဏ်တၟေၚ် နာဲထဝ်မန် စုတိအာဂှ် သမ္ဘာ မိဝုတ် ကေုာံ ကောန်ဇာတ်ဂမၠိုၚ် မိစမ္ပာထဝ်၊ နာဲအလာံ၊ နာဲအံၚ်ဍုၚ်တအ် သှ်ေသၟေဟ်တဴရ။

ပရေၚ်စုတိ ဥက္ကဋ္ဌဇၞော်ဂုဏ်တၟေၚ်ဝွံ ဒှ်အရာ ပရေၚ်ဂိုဟ်ကဟောံ သွက်ကောန်ဗော်ရဲဗော်၊ ဗော်ဍုၚ်မန်တၟိ ပိုဲတအ်သၟး ဟွံက ဒှ်အရာဂိုဟ်ကဟောံ သွက်အလုံ ဂကူမန် ပိုဲတအ်ကီုရ။

သွက်ဂွံ စံၚ်ဇွဂြဇုတ် နအစဳအဇန် စျာပန သွက်ဥက္ကဋ္ဌဇၞော် ဂုဏ်တၟေၚ် နာဲထဝ်မန်ဂှ် ပ္ဍဲစၟတ်တ္ၚဲ ဂိတု ဂျာန်နဝါရဳ (၂၁) သၞာံ ၂၀၂၄ သွက်ဂွံ ကၠောန်ၜိုတ်အာ ပ္ဍဲကွာန်ပလိုၚ်ဂျပါန်ရ။ နဒဒှ် ပရေၚ်သ္ပဂါရဝ အဲပရဲကီု၊ သီုကဵု ဓမံက်ထ္ၜး လၞီအောန်စိုတ် လတူပရေၚ် စုတိ ဥက္ကဋ္ဌဇၞော် ဂုဏ်တၟေၚ် နာဲထဝ်မန်တုဲ စပ္တံနူ တ္ၚဲဏအ် ဒဵုစိုပ် အခန်ကၞာ စျာပန တုဲဒှ်ဂှ် ပ္ဍဲဇၟာပ် ရုၚ်ဋ္ဌာန်ဂအုပ်၊ ရုၚ်ဋ္ဌာနနာနာ ဗော်ဍုၚ်မန်တၟိတအ်ဂှ် သွက်ဂွံ ဖျေံအလာံ ကဝက်တိုၚ်တုဲ ညံၚ်သ္ဂောံသ္ပ ရှ်ေသှ်ေအဲပရဲကု ဥက္ကဇၞော် ဂုဏ်တၟေၚ်ဂှ် ဗဟဵုကဵုလဝ် စၞောန်ကီုရ။

ပ္ဍဲတရဴကၞောတ်တဲ ဥက္ကဋ္ဌဇၞော် ဂုဏ်တၟေၚ် နာဲထဝ်မန်ဂှ် သွက်ကောန်ဂကူပိုဲ ဂွံသ္ပဂါဝရ အဲပရဲ ပ္ဍဲစျာပန မာန်ရန်တုဲ မွဲကရောံ ပရိုၚ်ဏအ် ဒးလလောၚ်တြး ကဵုဏာသမ္တီကု ကောန်ဂကူမန် ပိုဲတအ်ရ။

ပရိုၚ်ဍုၚ်မန်တၟိ