ကံၚ်သဳပၞာန်တံ ထိၚ်ရပ်ဏာ ဒံက်တာအံၚ်နာၚ်ဥုဂှ် ဒှ်ကမၠောန်ပရဟိတ ဂကောံရာမညပရဟိတ အလုံဒေသရးမန်တုဲ ပရေၚ်စၟဳစၟတ်တုဲဒှ်မ္ဂး သွက်ဂွံဗၠးနွံ
ဌာန်ပရိုင်ဗၠးၜးမန်၊ စဲ (၃) မံက်၊ ၁၃၈၅ သၞာံ။
ဒံက်တာအံၚ်နာၚ်ဥုဂှ် ဒှ်ညးဘိုၚ်ကၠောန်ရေၚ်တၠုၚ်ဒၟံၚ်ကမၠောန် ပရဟိတပ္ဍဲဂကောံ ရာမည ပရဟိတ အလုံဒေသရးမန်မွဲတၠတုဲ ကံၚ်သဳပၞာန်ဗၟာတံ တၚ်ဒှ်သံသယ တၚ်ဟွံကၠးတံဂှ် သၟာန်သၟုက် တုဲမ္ဂး သွက်ဂွံဗလးကဵုနွံရောၚ် ခမဳသၚ်တံကီု မၞိဟ် ကၠောန်ရေၚ်တၠုၚ်ဒၟံၚ် မွဲကရောံကဵု ဒံက်တာအံၚ်နာၚ်ဥု လ္ၚဵုကီု စၟဳတော်လဝ်ရ။
“ဒံက်တာအံၚ်နာၚ်ဥု ကၠောန်ဘိုၚ်ရေၚ်တၠုၚ်မံၚ်ဂှ် ကမၠောန်ဂကောံရာမညပရဟိတ အလုံဒေသရးမန်ဏောၚ်၊ ညးတေံကၠောန်မံၚ် ကမၠောန်ပူဂဵုညးတေံ ဟွံသေၚ်ပုဟ်၊ ဆေၚ်ကဵုကမၠောန်မၞိဟ်ဂလိုၚ်ဏောၚ်။ ဍေံဒှ်သံသယနွံမွဲမွဲသာ်နွံတုဲတှ်ေ ဍေံဘိုအ်ဂွံစၟဳစၟတ် ညိညိနွံမာန်၊ ကိစ္စဏံ ခမဳသၚ်တံ ညးတံသောၚ်ကလး ကေတ်လျိုၚ်တုဲတှ်ေ ဍေံဒးဗလးတွဵုရောၚ် ညာတ်သာ်ဂှ်” သာ်ဝွံ မၞိဟ်ကြပ်လုက်စုက်ကဵု ဒံက်တာ အံၚ်နာၚ်ဥုမွဲတၠဂှ် ဟီုရ။
ဂကောံရာမညပရဟိတအလုံဒေသရးမန်ဂှ် နူကဵုဂကောံခမဳသၚ်ကျာ်ဇၞော်အ္စာဂမၠိုၚ် က္ဍိုက်က္ဍိုပ်တုဲ ဖန်ဇန်ရေၚ်တၠုၚ်ဒၟံၚ် စပ်ကဵုညးဍုၚ်ကွာန်က္တဵုဒှ်ဒဒိုက် ဘဲအန္တရာဲနာနာသာ် မပ္တံကဵု ဘဲဒဏ်ပွဳပွူသဘာဝကီု၊ ဘဲအန္တရာဲပရေၚ်ထတ်ယုက်ဂိယဲကီု၊ ဘဲအန္တရာဲဒးဒုၚ်ပကီုပရာပ်မွဲမွဲသာ်ကီု၊ ဘဲအန္တရာဲပေါဲပၞာန်ကီု ကဵုအရီုအဗၚ် ရေၚ်တၠုၚ်ထံက်ပၚ်ဒၟံၚ် စၞဇွောံမ နာနာသာ်နွံရ။
“ဓမ္မသ တူမံၚ်အဆက်ဆက်တုဲတှ်ေ လက္ကရဴဏံပေါဲဗတိုက်က္တဵုဒှ် အကြာကွာန်ကြေဝ်ဏာ ကွာန်ကအ်သိုခ်၊ ကအ်ဇြဲဂှ် ညးဍုၚ်ကွာန်တံလေဝ် ကၟာတ်ဆိုအ်မံၚ် အကြာပေါဲပၞာန်ဂှ် နွံမံၚ် ဂွံအာရီုပ္တိတ်နၚ် ညးဍုၚ်ကွာန်နွံမံၚ်အတေံဂှ်ရ ဗလးဏာ ဒံက်တာအံၚ်နာၚ်ဥု ဍေံအာဒုၚ်ပ္တိတ် ညးဍုၚ်ကွာန် ပ္ဍဲတေံဂှ်ရ စိုပ်အဂှ် ဍေံစၟဳစၟတ်ရပ်ထိၚ်ဏာ လက္ကရဴဂှ် ဂကောံခမဳသၚ်ပိုဲနွံမံၚ် ကိစ္စဏံ ဗက်သောၚ်ကလးတုဲတှ်ေ ဍေံဒးဗလးတွဵုဏောၚ်” သာ်ဝွံ တၠဂုဏ်အ္စာ ရေၚ်တၠုၚ်ဒၟံၚ်မွဲကရောံကဵု ဒံက်တာ အံၚ်နာၚ်ဥု မွဲဇကု ဟီုမြော်ရ။
လက္ကရဴနူကဵု ပေါဲဗတိုက်သီဗဒိုပ်ဗၠာဲသၟိၚ် ကွာန်ကအ်ဗိန်ဂှ်တုဲ ဒေသဝွံ နူလ္ပာ်ကံၚ်သဳပၞာန်ဗၟာတံ ပန်ထဍိုၚ်ဖျေံဒၟံၚ်မၠံက်ဇၞော်ကီု၊ ပန်ဖျေံဒၟံၚ်လွဟ် နူလ္တူက္ၜၚ်ကျာပၞာန်ကီု၊ ထောံဖျေံဗမ်ဇၞော် နူက္ၜၚ်ကျာကီုတုဲ က္တဵုဒှ်သ္ၚိတူ၊ ညးဍုၚ်ကွာန်ဂမၠိုၚ် တံလေဝ် က္တဵုဒှ်ဒဒိုက်ဘဲပၞာန်တုဲ ဂကောံပရဟိတ အလုံဒေသရးမန်ဂှ် ဒံက်တာ အံၚ်နာၚ်ဥုကီု ခမဳသၚ်ကျာ်ဇၞော်အ္စာ တၠဂုဏ်အ္စာလ္ၚဵုဂှ်ကီု ရေၚ်တၠုၚ်ပလံၚ်ဗစိုပ်ဇွောံမ ဒၞာဲညးဍုၚ်ကွာန်ပါဲဒဴဂှ်ကီု၊ ရီုဗၚ်ဟံၚ်ပြာ်ပ္တိတ်ညးဍုၚ်ကွာန် နူကဵုဘဲပၞာန်ဂှ်ကီု ဘိုၚ်ရေၚ်တၠုၚ်ကၠုၚ်ရ။
နူတနေံတေံ (ဂိတုအေပရဴ ၁၀) အခိင်အကြာနူဂယးဂှ် ဒံက်တာအံၚ်နာၚ်ဥုဝွံ နကဵုကွဳစက် သွက်ဂွံအာရီုဗၚ်ဟံၚ်ပြာ် ပ္တိတ်ညးဍုၚ်ကွာန် ကၟာတ်ဆိုအ်ဒၟံၚ် ပ္ဍဲကွာန်ကအ်သိုခ်၊ ကအ်ဇြဲ ပွိုၚ်ဍုၚ်ကျာ်မြဟ်ဂှ်တုဲ စိုပ်ဂတရုၚ်ကမၠောန်စက် (မော်လမြိုင် စက်မှုဇုံ) ဂှ် ဂကောံကံၚ်သဳပၞာန်တံ ဗ္ဒောံစၟဳစၟတ် ရပ်ထိၚ်ဏာလဝ်ရ။
ပြဟ်ဟ်ဏံ နူကဵုကံင်ဇြဳပၞာန်တံ ရပ်ထိင်စွံလဝ် ဒံက်တာအံင်နာင်ဥူ ပ္ဍဲရုင်ဗၠာဲသၟိင်ဒါင်ဝန်ကွေန် လ္တူဍုင်မတ်မလီုရောင် ဂွံတီလဝ်ပရိုင်ဗွဲကိုပ်ကၠာရ။
No comments:
Post a Comment