လိက်လလောၚ်တြ:သ္ဘၚ်သဳကၠဳဗော်ဍုၚ်မန်တၟိ အလန် (၁၁) ဝါ

 

၁၊၊ သ္ဘၚ်သဳကၠဳဗော်ဍုၚ်မန်တၟိ အလန် (၁၁) ဝါဝွံ စပ္တံနူသၞာံ − ၂၀၂၃ ဂိတုဒဳဇြေန်ဗါ (၂၅) စဵုကဵု သၞာံ − ၂၀၂၄ ဂိတု ဂျာန်နဝါရဳ (၁၄) ကၠောန်ကၠုၚ်အပ္ဍဲဌာန်ဂအုပ်ဗဟဵု ဗော်ဍုၚ်မန်တၟိ ဗွဲမအံၚ်ဇၞ: အာစိုပ်ဒတုဲရ၊၊ အပ္ဍဲသ္ဘၚ်သဳကၠဳဗော်ဝွံ ည:စၞ: (၁၁၂) တၠ၊ ည:လ္ၚတ် (၃၂) တၠ၊ ကောန်ဗော်ဗွိုၚ်မ္ၚ: (၁၀) တၠ၊ ဂကောံကဵုကသပ်ကုဗော် (၅) တၠ၊ ည:ဘိက်ထေက် (၆) တၠ (ကျာ်ဇၞော်အ္စာ၊ ခမဳသၚ်၊ သၚ်သၟတ် တအ် တိုန်စိုပ်ကဵုကသပ်တ္ၚဲပံက်သ္ဘၚ်သဳကၠဳ) တိုန်စိုပ်တုဲ သဳကၠဳသ္ၚဳဂၠိပ်ချပ်ဗ္စာ၊ အကာဲအရာဂၠ:ကဝ်၊ ပရေၚ်ဍုၚ်ပိုဲ၊ ပရေၚ်ဂကူပိုဲ ကေုာံ ပရေၚ်ဗော်ပိုဲ၊ ဒပ်ပိုဲ၊ သၠဲသၠဲလ:လ: ဗၠ:ဗၠ:ၜ:ၜ:ရ၊၊

၂၊၊ ဒုၚ်သ္ဇိုၚ်ကဵုလ္တူအကာဲအရာ မပြံၚ်လှာဲက္တဵုဒှ်ဒၟံၚ်ဂှ် ချပ်ဗ္စာသဳကၠဳည:သ္ကအ်တုဲ သွက်ဂုဏ်ဖဵုဂကူပိုဲ၊ ဗော်ပိုဲ၊ ဒပ်ပိုဲ၊ သ္ဇိုၚ်ဒေသတိဍာ်ပိုဲ ဖျေံကၠုၚ်ပရေၚ်ကမၠောန်ဂတတအ်ရ၊၊ သွက်ဂွံပၠတရဴ ပရေၚ်ကမၠောန်ဗော်မာန် ရုဲစှ်ပ္တိုန် ကမ္မတဳဗဟဵု (၃၅) တၠ၊ အရန် (၆) တၠရ၊၊ အပ္ဍဲဂှ် ရုဲစှ်ပ္တိုန်ကမ္မတဳရေၚ်တၠုၚ်ကေၚ်ကာဗဟဵု (၁၁) တၠတုဲ ထပ်ရုဲစှ်ပ္တိုန် နဒဒှ်ဥက္ကဌဗဟဵု နာဲဟံသာ၊ ဒု−ဥက္ကဌဗဟဵု နာဲအံၚ်မေန်၊ ည:အုပ်ကာနာနာဗဟဵု နာဲဇဲယ၊ ဖက်ဆောည:အုပ်ကာနာနာဗဟဵု နာဲဝေန်လှတအ်ရ၊၊

၃၊၊ သၟတ်၊ ည:ဗြဴ၊ တၠကွတ်၊ ပူဂဵုဆာန်ဂကူ၊ ဂကောံမဟာဇန် မ္ၚ:ဗွိုၚ်ဗော်တအ် ဂွံပါလုပ်အပ္ဍဲဗွိုၚ်ဗော်ဂၠိုၚ်ၚ် ရန်တၟံတုဲ အပ္ဍဲပရေၚ် အာက္ဍိုပ်အဆံၚ်ဆံၚ်လေဝ် ဂွံပါလုပ်ယိုက်ဂၠေၚ်ပရေၚ်ကောန်ဂကူ၊ ပရေၚ်ဗော်မာန်၊ နကဵုသၞောတ်ကမ္မတဳသၠဲ (လၟိဟ် ၇ တၠ) ပံက်လဝ်အခေါၚ်နွံရ၊၊ ဟိုတ်ဂှ်ရ သၟတ်၊ ည:ဗြဴ၊ တၠကွတ်၊ ပူဂဵုဆာန်ဂကူ၊ ဂကောံမဟာဇန်တအ် ညံၚ်ဂွံဘိုၚ်ဖ္ဍိုက်ဗပေၚ် အခန်အာ က္ဍိုပ်ပ္ဍဲဗော်မာန် ဆဝ်မ္ၚုဟ်ဏာရ၊၊ အပ္ဍဲသ္ဘၚ်သဳကၠဳဏံ ဖျေံစွံလညာတ်သွက်ဂွံဓမံက်အာ သၞောတ်ကမ္မတဳဗဟဵုလၟိုန်နွံရ၊၊

၄၊၊ ပ္ဍဲကာလဏံ ပေါဲဗ္တိုက်အကြာကံၚ်ဇြဳပၞာန် ကေုာံ ရဲဒစဵုဒစ:ကဵု ကံၚ်ဇြဳပၞာန်တအ် အသိၚ်သၠုၚ်တိုန်မံၚ်ရိုဟ်ဟ်တ္ၚဲရ၊၊ ည:ဝေၚ်ပၞာန် ၜါလ္ပါ် ဂွံတက်ကျာသဳကၠဳဂၠာဲသွဟ်ဂှ်လေဝ် ဟွံညာတ်အယောၚ်အလာဏီ၊၊ ဂွံဒေါံပန်ပှော်အလုံဍုၚ်မာန်လေဝ် ဒှ်ဟွံမာန်ဏီ၊ ဂွံသှ် ကလ:ပြသၞာဍုၚ်ပိုဲမာန်၊ ဍုၚ်ဂၠ:ကဝ်ဂမၠိုၚ် သ္ပတိုၚ်ကဵု တၚ်တုပ်စိုတ်အာသဳယာန် (၅) တၚ် ည:မဆေၚ်စပ်တအ်ဖအိုတ် ညံၚ်ဂွံပါ လုပ် နနဲဆဵုဂဗတက်ကျာ ဂွံသောၚ်ကလ:ဂှ် ဒှ်ဟွံလောဲဏီရ၊၊ ပ္ဍဲပြဟ်ဟ်ဏံ ဂွံသောၚ်ကလ:ပြသၞာဍုၚ်ပိုဲမာန်ကီု၊ ဂွံဒက်ပ္တန် ပရေၚ်ၜိုဟ်လလမ်ဍုၚ်ကီု ကၟိန်ဍုၚ်ပံၚ်ကောံဖေတ်ဒရေဝ်ဍာံဇေတ် ဂွံမံက်ဒှ်ကၠုၚ်ကီုဂှ် အယောၚ်လာဟွံညာတ်ဏီရ၊၊

၅၊၊ ဟိုတ်ဒၟါနူပၞာန်သီအဝဵုကီု ဒ:ဒုၚ်ကၟာတ်ဆိုအ် ပရေၚ်ပိုန်ဒြပ်၊ ပရေၚ်ဍုၚ်ကူသာန်သွံသာန်ကု ဍုၚ်ဂၠ:ကဝ်ဗွဲလ္ၚဵုတံတုဲ ပရေၚ်ပိုန်ဒြပ် ဍုၚ်ပိုဲလီုလာ်ကၠုၚ်မံၚ်ရ၊၊ ပရေၚ်ဆက်ဆောံကလုတ်တမာန်၊ ပရေၚ်သ္ပသမ္တီဍုၚ်ဂၠ:ကဝ်ဗွဲလ္ၚဵု ယအ်စှ်ေကၠုၚ်လေဝ်နွံရ၊၊ ဟိုတ်နူပေါဲ ဗ္တိုက် ကေုာံ ပရေၚ်ပကီုပရာပ်တုဲ ည:ဍုၚ်ကွာန်တအ် ဒ:ဒုၚ်ဒဒိုက်ဘဲပၞာန် ဇၞော်ကဵုဇြဟတ်နွံရ၊၊

၆၊၊ အပ္ဍဲဒေသမန် ဒၞါဲလ္ၚဵုပၟတ်ပၞာန်ကၠောံကၞာန်လုပ်မံၚ်ဒှ်တုဲ ည:ဍုၚ်ကွာန်ဗွဲလ္ၚဵုတအ် ဒ:ဒုၚ်ဘဲပၞာန်နွံမံၚ်ဂှ် နကဵုဗော်ပိုဲ ဘိုၚ်တာဒၞာ ဟွံမာန်တုဲ ခမဳသၚ်၊ ည:ဍုၚ်ကွာန်တအ် ဟွံပေၚ်စိုတ်လ္တူဗော်နွံရ၊၊ ဗော်ဍုၚ်မန်တၟိဝွံ ဒှ်ဗော်ကောန်ဂကူတောတက် ဒှ်ဗော်စဵုဒၞါ မၚ်မွဲဂကူတုဲ ပ္ဍဲကာလဏံ အပ္ဍဲဒေသမန် ပရေၚ်အုပ်လဒံသၞောဝ်၊ ပရေၚ်ဂီုကၠီု ဂွံခိုဟ်တိုန်ဂှ် ဂၠာဲနဲကဲနာနာသာ် စွံဇြိုဟ်နက်သ္ပလွဳ ကၠောန်ၜိုတ်ရေၚ်တၠုၚ်အာရောၚ်၊၊

၇၊၊ ဗော်ဍုၚ်မန်တၟိဝွံ ကၟောန်ပခိုၚ်ဏာဓဝ်ညဳသာဂကူ ဆက်ဂ္စာန်လွဳပရာကၠောန်ၜိုတ်အာ ပရေၚ်ဒက်ပ္တန်ဗော်၊ ဒပ်၊ သ္ဇိုၚ်ဒေသ ညံၚ်ဂွံ ခိုဟ်အာရောၚ်၊၊ မွဲအခိၚ်ဓဝ် ကုကောန်ဂကူရပ်လွဟ် ဘဝတုပ်တအ်ကီု ဂကောံရပ်လွဟ် ရန်တၟံတုပ်တအ်ကီု၊ ပရေၚ်ညဳသၟဟ်ဂွံနွံ ဆက်ဂစာန်အာတုဲ အခေါၚ်ကံကုသဵုဂကူပိုဲ၊ ပိုဲညံၚ်ဂွံဖန်ဖက်ကေတ်မာန်၊ ကၟိန်ဍုၚ်ပံၚ်ကောံ ဖေတ်ဒရေဝ်ဍာံဇေတ် ဂွံမံက်ကၠုၚ် မာန် ဂိုတ်ဂ္စာန်ကၠောန်ၜိုတ်အာရောၚ် လလောၚ်တြ:ဏာရ၊၊