ဘာပရေၚ်ဍုၚ်ကွာန်သ္ဇိုၚ် လၟေၚ် (၆၇) ဝါ ခရိုၚ်သဓီု အာစိုပ်ဒတုဲ
---------------------------
ပရိုၚ်ဍုၚ်မန်တၟိ ၊ (၆) သေပ်တေန်ဗာ ၂၀၂၃။
နအစဳအဇန် ခရိုၚ်သဓီု ဗော်ဍုၚ်မန်တၟိ သ္ကိုပ်သ္က ပံက်ကၠုၚ်ဘာ ပရေၚ်ဍုၚ်ကွာန် ပွိုၚ်မွဲဂိတု ပ္ဍဲဌာန်ဂအုပ် ခရိုၚ်သဓီု ဗော်ဍုၚ်မန်တၟိဂှ် ပ္ဍဲ ဂိတုသေပ်တေန်ဗာ စၟတ်တ္ၚဲ(၆) ဂှ် အာစိုပ်ဒတုဲ ကၠောန်သ္ပဏာ အခန်ကၞာ စှ်ေဘာရ။
ပ္ဍဲမွဲဒမြိပ် ဘာပရေၚ်ဍုၚ်ကွာန်သ္ဇိုၚ် ဏအ်ဂှ်တုန် ဘာသာ (၉) ဘာသာ မတွံဂး ရာဇဝၚ်ဂကူမန် (ဇမၠေံ)၊ ဝၚ်ပရေၚ်ဍုၚ်ကွာန်ဂကူမန်၊ သ္ဇိုၚ်နဲကဲစန်ဒက်၊ ဂၠံၚ်တရဴ ပရေၚ်စန်ဒက်၊ ဂၠံၚ်တရဴ ပရေၚ်ဍုၚ်ကွာန်၊ လၟေတ်ပိသာ်၊ သၞောဝ်ဥပေဒ ဒက်ပ္တန် ဗော်ဍုၚ်မန်တၟိ၊ ဂၠံၚ်တရဴ ပရေၚ်ကမၠောန်ပၞာန်၊ အဓိပ္ပါယ်ဝေါဟာရ မအရေဝ် ပရေၚ်ဍုၚ်ကွာန် တအ်ဂှ် ဗ္တောန်ကၠုၚ်ကဵုလဝ် နွံရ။
ပ္ဍဲဘာပရေၚ်ဍုၚ်ကွာန်သ္ဇိုၚ် လၟေၚ် (၆၇) မပံက်ဗ္တောန်လဝ် ပ္ဍဲဌာန်ဂအုပ်ခရိုၚ်သဓီုဏအ် ကွးဘာ ညးတြုံ၊ ညးဗြဴ အပံၚ် (၃၄) တၠ တိုန်စိုပ် ကတ်လဝ်လဝ်ရ။ ဘာဂှ် စပ္တံနူ စၟတ်တ္ၚဲ ၆ ဂိတုအဝ်ဂေတ်ဂှ် စပံက်လဝ်တုဲ ပ္ဍဲစၟတ်တ္ၚဲ ၆ ဂိတုသေပ်တေန်ဗာဂှ် ဘာအာစိုပ်ဒတုဲ ကၠောန်သ္ပ အခန်ကၞာစှ်ေဘာရ။
ကွးဘာ တိုန်စိုပ် ကတ်လ္ၚတ် ပ္ဍဲမွဲဒမြိပ် ဘာပရေၚ်ဍုၚ်ကွာန်သ္ဇိုၚ် ပွိုၚ်မွဲဂိတုဏအ်ဂှ် စမ်ၜတ်ကၠုၚ် ဍာ်ဒကေဝ် ကွးဘာတအ် လၟေၚ်ၚ်တုဲ ရုဲစှ်ကဵုကၠုၚ်လာပ် ပထမ၊ ဒုတိယ၊ တတိယ ကေုာံ လာပ်စိုန်သကီု ဟီုအရေဝ်ခိုဟ် တအ်ကဵုကၠုၚ် ပ္ဍဲအခန်ကၞာ ဖျေံဘာဂှ်ရ။
ပ္ဍဲအခန်ကၞာစှ်ေဘာ ပရေၚ်ဍုၚ်ကွာန်ဂှ် ကေၚ်ကာဗဟဵု ဗော်ဍုၚ်မန်တၟိလေဝ်ဒှ် နဒဒှ် ညးလျိုၚ် ဗွိုၚ် အပ္ဍဲဍုၚ် လေဝ်ဒှ် နာဲဗညာလဴ၊ ဒုလျိုၚ်ဌာနပရေၚ်ဍုၚ်ကွာန်ဇၞော်ဗဟဵု ဗော်ဍုၚ်မန်တၟိ နာဲယက္ခ၊ ဥက္ကဋ္ဌခရိုၚ်သဓီု နာဲသိုက်ဆာန်ထဝ်၊ ညးအုပ်ကာ ခရိုၚ်သဓီု နာဲကောန်သိုက် ၊ ညးလျိုၚ်ဌာနစန်ဒက် ဗွိုၚ်အပ္ဍဲဍုၚ် မိမၠဵု၊ ညးလျိုၚ်ဌာနကာပၞာန် သ္ကိုပ်ဗိုလ်ဇၞော် နာဲစၠန်ထဝ်၊ သ္ကိုပ်တံဒပ် လၟိဟ် (၄) ဒုသ္ကိုပ်ဗိုလ်ဇၞော် အိန်ဆာန် တအ် ရေၚ်တၠုၚ် နဒဒှ် သဘာပတိတုဲ ကၠောန်သ္ပကၠုၚ် အခန်ကၞာစှ်ေဘာ ဂှ်ရ။
No comments:
Post a Comment