လိက်လလောၚ်တြး လစွံစိုတ်ဗော်ဍုၚ်မန်တၟိ - စပ်ကဵု ပေါဲဗတိုက် ဒေသၜဳဂြာၚ် ကေုာံ စပ်ကဵုပရေၚ်လေၚ်ဆောံ ကွာန်ဓမ္မသ။

 

လိက်လလောၚ်တြး လစွံစိုတ်ဗော်ဍုၚ်မန်တၟိ - စပ်ကဵု ပေါဲဗတိုက် ဒေသၜဳဂြာၚ် ကေုာံ စပ်ကဵုပရေၚ်လေၚ်ဆောံ ကွာန်ဓမ္မသ။

================================================

စၟတ်တ္ၚဲ - ဂိတု ဖဝ်ရဂိုန် (၁၂) စွေက်၊ သက္ကရာဇ်ဍုၚ် ၁၃၈၅ ၊ ဂိတုဧပြီ (၅) သၞာံခရေတ်၂၀၂၄။

ဟိုတ်နူ ဒပ်ပံၚ်ကောံတအ် ဓမံက်ကၠုၚ် ပေါဲဗတိုက် ပ္ဍဲဒေသ ၜဳဂြာၚ် ဂှ်တုဲ၊ နအသိၚ်အလိုန် ပေါဲဗတိုက် ဂှ်ဟေၚ် နူဒပ်ကံၚ်သဳပၞာန်ဗၟာ ပန်ပလံၚ်ဏာ လွဟ်ဇၞော် နူက္ၜၚ်ဒပ်ဍာ် ဒပ်ကျာတုဲ ဒးသ္ၚိဌာန် ညးဍုၚ်ကွာန် ကွာန်ဓမ္မသ၊ သ္ၚိညးဍုၚ်ကွာန် မန်တအ်ဂမၠိုၚ် တဴအာပၟတ် လၟိုဟ်ဗွဲမဂၠိုၚ်တုဲ ဒးဒုၚ်ဆောံလေၚ်ကၠုၚ်နွံကီုရ။

စပ်ကဵု အကာဲအရာ မကတဵုဒှ်အာဂှ်တုဲ ပ္ဍဲစၟတ်တ္ၚဲ ဂိတုမာတ် ၄ ကေုာံ ၅ ပွိုၚ် (၂) တ္ၚဲ ကမ္မတဳရေၚ်တၠုၚ် ကေၚ်ကာ ဗဟဵု ဗော်ဍုၚ်မန်တၟိ သဳကၠဳ သ္ၚဳဂၠိပ်ကၠုၚ်တုဲဟေၚ် နလိက် လလောၚ်တြးဏအ် မိက်ဂွံ လလောၚ်တြး ဓမံက်ထ္ၜးဏာ လစွံစိုတ် ဗော်ဍုၚ်မန်တၟိ ကီုရ။ 

ကုဂကောံရပ်လွဟ် ဂမၠိုၚ်တအ်ဂှ်လေဝ် ညံၚ်ဂွံ သ္ပသမ္တီ တိဍာ်ပရေၚ်အုပ်ဓုပ် ဂကူညး၊ ဗော်ညးတုဲဟေၚ် ပွမကေတ်ဒၞာဲ ဇရေၚ်ကွာန်မန်ဂမၠိုၚ် ဝေၚ်ဓမံက်မံၚ်ပၞာန် တအ်ဂှ် ထေက်ကဵု မ္ဒးဗ္စာရဏာ တၟော်ဆရောၚ်။ ဟိုတ်ပွ ပေါဲပၞာန်တုဲ ညံၚ်ပရေၚ် လေၚ်ဆောံ ညးဍုၚ်ကွာန်မန်တအ် ဟွံဂွံကတဵုဒှ်ကၠုၚ်ဂှ် သ္ပဂရု တၟော်တော်ဆ တုဲဟေၚ် ညံၚ်ဂွံကၠောန်ၜိုတ် အာဂှ်လေဝ် ကဵုဏာသမ္တီကီုရ။

ပရိုၚ်ဍုၚ်မန်တၟိ