တၠအဝဵုပၞာန်ဗၟာ သရိုဟ်စှေ်မှ ဍုၚ်မန်မံက်ဂတဝ်ဟာ
ဒဵုဗျု
ဂိတုနောဝေမ်ဗာ ၆၊ တ္ၚဲသ္ၚိသဝ်၊ ၂၀၂၁
တၠအဝဵုပၞာန်ဗၟာ သရိုဟ်စှေ်မှ ဍုၚ်မန်မံက်ဂတဝ်ဟာ? ဂလာန်ဝွံ အဲသၟာန်ရံၚ်ဇကုအဲသာ်ဝွံတုဲ အဲကလေၚ်ဂၠာဲရံၚ်သွဟ် သွက်ပုစ္ဆာ အဲကဵုအဲဂှ်တုန်၊ “ဟွံသေၚ်” အဲဓရိုက်က္ဍိုပ်ရ။ ဒှ်သာ်ဂှ်မဂး သာ်လဵုဂွံဖန်ရော ကလေၚ်စမ်ၜတ်ရံၚ်ဗဟုသုတညာန် ပညာ ပရေၚ်ဆဵုဂဗဇကုပၠန်ရ။ အခန်ဝွံ ဗော်ပၠန်ဂတးရခေၚ်တအ်၊ ယူဒဗယူအိတ်သ်အေတအ်ဂှ် လညာတ်ညးတအ်ဂှ် ညး တအ်ဗတိုက်သအးတၠအဝဵုပၞာန်ဗၟာဟွံသေၚ်ရ။ ဆဂး ရခေၚ်တအ် ဒှ်ကၠုၚ်မံၚ်ပေဲါဗတိုက်ကဵုဗၟာတအ် ဇၞော်အိုတ်မွဲတုဲ သီုဒး ဒုၚ်ကေၚ်ထ္ၜုတ်ကၠုၚ်ယၟု နဒဒှ်ဂကောံပလီုပလာ် ကော် ထေဝ်ရဝ်ရေတ်ဏီရ။ အခိၚ်ညးတအ် ဒးဒုၚ်ထ္ၜုတ်ကော်သာ်ဂှ် တၠအ ဝဵုဒပ်ပၞာန်ဗၟာတအ်ဟေၚ် ဖျေံလဝ်သဂုတ်သွာတ်ဟွံသေၚ်၊ ဗွဲတၟေၚ် အံၚ်ဆာန်စုကျဳတအ်၊ ရဲဗော်အေန်အေဝ်ဒဳတအ်ကီု ၊ က္ဍိုပ် သကိုပ်ဗော်ဗၟာတၞဟ်ဟ်တအ်ကီု သီုဒပ်ပၞာန်ဗၟာတအ်ကီုရ။ ကောန်ဍုၚ်အရၚ် နွံပ္ဍဲကၠတ်ထဝ်တအ်လေဝ် မူပကဵုဟွံမာန်၊ တာဒၞာကဵုဟွံမာန်ရ။ အခိၚ်ဂှ် ကၠတ်ထဝ်တအ် ဖျေံလဝ်သဂုတ်သွာတ်ရောၚ် ဟီုမဂး ကၠးဂၠိုၚ်ရ။ ဒှ်သာ်ဂှ်မဂး ပိုဲသ္ပအဓိ ကဗ တိုက်မံၚ်တၠအဝဵုဒပ်ပၞာန်ဗၟာဂှ် သာ်လဵုဂုန်ဖဵုမဇၞော်ရော။ ရခေၚ်ကဵုဝတအ်ဂှ် ညးတအ်ဟွံစွံလဝ်စိုတ် ဗၟာတအ်ဂှ် နဒဒှ်သၞ ဒတန် ကဝ်ညးတအ်ရ။ ဂုန်ဖဵုဂကူညးတအ်နွံမဂး ပံၚ်အာတုဲ ဂုန်ဖဵု ဟွံမွဲမဂး ဟွံပံၚ်ရ။ ယဝ်ကဵုကၠုၚ်အန္တရာဲညးတအ်မဂး ညးတအ်စဵုဒၞာ ဒဵုအိုတ်လမျီုရ။ တ္ၚဲရ ဒပ်ပၞာန်ဗၟာတအ်ဂှ် ဟွံကဵုအန္တရာဲကုညးတအ်မဂး တ္ၚဲဂှ် ညးတအ်ဟွံစၟတ်သမ္တီ နဒဒှ်သၞညးတအ်မွဲရ။ အေ အေတအ် ဟီုပတိတ်လဝ်ဂှ် အဟိန်ဗတိုက်ဂှ် ဒက်ပတန် မဒှ်ရ။ အခိၚ်လၟုဟ်ဝွံ ဟိုတ်နူပေဲါဗတိုက်ကဵုဗၟာတအ်ဟွံမွဲဂှ်တုဲ ညးတအ် သ္ပအဓိကကဵုဒက်ပတန်အဝဵု ပမာညံၚ်ရဴ မလလောၚ်တရးတဴ အဝဵုညးတအ် ပ္ဍဲတိဍာ်ဍုၚ်ရခေၚ်ညးတအ်ဂှ်ရ။ လၟုဟ် ဝွံ အဝဵုဂကောံရခေၚ် မဒုၚ်သဇိုၚ်ကဵုအေအေတအ်ဂှ် တဴအာနူကဵုကောန်ဍုၚ်အရၚ် ညံၚ်ရဴကရေၚ်၊ ကချေၚ်တအ်ဏီရောၚ်။
ပ္ဍဲကာလဝွံ ဂွံဆဵုကေတ်မၞိဟ်မွဲဂှ် ပတိုန်လဝ်ပ္ဍဲပတ်ညးတေံ စပ်ကဵုအဝဵုပိသာ်မတွံဂး “ကုတ်သၞောဝ်ဒန်သၞောဝ်၊ ခၞံသၞောဝ်၊ စဳရေၚ်ဂဗုတ်၊ အုပ်ဓုပ်” ပိပြကာဏံဂှ် ဒှ်အဓိကရောၚ်ဂး။ အဝဵုပိဏံ ဂွံစိုပ်ပ္ဍဲသကေံတဲပိုဲဂှ် သာ်လဵုပိုဲဒးကၠောန်သ္ပရော။ ဒးကဵုဥ ပမာမွဲမဂး ပ္ဍဲဇကု သြန်နွံကဵုပြကောတိကိုတ်မဂး ဗွဲအလဵုဇကု ဟီုဂး အဲဂှ် ဒှ်မဳလဳယာန်နာမွဲရောၚ်ဂွံရ။ ယဝ်ရနွံ ကဵုအ သၚ် ဃဲယံၚ်မဂး ဗွဲအလဵုဇကု ထ္ၜုတ်ဟီု အဲဂှ် ဗဳလဳယာန်နာမွဲရောၚ်မာန်ရ။ ဟွံပတှေ်မဂး ထ္ၜးကဵုဗီုညာတ်မာန်ရောၚ်။ ညး တၞဟ် တအ် သ္ပသမ္တီကဵုဒှ် ဟွံသ္ပကဵုဒှ် ဟွံဒှ်အဓိက၊ အဓိကဇေတ်တ်ဂှ် သြန်ဇကုနွံဍာံဍာံမဒှ်ရ။ တုပ်သာ်ဂှ်ကီုရ ပ္ဍဲဇကု အဝဵုပိပြကာဏံ ညံၚ်ဂွံနွံဂၠိုၚ်ၚ်ဂှ် ဒးဂစာန်၊ ဇြဟတ်ပိဏံဂွံနွံဂၠိုၚ်ဂှ် ဇကုဒးဖျေံဗီုပြၚ်ရ။ အစောန်စရာဲဖျေံဗီုပြၚ်ဗၟံက်ရုပ်ရဴဇကုခိုဟ်မဂး ဒးဟီုစ အ လဵုအသဳဇကုခိုၚ်ကီု ခိုဟ်ကီုရ။ အဝဵုပိပြကာဏံ ရောဟ်ရေၚ်မံၚ်၊ ဟွံခိုဟ်ဆာဲဏီမဂး ဒးသၟိတ်ဂး အလဵုအသဳဇကု ရောဟ်ရေၚ် ဟွံခိုဟ်ဆာဲဏီရ။
ယဝ်ရဒးဟီုကဵုဥပမာမွဲမဂး ပ္ဍဲတိဍာ်ဗော်ဍုၚ်မန်တၟိတဴဂှ် ပရေၚ်အုပ်လဒမ်သၞောဝ်နွံဂၠိုၚ်မံၚ်ဟာ၊ ယဝ်ရနွံဂၠိုၚ်မဂး အဝဵုပိပြကာဂှ် ခိုဟ်ဟီုမာန်ရ။ ယဝ်ရအောန်မဂး အဝဵုဟွံဗျာပ်တရးဏီရောၚ်ဒးဟီုရ။ ရဲတန်တဴပ္ဍဲဗွိုၚ်တိဍာ်ဗော်ဍုၚ်မန်တၟိတအ် ဂွံကၠောန်ဂယိုၚ် အာလမျီု ၜိုဟ်ဟ်သြိုဟ်ဟ်၊ ဒှ်ကၠုၚ်အမှုဂဗုတ်မဂး ညးတာလျိုၚ်တအ် စဳရေၚ်ကဵုဓဝ်ဝ်တြာတြာ၊ ဍုၚ်ကွာန်ညးတအ် မံၚ်တန် တဴဂှ်လေဝ် ကမၠတ်ဒမၠအောန်၊ ဂွံတိက်မံၚ်ၜိုဟ်ဟ်သြိုဟ်ဟ်၊ ဒှ်ကၠုၚ်ယဲဘဲလေဝ် ညးတအ်ရံၚ်စံၚ်ကဵုပေၚ်ၚ်ရောၚ်မဂး အဝဵုပိ တန်ဂှ် ခိုၚ်မံၚ်ခိုဟ်မံၚ် ဗွဲယျေဘူယျ ဟီုမာန်ရ။ ဍေံဂွံဒှ်ကၠုၚ်သာ်ဝွံမာန်ဂှ် ပိုဲဒးဗတိုက်သရိုဟ်ဖျေံတၠအဝဵုပၞာန်ဗၟာကၠာရောၚ် ဟီု ဟွံဂွံရ။
မွဲသာ်ပၠန်ဂှ် အလဵုအသဳဟီုဂှ် ဒှ်ညးကေတ်အကံက်အခေါန်မွဲရ။ အကံက်ဂှ်ရ ဒးကလေၚ်ကၠောန်ပလေဝ်ဍုၚ်ကွာန်ရောၚ်။ ဌာ နအကံက်အခေါန်ညးတအ် ညံၚ်ဂွံခိုၚ်ဂၠိုၚ်ၚ်ဂှ် ဒးဂိုတ်ဂစာန်တုဲ သတ်ပၟဝ်ဇဝ်ပကဴဍေံဂှ် ညးတအ်ဒးကလေၚ်ပလေဝ်ဍုၚ်ကွာန် ညံၚ်ရဴလွဳလွတ်ဂဥုဲ၊ ပလေဝ်ဂၠံၚ်ဍာန်၊ လဟဵုပတိုန်ပရေၚ်ပညာ မပ္တံသာ်ဝွံရ။ ဌာနအကံက်အခေါန်ဟွံခိုၚ်မဂး ဍုၚ်လဵုမွဲ ကလိဂွံ အလဵုအသဳခိုဟ်ဟ်ဟွံမာန်ရ။ ဂွံဇနော်ပတိုန်အလဵုအသဳဂှ် ဒးဒုၚ်သဇိုၚ်ကဵုအကံက်ရောၚ်။ ဗွိုၚ်ကေတ်အကံက်မာန်တအ်ဂှ် ဒးဇနော်သၠဲပတိတ်ဍေံ ဒးပခိုၚ်ပတိုန်ဍေံ ဒးသၠုၚ်ပတိုန်အသိၚ်ဍေံ ဒးပခိုဟ်ပတိုန်နဲကဲဍေံရောၚ်။
မွဲလပါ်ဂှ် ဇကုကေတ်အကံက်၊ မွဲလပါ်ဂှ် ဇကုကေတ်လျိုၚ် ကုညးမကဵုအကံက်တအ်ဂှ်မဂး ဍေံဒှ်ကၠုၚ်ဗီုပြၚ်အလဵုအသဳရောၚ်။ ဟွံကေတ်အကံက်လေဝ် ဇနော်ပတိုန်အလဵုအသဳဟွံမာန်၊ ကေတ်အကံက်တုဲ ဟွံဒုၚ်လျိုၚ်ကဵုမၞိဟ်ကဵုအကံက်တအ်ဂှ်လေဝ် ဒတုံမံၚ်ညံၚ်မၞိဟ်ဂၠေံသြန်တုဲ ဟွံကလေၚ်လေဲကဵုရ။ မၞိဟ်ကဵုအကံက်တအ်ဂှ် ညးဍုၚ်ကွာန်သီုဖအိုတ်မဒှ်ဂှ်တုဲ၊ မၞိဟ်သီုဖအိုတ် မတၞီလုပ်လၟိဟ်သီုမၞိဟ်ကၠောန်ကမၠောန်ပ္ဍဲအလဵုအသဳမဒှ်ဂှ်တုဲ အကြာကဵုကဵုကေတ်ၜါဏံ ညံၚ်ဂွံပြေပြံၚ်ဂှ် ဒှ်ဖျေံဗီုပြၚ်ရ။ ယဝ်ဒး ထ္ၜးဥပမာမွဲကြပ်ပ် ပ္ဍဲဗွိုၚ်ဗော်ဍုၚ်မန်တၟိမဂး တၠကၠအ်သွဝ်တအ် တၠဆေၚ်ဖျာတအ်၊ ကမ္ပဏဳတအ်ဂှ် ဒးကဵုအကံက်ဂှ်တုဲ ဗီု လဵု ညးတအ်ဂွံကဵုအကံက်နကဵုနဲကဲဒးဒးရးရးကီု၊ ဂတာပ်ခေတ်ကီုဂှ် လပါ်ညးတာလျိုၚ်ဗော်ဍုၚ်မန်တၟိတအ် ဒးဖန်ဇန်ရ။ ၜိုတ်အဲ ဍဟောဝ်စိုပ်မဂး ညးတအ်အာဗက်ကေတ်ပ္ဍဲကၠအ်တအ်ဂှ် ပ္ဍဲဆေၚ်တၠဖျာတအ်သၟးဂၠိုၚ်တုဲ နကဵုလိက်ကဵုဗစိုပ်တၠဆေၚ်ဖျာ၊ တၠကၠအ်တအ်တုဲ ကဵုညးတအ်ဗစိုပ်နၚ်ဇရေၚ်ရုၚ်ဇကုဂှ် အောန်လောန်လေဝ်ဒှ်မာန်၊ ဟွံမွဲဏီလေဝ်ဒှ်မာန်ရ။ တၠကၠအ်တအ်ဂှ်၊ တၠဆေၚ်ဖျာတအ်ဂှ် စိုပ်အခိၚ်မဂး၊ ကလိဂွံလိက်အကံက်တုဲမဂး ညးတအ် ဒးအာကဵုပ္ဍဲရုၚ်တအ်ဂှ်ရ။ အခန်ဏံမွဲ ယဝ်ရ ဖျေံဗီုခိုဟ်ဟ်မဂး သြန်အကံက်တအ်ဂှ် ဂွံမံၚ်တၟာဂလိုၚ်ရ။ အခန်ဗော်ဍုၚ်မန်တၟိ ဒးကေတ်တာလျိုၚ်စပ်ကဵုဂီုကၠီု အုပ်လဒမ် သၞောဝ်ဂှ် ဒုၚ်သဇိုၚ်ကဵုညးဍုၚ်ကွာန်တအ် အာတ်မိက်တအ်ဂှ်တုဲ ဖ္ဍိုက်ဗပေၚ်ကဵုမာန်ကီုရ။
ဂလာန်အဲမပတိုန်ထ္ၜးသာ်ဝွံဂှ် ဗၞတ်ညိညဓဝ်ဟေၚ်ရ။ နကဵုဥပမာဍောတ်တ်မွဲရ။ ဍေံဒးဒှ်ထေက်ဂှ် ပညာစပ်ကဵုကေတ် အ ကံက်အခေါန်၊ လညာတ်မကေတ်လျိုၚ်ကဵုညးဍုၚ်ကွာန်တအ်ဂှ် သၠဲလးဗျာပ်တရးလောန်ဂှ်တုဲ တန်တဴကဵုအဝယ်ဗွိုက်အလဵုအ သဳဂှ်တုဲ ဒးဖန်အာရောၚ်။ ဂွံလ္ၚတ်ကေတ် ဗော်ဍုၚ်မန်တၟိ ဗက်ဒုၚ်မံၚ်ဒါန် ပ္ဍဲဍုၚ်သေံကီု ဍုၚ်တၞဟ်ဟ်တအ်ကီုဂှ် ပရေံဟွံသေၚ်၊ ဆဂး ကမၠောန်အုပ်ဓုပ်အလဵုအသဳဟီုဂှ် ဒးသ္ပအဓိကကဵုမၞိဟ်မတန်တဴမံၚ်ပ္ဍဲတိဍာ်ဇကုဂှ်တုဲ၊ သယံဇာတမတိတ်နူတိဍာ်ဇ ကုတအ်ဂှ်လေဝ် ညံၚ်ဂွံဒှ်သြန်ဖအုံဇကုဂှ် ဒးပတိတ်ဇြဟတ်ကီုရ။ အဝဵုအုပ်ဓုပ်ဇကုခိုၚ်မဂး အလဵုအသဳဇက၊ု ဂကောံအလဵုအ သဳဇကုခိုၚ်ကၠုၚ်ရ။ ဗော်ဍုၚ်မန်တၟိဂှ် အလဵုအသဳဟွံသေၚ် ၜိုန်ရခၠေဝ်မာန်ကီုလေဝ် ဆဂး ဍေံဒးဒှ်အလဵုအသဳဟေၚ်ရ။ ယဝ်ရ အလဵုအသဳဟွံသေၚ်မဂး ပိုဲဟီုဂကောံကမၠတ်ဒမၠမတာ၊ ဂကောံတံၚ်ဂြဲရပ်မၞိဟ်တုဲ အာတ်သြန်ဂးဟာ။ ဗီုပြၚ်ညးတအ် မဒက် ပတန်လဝ်ဂှ်ဂမၠိုၚ်ကီု၊ ဗီုညးတအ်အုပ်ဓုပ်ကၠောန်မံၚ်ကမၠောန်ဂမၠိုၚ်ကီု၊ ရန်တၟံညးတအ်ကီုဂှ် ဍေံဒှ်မံၚ်ဗီုပြၚ်အလဵုအသဳရောၚ်။ ဌာနအုပ်ဓုပ်ညးတအ်၊ ပညာ၊ ထတ်ယုက်ညးတအ်၊ ကမၠောန်သ္ပစၞးဂကူမန်တုဲ မကၠောန်မံၚ်တအ်၊ ဒုၚ်ဂိုၚ်ကေတ်ညးတအ် သီုဖအိုတ်တအ်ဂှ် ဍေံသ္ပမံၚ်အဓိကကဵုဂုန်ဖဵုဂကူပိုဲရောၚ်။ ဥပမာမွဲဂှ် ကောန်ဗော်မွဲမွဲဂှ် ယဝ်ရဟွံပေၚ်စိုတ်တုဲ အာထံက် ၜံၚ်ကဵုသၞမဂး အာပအပ်ဇကုရဂွံမာန်၊ ကေတ်ဏာလွဟ်ဟွံဂွံရောၚ်၊ လွဟ်ဂှ် လွဟ်ညးဍုၚ်ကွာန်ရောၚ် သာ်ဝွံ ညးတအ်ဒုၚ် ဂိုၚ်ကေတ်လဝ်အိုတ်ရ။ ပ္ဍဲအခိၚ်ကာလကပ်ယဲဝွံဂှ်လေဝ် ဌာနထတ်ယုက်ညးတအ် ပံၚ်ဗစပ်ကဵုဂကောံအလဵုအသဳဍုၚ် သ အာၚ်တအ်ကီု၊ ယူအေန်ကီုတုဲ ချဳဒရာၚ်မံၚ်ဂှ် ဂွံညာတ်ကေတ်အိုတ်ရ။ တုပ်သာ်ဂှ်ကီု ဌာနပညာညးတအ်လေဝ် ပံၚ်ဗစပ် ကဵုယူအေန်ကီု၊ အလဵုအသဳဍုၚ်သအာၚ်တအ်ကီုတုဲ ချဳဒရာၚ်မံၚ်အိုတ်ရ။ ကမၠောန်တအ်ဝွံ ဒှ်ကမၠောန်ဗီုပြၚ်အလဵုအသဳမွဲဟီု မာန်ရောၚ်။
ပ္ဍဲအရာပိုဲပတန်အဝဵုဂကူပိုဲဂှ် သၞကဵုမိတ်ၜါသာ်ဏံ ပိုဲဒးပါ်ဒးရ။ သၞလၟိုန်လေဝ်ဟွံမွဲ မိတ်လၟိုန်လေဝ်ဟွံမွဲ၊ အဓိကဂှ် ဂုန်ဖဵုဂကူ ဟေၚ်ရ။ ဂကူဗၟာဂှ် သၞပိုဲလၟိုန်ဟွံသေၚ် မိတ်ပိုဲလၟိုန်လေဝ်ဟွံသေၚ်ရ။ အခိၚ်ဂုန်ဖဵုဂကူနွံဂှ် ဒှ်မိတ်တုဲ အခိၚ်ဟွံမွဲဂှ် ဒှ်သၞလေဝ် ဒှ်မာန်ရ။ သၞဗွဲပရေၚ်ဍုၚ်ကွာန်လေဝ်နွံ၊ သၞဗွဲပရေၚ်ပၞာန်လေဝ်နွံပၠန်ရ။ အခိၚ်လၟုဟ်ဏံ ပိုဲပတန်အဝဵုဂကူပိုဲမဂး ပိုဲဒးသ္ပတိုၚ် ကဵုဗော်ဍုၚ်မန်တၟိဟေၚ်ရ။ ဆဂး လညာတ်တအ်ဂှ် တၞဟ်ဟ်သာ်နွံမာန်ရောၚ်။ ယဝ်ရဒးလုပ်ပေဲါဗတိုက်ပ္ဍဲပါလဳမာန် ပမာညံၚ်ရဴ မတုဲကၠုၚ်တေံမဂး ဗော်ပရေၚ်ဍုၚ်ကွာန်ပ္ဍဲဂှ် ဒှ်အဓိကရောၚ်ဟီုမာန်ရ။ ဂကူဗၟာဂှ် ဒှ်သၞအဓိကပိုဲလၟိုန်ဟွံသေၚ်၊ စိုပ်မွဲတ္ၚဲ ဂကူ တၞဟ်ဟ်တအ် ညံၚ်ရဴကရေၚ်တအ်ဂှ် ဒှ်သၞမုက်ဂၞန်မွဲမာန်တဴကီုရောၚ်။ ဆဂး တန်တဴကဵုအကာဲအရာတုဲ ဒးဟီုဂးအာရောၚ်။ ပိုဲရံၚ်အာဍုၚ်ကြုက်ကဵုအမေရိကာန်မဂး ကိုပ်ကၠာတေံ ၜိုန်ရဍုၚ်ကြုက်ကဵုအမေရိကာန် ဟွံဒှ်သၞကီုလေဝ် လၟုဟ်ဝွံ ဟိုတ်နူ ပရေၚ်ပိုန်ဒြပ်တုဲ ဒှ်အာသၞမုက်ဂၞန်မွဲညးသကအ်အိုတ်ရ။
ပ္ဍဲအရာပိုဲပတဝ်က္ဍိုပ်ကဵုဂကူပိုဲ ဒက်ပတန်အဝဵုပိတန် ဍေံမဒှ်လက်သန်အလဵုအသဳဂကူမွဲမွဲဂှ် လွဟ်လေဝ်ဒးနွံပ္ဍဲတဲ၊ ပေဲါဗတိုက် ပရေၚ်ဍုၚ်ကွာန် ပ္ဍဲပါလဳမာန်လေဝ် ဒးကော်ဆဴအာရောၚ်။ ပ္ဍဲကဵုလညာတ်တၠဂုန်အစာရာဝိက မဟီုသောၚ်ကလးလဝ် မဟွံ လအ်ကၠုၚ်ဏံဂှ် ဗီုပြၚ်ဒပ်ပၞာန် ကေုာံ အုပ်ဓုပ်ကရေၚ်တအ်ဂှ် ဍေံဒှ်မံၚ်အန္တရာဲကဵုဂကူပိုဲအနာဂတ်ဇၞော်ဇၞော်ရောၚ်။ ပဝ်လ ဇြဳဂကူ ကရေၚ်ညးတအ်လေဝ် ကၠေဟ်မံၚ်ကဵုပိုဲတအ်ရ။ တိဍာ်အုပ်ဓုပ်ပိုဲကဵုညးတအ်လေဝ် ထပ်မံၚ်ညးသကအ်ရ။ ဟိုတ်ဂှ်တုဲ ညး တအ်ကဵုပိုဲဂှ် သွက်ဂွံဒှ်သၞဇၞော်ဇၞော်နွံတဴဏီရ။ တိဍာ်ဍုၚ်မန်ပိုဲဂှ် ညးတအ်သ္ပလဝ်တိဍာ်ညးတအ် ကြပ်အိုတ်မံၚ်ဂှ်တုဲ အနာ ဂတ်ဏံ ပဲါဟွံဗၠး ဍေံဒးဒှ်သၞညးသကအ်မာန်ရောၚ်။ ဇြဟတ်ပၠန်ဂတး ကေုာံ ပရေၚ်ဍုၚ်ကွာန်ညးတအ်ကီု ဇြဟတ်တၞဟ်ဟ် တအ်ကီုလေဝ် ဍေံတဴမံၚ်ဗွဲမဂၠိုၚ်ဏီရ။ စပ်ကဵုကိစ္စဏံဂှ် အလဵုဇကုအစာဟံသာ ဗော်ဍုၚ်မန်တၟိလေဝ် ဟီုပတိတ်မံၚ်ဓဝိၚ် ညးတအ် ဟွံလအ်ဟွံလအ်ကီုရ။
ဟိုတ်ဂှ်ရ လညာတ်မဂး တၠအဝဵုပၞာန်ဗၟာသရိုဟ်စှေ်မဂး ဍုၚ်မန်မံက်ဂတဝ်ဂှ် ဒးကလေၚ်ကူချပ်သ္ၚဳဂၠိပ်ရောၚ်။ အဝဵုပိုဲ အလဵု အသဳပိုဲ တိဍာ်အုပ်ဓုပ်ပိုဲ တ္ၚဲရစိုပ်ကၠုၚ်ပ္ဍဲသကေမ်တဲပိုဲတုဲ ပိုဲပစူအလာံပိုဲ ပ္ဍဲကရောံဍုၚ်ဗော်သွးဂၠးတိမာန်မဂး တ္ၚဲဂှ်မဂး ပိုဲဟီုစ ဍုၚ်မန်မံက်ဂတဝ်ရောၚ်။ ဒှ်တ္ၚဲနွံကဵုစရာဲကျာ်သြဳပိုဲ ပ္ဍဲလိုက်ဝွံရောၚ်။ အကြာဏံ အန္တရာဲခက်ခုဲဆိုအ်ဗတအ်ဂှ် နကဵုကောန်ဂ ကူပိုဲသီုဖအိုတ် ဒးတဝ်စၞေဟ်ပြိုၚ်ပကာန်အာရောၚ်။
ဗီု၊ရုပ်၊လိက်>>>အ အာpage https://www.facebook.com/553586998172295/posts/1767304723467177/
