အပ်ပြာပ်တဆိပ်ကြာ ဝဳရဟံသာ ကုဥက္ကဌဇၞော်ဗဟဵု ဗော်ဍုင်မန်တၟိ နာဲဟံသာဏောင်
ပရိုင်ဍုင်မန်တၟိ၊ ဖေဖဝ်ဝါရဳ (၇)၊ ၂၀၂၄။
နူကဵုဂကောံဆက်စၠောံမန်အလုံဂၠးကဝ်တအ် ဆဝ်ဗ္ရုဟ် ပံင်ကောံညးသ္ကအ်တုဲ အပ္ဍဲဂိတုဖေဖဝ်ဝါရဳ၊ သၞာံ ၂၀၂၄ ဏအ်မ္ဂး သွက်ဂွံပ္တိုန်ဂုဏ်စရာဲ အပ်ပြာပ်တဆိပ်ကြာ ဝဳရဟံသာ ကုဥက္ကဌဇၞော် ဗော်ဍုင်မန်တၟိ နာဲဟံသာနွံရ။
အစဳအဇန် ပ္တိုန်ဂုဏ်စရာဲ အပ်ပြာပ်တဆိပ်ကြာဂှ်ဝွံ ပ္ဍဲတ္ရဲဥက္ကဌဇၞော်ဗဟဵု ဗော်ဍုင်မန်တၟိ နာဲဟံသာ က္တဵုဒှ်မၞိဟ် ဂိတုမာ် (၆) မံက်၊ (ဖေဖဝ်ဝါရဳ စၟတ်တ္ရဲ ၁၅) ဏအ်မ္ဂး ကၠောန်ဗဒှ်အာ ပ္ဍဲဌာန်ဂအုပ်ဗဟဵု ဗ္ဒိုပ်လုပ်ဍုင်ရောင်။
ဥက္ကဌဇၞော်ဗော်ဍုၚ်မန်တၟိ နာဲဟံသာဝွံ က္တဵုဒှ်မၞိဟ် ပ္ဍဲသက္ကရာဇ်ဍုင် ၁၃၀၉ သၞာံ၊ ဂိတုမာ် (၆) မံက်၊ တ္ရဲသိုက်၊ (ဂျာန္နဝါရဳ ၁၆၊ ၁၉၄၈) မဒှ်ကောန်သၟာဗ္ရ နာဲဗမ်-မိဇဳ ဇရေင်ကွာန်ကုန်သာယျာ (ဗ္ဒါဲဍုင်ဇိုင်ကျာ်) ပွိုင်ဍုင်ပံင်၊ တွဵုရးဍုင်မန်တုဲ ပၞောဝ်ကောဒေံ (မၞိဟ်တြုံသီုဖ္အိုတ်) တြဴတၠဂှ် ဒှ်ကောန်ဗၠာဲ မရနုက်ကဵုပိရ။
ရန်တၟအ်ကဵု သွက်ဂကူမန် ဂွံဗၠးၜးနူဘဝဍိက်၊ ဂွံက္လေင်ဒက်ပ္တန်ဍုင်မန်တၟိမွဲဝါပၠန်တုဲ ကာလစိုပ်အဝဲ ဂွံအာ ယုက် (၂၀) သၞာံ၊ ပ္ဍဲသက္ကရာဇ် ၁၉၆၈၊ ဂိတုမာတ်ဂှ် ထောံကွာန် လသာကၠေံနူဌာန်ဒေသဇကုတုဲ လုပ်စိုပ် တိဍာ်ပၠန်ဂတး ဇရေင်ဗော်ဍုင်မန်တၟိရ။
ပ္ဍဲဗော်ဍုင်မန်တၟိဂှ် နာဲဟံသာ ယိုက်ဂၠေင်ကၠုင်တာလျိုင်နာနာ သွက်ဗၠးၜးဂကူ မွဲဒမြိပ်တုဲ ကာလစိုပ်သၞာံ ၂၀၁၉ ကၠောန်ဗဒှ်သဘင်သဳကၠဳဗော်အလန်ဒသမဂှ် ဂွံဒုင်ရုဲစှ်ပ္တိုန် နဒဒှ်ဥက္ကဌဇၞော် ဗော်ဍုင်မန်တၟိရ။
ညးဝွံ သွက်ဗၠးၜးဂကူမန်ဂှ် ပါဲနူနဲကဲလွပ်လွဟ်တုဲ နကဵုဂၠံင်တရဴ မဆက်စၠောံမဟာမိတ် ကုကောန်ဍုင်အရင် ဘဝတုပ်ဂမၠိုင်ကီု၊ နကဵုလွဟ်ကၞေဟ် ချူဇန်ကၠုင်ဒွက်၊ ဝတ္ထု၊ လဝေင်ဇာတ်၊ လိက်ပရေင်၊ လိက်ကၞပ် (ဘာသာမန်၊ ဗၟာ) ဂၠိုင်ကဵုလၟိဟ်ကီု တဝ်စၞေဟ်လုပ်ကၠုင်ပေါဲဗ္တိုက်နာနာသာ် စဵုကဵုလၟုဟ်ဏီဖိုဟ်ရ။
ဒှ်သာ်ဂှ်ရ ရံင်ကဵုအသဝ်ဂုဏ်တၟေင် ညးမသၠးကၠုင်လဝ်ဖဵုအတ္တနာနာ၊ မဂံင်သၠာဲလမျီု သွက်ဗၠးၜးဂကူမန်ဂှ်ရ မ္ဒးဇိုန်ပအပ်ကဵု တဆိပ်ကြာ ဝဳရဟံသာရောင် နူကဵုဂကောံဆက်စၠောံဂကူမန် အလုံဂၠးကဝ်တအ် သ္ဂးလဝ်ရ။
ၜိုပ် မၞုံကဵုဇဲလွဳ၊ ၜိုပ် မဂံင်သ္ကာ၊ ၜိုပ် မအဲပရဲ ကော်ဂး တဆိပ်ကြာ ဝဳရဟံသာဝွံ ဥက္ကဌဇၞော်ဂုဏ်တၟေင် နာဲထဝ် မန် (စုတိပြဟ်လလုဲ) ကေင်က္လိဂွံလဝ်အလန်ကိုပ်ကၠာအိုတ်တုဲ အလန်ဏအ် ဥက္ကဌဇၞော် နာဲဟံသာ က္လိဂွံမရနုက်ကဵု ၜါတၠရ။
ဥက္ကဌဇၞော် ဗော်ဍုင်မန်တၟိ နာဲဟံသာဝွံ ဒက်လဝ်ဘဝသ္ရိကၟိန် ကုမိညုင် ဇာတိကွာန်လှာၜိုပ်၊ ပွိုင်ဍုင်လှာ ဒကှ်၊ ခရိုင်မတ်မလီုတုဲ က္လိဂွံလဝ်ကောန်ဇာတ် (၅) တၠ၊ တြုံ (၃) တၠ၊ ကောန်ဗြဴ (၂) တၠရောင် ဂွံတီကေတ်ရ။
