မေ (၁၅) ဏအ် ကဝ်လိက် ကောန်ဂကူမန် ကၟာတ်စရၚ် ဒုၚ်တဲကွးဘာရောၚ်

 မေ (၁၅) ဏအ် ကဝ်လိက် ကောန်ဂကူမန် ကၟာတ်စရၚ် ဒုၚ်တဲကွးဘာရောၚ်

====================================

သွက်သၞာံဗ္တောန်ပညာ သၞာံ ၂၀၂၃-၂၀၂၄ ညးမမိက်ကတ်လ္ၚတ်ပညာ ပ္ဍဲကဝ်လိက် ကောန်ဂကူမန်တအ် ဂွံဂြၚ်ပ္တီ အာတ်လုပ်မာန်တုဲ စပ္တံနူ ဂိတုအေဗရဴ မလောန်ကၠုင်တုဲတေံ ကော်ဘိက်ဒုင်တၠုင်မံင် ကွးဘာတၟိတအ်ရ။ 

နကဵုတၞးလိက် ဂမြင်ပ္တီအာတ်မိက်အခေါင်လုပ်သှ် (Application form) ဂှ် ကွးဘာတအ် ဒးဗေၚ် ပလံၚ်ပစိုပ် ဒၞာဲကဝ်လိက်မန် မစၞောန်လဝ်တုဲ နူဂှ် မွဲကဆံၚ် နူဘာတေံ ကလေၚ်ရုဲစှ်တုဲ ညးမကလိဂွံ အခေါၚ်တိုန်ကဝ်လိက်မန် သွက်သၞာံဗ္တောန်ပညာဏအ် ညးတအ် ကလေၚ် လလောၚ်ကဵု ပၠန်ရ၊

 

ခြာဟွံလအ် ဂိတုမေ စၟတ်တ္ရဲ (၁၅) ကလဳတေံမ္ဂး နူကဵုကဝ်လိက်ကောန်ဂကူမန် (Mon National College) တအ် ကၟာတ်အာစရင်တၞးလိက်ဗပေင် (Application) ဒုင်တဲကွးဘာတၟိ သွက်သၞာံဗ္တောန်ပညာ ၂၀၂၃-၂၄ ရောၚ်မဒှ်ရ။

 

တ္ရဲကၟာတ် တၞးလိက်ဗပေင် (Application Form) ဒုင်တဲကွးဘာတၟိဂှ် ညောန်ကြပ်ကၠုင်ဗွဲမလောန်ရတုဲ ညးညးအဲအဲ ဟွံဂွံဗပေင်ဏီကီု၊ ဗပေင်လဝ်တုဲကီု ယဝ်ရသှ်ေသၟေဟ်ဒၟံင်နွံမ္ဂး ဗွဲမဂတာပ်အခိင် ညံင်ဂွံ ပလံင်ဗစိုပ်ကဵုမာန်ဂှ် နူကဝ်လိက်ကောန်ဂကူမန် (Mon National College) ထပ်ဆဝ်ဗ္ရုဟ်လဝ်နွံရ။

 

နွံပၟိက်တၞးလိက် သွက်ဂွံသှ် အခေါင်လုပ် ကဝ်လိက်ကောန်ဂကူမန်မ္ဂး အာစိုပ်ဇရေင် ရုင်ဌာန ပရေင်ပညာ ကောန်ဂကူမန် (မတ်မလီု၊ ညဳသာ) ကဵုဒှ်၊ ရုင်ဆက်ဆောံ ဗော်ဍုင်မန်တၟိကဵုဒှ်၊ လုပ်စိုပ် မုက်လိက်လပှ်ကျာ ကဝ်လိက် ကောန်ဂကူမန် https://www.facebook.com/monnationalcollege တုဲ ဂၠောင်ဂြဲဖျေံ (Download) ကဵုဒှ် အာတ်မိက် ချူဗပေင်မာန်ရ။

 

ချူဗပေင်တင်နင်မၞုံပၟိက် ဍိုက်က်ပေင်င်တုဲမ္ဂး ဇရေင်ရုင်ဌာနပရေင်ကောန်ဂကူမန် (မတ်မလီု၊ ညဳသာ) ဟွံသေင်မ္ဂး ရုင်ဆက်ဆောံ ဗော်ဍုင်မန်တၟိကဵုဒှ်၊ နကဵုအဳမေလ် info@moncollege.org ကဵုဒှ် ပလံင်ဗစိုပ်ကဵု မာန်ရောင် နူကဝ်လိက်ကောန်ဂကူမန် လလောင်တြး လဝ်ရ။

 

ကုညးအာတ်မိက်ဂှ် ဂိတုမေ စၟတ်တ္ရဲ (၂၀) တေံမ္ဂး ကၠောန်သ္ပအာ ပေါဲစမ်ၜတ်ဍာ်ဒကေဝ် ကေုာံ သၟာန်သှ် (Interview) ရောင်။ ညးက္လိဂွံအခေါင်တိုန် ကဝ်လိက်ကောန်ဂကူမန်တအ်မ္ဂး ဒးကတ်ဗ္တောန်အာပညာ ပွိုင် (၃) သၞာံတုဲ ကဝ်လိက်အာစိုပ်ဒတုဲမ္ဂး ဒးက္လေင်ကေတ်တာလျိုင် ဆဵုဂဗပရေင်ကမၠောန် ပွိုင် (၂) သၞာံရောင်။

 

ကဝ်လိက် ကောန်ဂကူမန်ဏအ်ဂှ် စပံက်ဗ္တောန်ကၠုင်လဝ် နူကဵုဂိတုဒဳဇြေမ်ဗါ၊ သၞာံ ၂၀၂၂ တေံတုဲ လၟိဟ်ကွးဘာ ဗၞတ် (၃၀၀) တၠ တိုန်စိုပ် ကတ်လ္ရတ်မံင်ဖိုဟ်ရောင် ဂွံတီကေတ်ရ။

 

ရန်တၟအ်ကဵု သွက်ဂွံလွဳၜံင်ပ္တိတ် တမ်ရိုဟ်မၞိဟ်နဲခိုဟ် အပ္ဍဲကောန်ဂကူမန်တုဲ နကဵုသၞောတ်ပညာက္ဆံင်သၠုင်ဂှ် နူကဵုကဝ်လိက်ကောန်ဂကူမန် ပံက်ဗ္တောန်ကဵုဒၟံင်ဘာသာ Social Science, Mass Media and Journalism, Leadership and Management, Education Teaching, Education Management ကေုာံ Mon Literature အပံင်ဖအိုတ် ၆ ဘာသာနွံရ။

 

သွက်သၞာံဗ္တောန်ပညာ ၂၀၂၃-၂၄ ဏအ်မ္ဂး စပ်ကဵုသွာင်ပရေင်ထတ်ယုက် ဘာသာ Nursing လေဝ် ထပ်ဂလိုင်ပ္တိုန်လဝ် မွဲဘာသာနွံပၠန်တုဲ ကဝ်လိက် အာစိုပ်ဒတုဲမ္ဂး အပ်ပြာပ်ကဵုတဆိပ်ကြာ (Associate Degree of Art) ရောင် ဂွံတီကေတ်ရ။

ပရိုၚ်ဍုၚ်မန်တၟိ