ဌာနထတ်ယုက်ဗဟဵု ဗော်ဍုၚ်မန်တၟိ ပံက်ရုၚ်ဂဥုဲဇၞော်
ညးဍုၚ်ကွာန် ပ္ဍဲကွာန်ပၞၚ်ဗိုန်
ပရိုင်ဍုင်မန်တၟိ၊ အံက်တဝ်ဗါ (၂၇)၊ ၂၀၂၂
နူကဵုအစဳဇန် ဌာနထတ်ယုက်ဗဟဵု ဗော်ဍုၚ်မန်တၟိ မသိုၚ်ခၞံလဝ် ရုၚ်ဂဥုဲဇၞော်ညးဍုၚ်ကွာန် ပ္ဍဲကွာန်ပၞၚ်ဗိုန် ပွိုၚ်ဍုၚ်ကၞောတ်ၜဳရေဝ်ဝွံ တ္ၚဲဏအ် (အံက်တဝ်ဗါ စၟတ်တ္ၚဲ ၂၇) ဂှ် ကၠောန်သ္ပဏာအသေအဟာန် ပံက်ရုၚ်ဂဥုဲဇၞော် ညးဍုၚ်ကွာန် တုဲဒှ်အာရ။
ပ္ဍဲကဵုရုၚ်ဂဥုဲဇၞော် ပၞၚ်ဗိုန်ဝွံ စပ်ကဵုပရေၚ်ဂၠာဲသတ်ယဲ (Investigation) မပ္တံကဵု ECG, Digital X-ray, Ultrasound တအ် တက်မာန်တုဲ ပရေၚ်ပါ်ဓါတ်စမ်ဆီ၊ စမ်ခယျာ စပ်ကဵု Hematology, Infection & Biochemistry tests သီုဖၟိုတ် ဗၞတ်ပိစှော်သာ်ပြၚ် စၟဳစၟတ်ကဵုမာန်ဒၟံၚ်ရ။
သၟာၚ်နူဂှ်ပၠန် စပ်ကဵုပရေၚ်ဝဳဝတ် (Treatment) တုဲ ယဲကၠောံထၞာန်လေပ်၊ ယဲကၠောံထၞာန်ဟွံလေပ်၊ ယဲကောန်ၚာ်၊ ယဲညးဗြဴ၊ ယဲဆေၚ်စပ်ကဵုသၠးဂဝ်ဂၞဴတအ် ဝဳဝတ်ကဵုမာန်တုဲ စပ်ကဵုပၠောပ်ဆီမ္ဂး ညံၚ်ဂွံထပၠောပ်အာနဲကဲစှေ်စှေ် ဗွဲမဂီုကၠီုမာန်ဂှ် ကၠောန်သ္ပလဝ်ရ။
ဆဂှ်သၟးဟွံက ဆေၚ်ကဵုဒးပါ်စြေက်ပၠန်လေဝ် ယဲပါ်စြေက်ဂွံနဂဥုဲဒုၚ် (Local anesthesia, spinal anesthesia) တအ် မပ္တံကဵုပါ်စြေက်သၠးဂဝ်ဂၞဴ (LSCS)၊ ယဲကၠန်စှေ် (Hernia)၊ ယဲကြုတ်ဂုဟ် (Appendicitis) တအ် ပါ်စြေက်ဝဳဝတ်အာကဵုမာန်ရောၚ် ဂွံတီကေတ်ရ။
ဌာနထတ်ယုက်ဗဟဵု ဗော်ဍုၚ်မန်တၟိဝွံ စဒက်ပ္တန်လဝ် နူကဵုသၞာံ ၁၉၇၂ တေံတုဲ သၞာံဏအ်မ္ဂး ပေၚ်ကၠုၚ် (၅၀) သၞာံကီုရ။
