မုက်လိက်သၟတ် (ဝါ) တၠုၚ်လအာသၟတ်တ္ၚဲဏအ်
============================
“တၞောဝ်ဒတောဝ်တၟိတအ်ဂှ် ဒၟာနူဂွံအခေါၚ်မံၚ်လ္တူပၞးညးဇၞော်တအ်တုဲ ပဵုတုဲ ဍေံတအ်ညာတ်သ္ၚောဲရ။” ဣဏအ်ဂှ် ဒှ်ဂလာန် တၠပညာဂမြၚ်ညာဏ် “အိုၚ်သက်နယူတာန်”ရ။ လ္တူလညာတ်ဏအ် ပိုဲသွက်ဂွံဒးဆက်သဳကၠဳအာနွံပၠန်ရောၚ်။
လၟုဟ် ဗီုပြၚ်လဵု တၠပညာရဲသ္ၚဳဂၠိပ်ပရူသၟတ်တအ် ညာတ်မံၚ်လ္တူသၟတ်တ္ၚဲဏအ်ဂှ် သဳကၠဳရံၚ်ကၠာစိုအ်။ စပ်ကဵု ပရေၚ်သၟတ်တုဲ အဓိက လညာတ်တၠပညာတအ်နွံမံၚ်ၜါဗီုရ။ မွဲဂှ် ဒှ်လညာတ်ဟွံဂွံသောၚ်စိုတ်လ္တူသၟတ်တအ်တုဲ မွဲဂှ် ဒှ်လညာတ်ထံက်ဂလာန်ကု သၟတ်တအ်ပေၚ်ၚ်ရ။
လညာတ်ညးဟွံဂွံသောၚ်စိုတ်ကုသၟတ်တအ် ဟီုဂှ် သၟတ်တ္ၚဲဏအ်ဂှ် မိုဒေဝ်ဟွံမွဲ၊ မေတ်ယှေန်ကၠေံ၊ အတ္တဇၞော်(No Model၊ Lost Mission and Egocentric)ဒၟံၚ်ရောၚ် ဗီုဏအ်ညးတအ်ထံက်ထ္ၜးရ။ လ္တူလညာတ်ဏအ်ဂှ် ဂကောံတၠပညာသှေ်မွဲဂှ် ဟွံစှေ်စိုတ် ဒစဵုဒစးရ။
လညာတ်ဏအ် ဒှ်လညာတ် ရံၚ်သၟတ်တအ် နကဵုမတ်မၞိဟ်ဇၞော်ဇၞော်တအ်ရောၚ်တုဲ ပွမရံၚ်ဗီုဏအ်ဂှ် ဟွံမွဲကဵုဗဗွဲဓဝ်ရ။ ဇေတ်တ်တေံ တၠုၚ်လအာသၟတ်တ္ၚဲဏအ်ဂှ် သၠုၚ်ၜက်စိုပ်မံၚ် ကဆံၚ်မၞိဟ်ဇၞော်ဇၞော်တအ် ဗက်ဟွံ ဂတာပ်ရောၚ် ဂးရ။
မိုဒေဝ်ဟွံမွဲ (No Model)ဟီုဂှ် မိက်ဂွံသ္ဂးဗီုလဵုရော။ ဒးကလေၚ်သ္ၚဳဂၠိပ် ပရူ Model ဏအ်စေံစေံထေက် ဂးရ။ (ဒၞာဲဏအ် မိုဒေဝ်ဟီုဂှ် ဟွံမိက်ကဵုညာတ်အာ ကောန်သၟိၚ်ဗြဴထ္ၜးရုပ် မိုဒေဝ်တအ်ရ။ ဗွဲတၟေၚ် ပရေၚ်ပူဂဵု/အရာ ပိုဲမၞိဟ်တအ် ကဆံၚ်ဒးကေတ်ပတောံ၊ ဒးသ္ပအစာံဟေၚ် မိက်သ္ဂးရ။) ယဝ်ပိုက်တမ်ဂၠဲါရိုဟ်မ္ဂး လက်သန် ပ္ဍဲကဵု Model ဂှ် ကလေၚ်ပါ်တိတ်အာၜါဗီုရ။ မွဲဂှ် အိုၚ်ဒဝ်(Idol)၊ ၜါဂှ် အိုၚ်ဒဳလ် (Ideal) ရ။ ၜါဏအ် ဗီုပြၚ်ဍေံ ဟွံတုပ်ညး သ္ကအ်ရ။
Idol ဟီုဂှ် ဒှ်အရာ စိုတ်သ္ဍိုက်မၠိုက်ဂြိုဟ်ချဳမွဲရ။ ဥပမာ အဃောအဝဲသၟူလေၚ်တေံ ဗီုဂြိုဟ်ချဳဒၟံၚ်ကဵု ကဝေၚ် ဇြဟာန်ဇကု၊ နူဂှ်ဇၞော်တိုန်ညိ ဗီုသ္ဍိုက်မၠိုက်ကဵုဇြဟတ်ဒးစိုတ်တိုန်ကဵု ညးဒယှ်တှ် ညံၚ်ရဴသၟာဒယှေ်ဒွက်၊ သၟာဝေၚ်ဇြဟတ်တအ်ဂှ်ရောၚ်။ ဣဏအ်ဂှ် ဒှ်သဘာဝ စိုတ်မၞိဟ်ဍောတ်တ်တအ်ဟေၚ်ရ။ စိုတ်ဗီုဏအ်ဂှ် အခိၚ်တေံ လေဝ်နွံ အခိၚ်လၟုဟ်လေဝ်နွံရ။ မုလေဝ်တၞဟ်ခြာဟွံမွဲရ။ အခိၚ်တေံတှေ် “မန်ထဝ်ကျာၚ်၊ မန်ဆာန်၊ ဇြဟာန်မန်” အခိၚ်လၟုဟ်တှေ် “ဆာန်ညဳဆာန်၊ သိုက်ဟံသာ၊ အဗ္ဘဏ်၊ ဆန္ဒ” သာ်ဏအ်ဟေၚ် တၟေၚ်တၞဟ်ခြာအာရ။
Ideal ဟီုဂှ် ဗီုဂှ်ဟွံသေၚ်။ ဇြိုဟ်နက်နူဂှ်ဏီရ။ ဒှ်အရာ စိုတ်ရှေ်သှေ်သ္ဍိုက်မၠိုက်မွဲရ။ တုပ်ပၟာညံၚ်ရဴ အဃောအဝဲကောန်ၚာ် ဗီုရှေ်သှေ်သ္ဍိုက်မၠိုက်ကု မိမဇကုတအ်ဂှ်ရ။ ဂွံတိုန်အာယုက်ညိမ္ဂး ဗီုစိုတ်ရှေ်သှေ်သ္ဍိုက်မၠိုက် မံက်တိုန် လ္တူက္ဍိုပ်သ္ကိုပ်ပရေၚ်ဂကူ၊ က္ဍိုပ်သ္ကိုပ်ပရေၚ်ဍုၚ်ကွာန်၊ က္ဍိုပ်သ္ကိုပ်ပရေၚ်ဘာသာတအ်ဂှ်ရောၚ်။ ဟီုမွဲနဲပၠန်မ္ဂး စိုတ်ဓါတ်သ္ပအစာံ၊ ကေတ်ပတောံ နူပူဂဵုမွဲမွဲ၊ အရာမွဲမွဲဇကုမရှေ်သှေ်သ္ဍိုက်မၠိုက်မံၚ်တအ်ဂှ်ရောၚ်။
စိုတ် Ideal ဗီုဏအ်ဂှ် ယဝ်တၟော်ရံၚ်ပ္ဍဲဗွိုၚ်သၟတ်တ္ၚဲဏအ်မ္ဂး ညံၚ်ကဵုကၠေံမံၚ်ကွေံကွေံဒးဟီုရ။ ဆ္ဂး ဂွံဒှ် အာဗီုဏအ်ဂှ်လေဝ် ယဝ်ပၠေတ်စုတ်ဒုဟ် သၟတ်တအ်သၟးမ္ဂး ဟွံဓဝ်ယာ။ ဗွဲတၟေၚ်ပ္ဍဲအရာဏအ် မၞိဟ်ဇၞော်ဇၞော်တအ် လေဝ် တာလျိုၚ်နွံကီုတုဲ ပဲါက္ဍိုပ်ဟွံဂွံရောၚ် ဗီုဏအ် ညးတအ်ကလေၚ်ထံက်ထ္ၜးရ။
မွဲပၠန်ဂှ် ပရူသၟတ်တအ် တိုၚ်ပ္ကဴရန်တၟအ်ကၠေံ မေတ်ယှေန်(Mission)ကၠေံ။
ရံၚ်ကဵုပိုဒ်တၠုၚ်လအာသၟတ်တအ်တ္ၚဲဏအ် ဒဒှ်ရသ္ၚောဲစ္ဍးသာဲခြာမံၚ် နူဗွိုၚ်ပရေၚ်ဍုၚ်ကွာန် (Apolitic Trend) ဏောၚ်ဂှ်တုဲ ဖျေံဏာတၟော် မေတ်ယှေန်ကၠေံ ဒှ်မာန်ရ။ စပ်ကဵုကိစ္စဏအ်တုဲ တၠပညာညးမထံက်ဂလာန်လပါ်သၟတ်တအ်ဂှ်လေဝ် ညးတအ်ဟွံဒစဵုဒစးရ။ ဆ္ဂး ညးတအ်ဟီု သၟတ်တ္ၚဲဏအ်ဂှ် စဵုကဵုကဆံၚ်စိုတ်အိုတ်အာကဵု ပရေၚ်ဍုၚ်ကွာန်သွက်ညးလောက၊ သွက်ညးဟလိုၚ် ဂွံခိုဟ်စဂှ်လေဝ်ဟွံသေၚ်။ ဓဝ်ပတှေ်ဟွံမွဲလေဝ်ဟွံသေၚ် ဂးရ။ ဗွဲတၟေၚ် သံသယဇၞော်တိုန်ကဵု လ္တူရဲမကၠောန်မံၚ်၊ ဂကောံမကၠောန်ၜိုတ်မံၚ်ပရေၚ်ဍုၚ်ကွာန်နတဲတအ်ဂှ်ဟေၚ်ရ။
ပ္ဍဲလညာတ်သၟတ်တအ်မ္ဂး ပရေၚ်ဍုၚ်ကွာန်တ္ၚဲဏအ်ဂှ် ဆၜိုတ်ပကောံဝေၚ်မၞိဟ်၊ ဟလိုၚ်ဝေၚ်အရေဝ်၊ ဟလောဲဏာဟလောဲနၚ်မံၚ်ဟေၚ် ဒှ်မံၚ်ရ။ ညိဓဝ်မှ ဟွံသၟဟ်ကဵု ကာလခေတ်ဇၟောဝ်ဍာ် ကွတ်ပရိုၚ် IT ရောၚ် လညာတ်နွံရ။ ဟီုမွဲနဲပၠန်မ္ဂး ဇြိုၚ်တိုန်စိုတ်ကဵု နဲကဲကၠောန်ပရေၚ်ဍုၚ်ကွာန်ဟေၚ်ရ။ ရံၚ်ကဵုပိုဒ်ဏအ်တုဲ ယဝ်ဟီု သၟတ်တအ် သာဲခြာစ္ဍးအာနူကဵုရေၚ်ဍုၚ်ကွာန်ဣရ (Apolitic Trend)ဟီုမ္ဂးတှေ်လေဝ် ဟီုမာန်ရ။ ဆ္ဂး သၟတ်တအ် စဵုကဵုစိုတ်အိုတ်ဒစဵုဒစးအာကဵုပရေၚ်ဍုၚ်ကွာန် (Anti Politic) လးလးဂှ်ဟွံသေၚ် ဂးရ။
လ္တူပရေၚ်ဏအ် ဒးချပ်ထေက်မွဲပၠန်ဂှ် ပရူ အိုၚ်ဒဳယဝ်လိုဂျဳ (Ideology)ရ။ ကာလပိုဲဟီုဂး သဘဴဓဝ်ပရေၚ် ဍုၚ်ကွာန်မ္ဂး အခန်အိုၚ်ဒဳယဝ်လိုဂျဳဏအ် ဒးပါကၠုၚ်မံၚ်နွံရ။ လၟုဟ်ဂှ် ဒှ်မံၚ်ကာလ အိုၚ်ဒဳယဝ်လိုဂျဳထောၚ်ပြိုဟ် သရိုဟ်စှေ်မံၚ်ဒှ်တုဲ အိုၚ်ဒဳယဝ်လိုဂျဳဂကူလဵုလေဝ် ဗိုန်န်ဗတ်တ်ရပ်ကေမ်ကေတ်လဝ်ဟွံထေက်ဂှ် ဒှ်သဘာဝရ။ ယဝ်ဒးဟီုမ္ဂး လေတ်ဗရဴဒဳမဝ်ကရေဇြဳ (Liberal Democracy) မဒှ် အိုၚ်ဒဳယဝ်လိုဂျဳခေတ်လက္ကရဴအိုတ်ဏအ်ဂှ်လေဝ် ပတှေ်စဂွံပေၚ်ၚ်ဟွံသေၚ်ရ။ မုဟိုတ်ရောဟီုမ္ဂး ၚုဟ်မး (Value) လေတ်ဗရဴဒဳမဝ်ကရေဇြဳဂှ် ၜိုန်ဒုၚ်တဲပတှေ်ဂွံကီုလေဝ် ဖဵုပိုန်ပူဂဵုဍေံ မဂၠုက်မံၚ်လက္ကရဴတေံဂှ် ဒးမၚ်ဗဵုမံၚ်ဏီဖိုဟ် ဒးဟီုရ။
ဟဒှ်သၟတ်တအ် ချပ်စၚ်ခြၚ်၊ သၠေဟ်ပၟာပ္တိတ်သၟာန်ဗီုတအ်ဏအ်၊ ဟဒှ်အိုၚ်ဒဳယာသၟတ်တအ် မပ္တဝ်အာမံၚ် ဗီုတအ်ဏအ်ဂှ်ဟေၚ် ဒှ်မေတ်ယှေန်သၟတ်တအ်မာန်ဏောၚ်ထေၚ်ကေတ်ရ။
တၚ်လဝ်ယၟု မေတ်ယှေန် ဒုတ်တ်မွဲတုဲ ဓၟံက်မံၚ်ရုပ်ရဴ က္ဍိုပ်ဟွံမာန်သၞေဝ်၊ သၞေဝ်ဟွံမာန်က္ဍိုပ် ဗီုကၠာကၠာတေံဂှ် ဟွံသေၚ်ရရောၚ်။ ဖန်ဗဒှ်ကၠုၚ် မေတ်ယှေန် မွဲဒကုတ်မွဲဒကဴရ။ ဂကူမေတ်ယှေန်ဏအ်ဂှ် မေတ်ယှေန်ပူဂဵု (Personal Mission)လေဝ် ညးကော်စရ။
“လောကဏအ် မုက္တဵုဒှ်မံၚ်ရော” ဂှ်ဟွံကဵုဖျုန်၊ “မုအဲကၠောန်ကဵုမာန်ရော” ဂှ်ဟေၚ် စွံအဓိကရ။ ဟွံညာတ်ဒုဟ် လ္တူလောကဟွံမွဲကဵုအရပ်အရာတအ်ဂှ်တုဲ မွဲအခိၚ်ဓဝ် ဇၞောဝ်ပၟဝ်ပ္တိုန် အစောံစရာဲဍာ်ဒ္ကေဝ်ဇကု စဵုကဵု စိုပ်ကၞောတ်စိုပ်တိုၚ်ပ္ကဴရ။ ဟီုဇေတ်တ်တှေ် သၟတ်တအ်တ္ၚဲဏအ် မေတ်ယှေန်ကၠေံမံၚ်ဟွံသေၚ်ရ။ ဗွဲတၟေၚ် ဗီုပြၚ် လစွံစိုတ် ညာတ်လ္တူမေတ်ယှေန်ဂှ် ဟွံတုပ်ညးသ္ကအ်ရ။ နဲကဲ သ္ၚဳမၠာ်မေတ်ယှေန်တအ် ပြံၚ်သၠာဲအာဟေၚ် ဒှ်မာန် ရောၚ် ဂးရ။
တၚ်ထံက်ထ္ၜးလက္ကရဴအိုတ် စပ်ကဵု သၟတ်တအ် အတ္တဇၞော် (Egocentric) ဝွံ--
ပရေၚ်ပါ်ပဲါစပ်ကဵု သၟတ်တအ် အတ္တဇၞော်ဟီုဂှ် ရံၚ်ကေတ်မ္ဂး ဒုၚ်သ္ဇိုၚ်ကဵု သၟတ်နွံမံၚ်ပ္ဍဲဍုၚ်ပံက် ဗွဝ်ဖျာတၟိတၟိတုဲ အံၚ်ဇၞးမံၚ်တအ်ဒှ်မာန်ရောၚ်ထေၚ်ကေတ်ရ။ သၟတ်တအ်ဏအ်ဂှ် မ္ၚးနူ “သြန်” တုဲ မုလေဝ် စိုတ် ဍေံတအ်ဟွံလုပ်စရ။ ရံၚ်ကဵုပိုဒ်ဏအ်တုဲ သၟတ်တအ်ဏအ်ဂှ် ဒှ်သၟတ် “တၞောဝ်ဒတောဝ်သြန်” (Cash Generation)၊ သၟတ် “တၞောဝ်ဒတောဝ်အတ္တ” (Self Generation)ရောၚ် ဗီုဏအ်လေဝ် ထ္ၜုတ်ကော်ခဴကၠုၚ်နွံရ။
“ သၟတ်တ္ၚဲဏအ်ဂှ် တုပ်ပၟာညံၚ်ရဴ ညးစုတ်လဝ်ဒ္ၚောဝ်မတ်ချေံ၊ ဂြိပ်ဂှ်ဂြိပ်မံၚ်ဖိုဟ် ဆ္ဂးဟွံညာတ်ပွဳူရ” ဗီုဏအ် ညးလ္ၚဵုပါ်ပဲါနွံရ။ လ္ၚဵုပၠန် “သၟတ်တ္ၚဲဏအ် မတ်ဍေံတအ်ရံၚ်စဂၠေံလောန်တုဲ ဟွံညာတ်သ္ၚောဲသ္ၚောဲရ” ဗီုဏအ်လေဝ် ညးလ္ၚဵုဟွံဂွံသောၚ်စိုတ်နွံရ။
လတူဒဒှ်ဏအ်လေဝ် တၠပညာညးရံၚ်လ္ပါ်သၟတ်တအ် ဟွံမိက်ဒုၚ်တဲ ဒစဵုဒစးပၠန်ရ။ ညးတအ်ဟီု ပ္ဍဲခေတ် ကွတ် IT ဏအ် ဟွံဒးကေတ် တေဝ်လဳသကောပ် (Telescope) (ပၠံၚ်ရံၚ်ဇမ္ၚောဲ)ရ။ မိုက်ခရိုသကောပ် (Microscope) ဟေၚ် နွံပၟိၚ်မံၚ်ရောၚ် ဂးရ။ သၟတ်တအ်ဂှ် ဍေံတအ်ဟဒှေ်မံၚ်ကဵု ကွတ် IT ရရဒှ်တုဲ ဂၠးကဝ်တ္ၚဲဏအ် ဂှ် ဍေံတအ်လးဖျေံဗဵုရံၚ် ပ္ဍဲခုၚ်ဗှ်လိက်ဍေံတအ်မာန်မံၚ်ဣရရောၚ် ဂးရ။
ဣဏအ်ဂှ် ဒှ်မုက်လိက်တၠုၚ်လအာသၟတ်ပ္ဍဲဂၠးကဝ်ပိုဲတ္ၚဲဏအ်ရောၚ် ဟီုမာန်ရ။
မုက်လိက် တၠုၚ်လအာ သၟတ်မန်ပိုဲတ္ၚဲဏအ်ဂှ်ရော?။ ညးချူလိက်ဏအ် ဟိုတ်နူဒှ်တၠပညာမွဲဟွံသေၚ်တုဲ ဂွံပ္တိတ်သွဟ် ထ္မံက်ထ္ၜးကဵု တၠုၚ်လအာသၟတ်မန်ပိုဲတ္ၚဲဏအ်ဂှ် ဒှ်ဟွံမာန်ရ။
ဆ္ဂး သၟတ်မန်ပိုဲလေဝ် တၞီလုပ်မံၚ်ပ္ဍဲအဝေါၚ်သၟတ်ဂၠးကဝ်ပိုဲရဒှ်တုဲ အသိၚ်အလိုန် သၟတ်ဂၠးကဝ်ဂှ် လုပ်ခ္ဍဳလျတ်အာ ပ္ဍဲသၟတ်မန်ပိုဲမွဲနဲမွဲဗီုမာန်ရ။ တၠုၚ်လအာ သၟတ်ဂၠးကဝ်တအ် ဒၞာဲလ္ၚဵု ကြပ်မံၚ်ညးသ္ကအ်ကဵုပိုဲ၊ ဒၞာဲလ္ၚဵုဒှ်မွဲထပ်ကု သၟတ်ပိုဲတအ်လေဝ်နွံမာန်ရောၚ် ချိၚ်ဆကေတ်ဂွံရ။ ဆ္ဂး အရာပိုဲဟွံမွဲကုအဝဵုဂှ် ဒၞာဲတုပ်ကဵုညးဂၠးကဝ်တအ်မှ တုပ်မာန်ရောၚ်ဂှ် ဟွံဒးဒှ်သၠေဟ်ပၟာရ။
ဒုၚ်သ္ဇိုၚ်ကဵုမတ်ဂကူပိုဲတုဲ ယဝ်ရံၚ်မ္ဂး ဝၚ်ဂကူမကဵုလဝ်တာလျိုၚ်ကု မၞိဟ်ဇၞော်ဇၞော်တအ်တ္ၚဲဏအ်ဂှ် ခြာဟွံလအ် မ္ဒးပအပ်ပြာပ်ကဵုသၟတ်တအ် ဗွဲဨကန်ရ။ တၠုၚ်လအာသၟတ်ပိုဲတ္ၚဲဏအ်ကဵု တၚ်နွံပၟိက်ဂကူပိုဲတ္ၚဲဏအ်ဂှ် ၜိုတ်လဵုကြပ်မာန်၊ ဗီုလဵုဗ္ဂပ်ဖျပ်မာန်ဂှ် ဒှ်သွဟ် သွက်ကံကုသဵုပိုဲ အနာဂတ်ဟေၚ် ဒးဟီုရ။
အတိုၚ်ညးချူလိက်ဏအ် ပံက်လဝ် နိဒါန်လိက် နကဵု သဘဴဓဝ် “အိုက်သက်နယူတာန်” မဟီုလဝ် “တၞောဝ်ဒတောဝ်တၟိတအ်ဂှ် ဒၟာနူဂွံအခေါၚ်မံၚ်လ္တူပၞးညးဇၞော်တအ်တုဲ ပဵုတုဲ ဍေံတအ်ညာတ်သ္ၚောဲရ။” ဂှ်မ္ဂး ဒှ်လက်သန်ခိုဟ် သွက်အနာဂတ်ပိုဲရောၚ်ဟီုမာန်ရ။
ပြသၞာဂကူပိုဲ မၞိဟ်ဇၞော်ဇၞော်တအ်သောၚ်မံၚ် ဟွံဂွံ၊ ဟွံတုဲဒှ်ဏီတအ်၊ အခက်အခုဲ မၞိဟ်ဇၞော်ဇၞော်တအ်ဓမံက်မံၚ်ရုပ်ရဴ သွက်တိုၚ်ပ္ကဴပိုဲ ဟွံစိုပ်တရဴဏီတအ်ဂှ် ဗီုလဵုသ္ဂောံသောၚ်ကၠောန်ၜိုတ်ဓၟံက်အာရုပ်ရဴမာန်ဂှ် သၟတ်တအ် ပဵုတုဲ တီဂၠိုၚ်၊ ညာတ်သ္ၚောဲဒၟံၚ်ရောၚ် မိက်ဂွံသ္ဂးရ။
ဇၟာပ်သၟတ်မန် ကဵုဂွံရေၚ်တၠုၚ် ကၠောန်ကမၠောန်မန်ညိအဴ။
ဂံၚ်သ္ကာ (၂၀/၁၂/၂၂)
(လိက်ဝွံ ရန်တၟအ်ကဵုပ္တိုန်စရာဲ သွက်တ္ၚဲသၟတ်မန် မရနုက်ကဵု (၁၁)ဝါ တုဲ ဖန်ဗဒှ်လဝ်ရောၚ်။)
တၚ်ပ္တိုန်သမ္တီ
(လိက်ဝွံ ကံက်နုက်လဝ် နူလိက် “ကျော်ဝၚ်း၊ ဦးနှောက်မုန်တိုၚ်းဆၚ်ခြၚ်း” တုဲ ဗ္ဂပ်ဖျပ်လဝ်ကု လညာတ်ညးချူ လိက်ရ။)
