ဘာပရေင်ပညာကောန်ဂကူမန်ဂှ် ဒၞဲါပံက်ဘာဂွံဂှ် ပံက်အာတုဲ ဒၞဲါပံက်ဟွံဂွံဂှ် နကဵု Home Base Learning သွက်ဂွံဗတောန်အာနွံ

ဘာပရေင်ပညာကောန်ဂကူမန်ဂှ် ဒၞဲါပံက်ဘာဂွံဂှ် ပံက်အာတုဲ ဒၞဲါပံက်ဟွံဂွံဂှ် နကဵု Home Base Learning သွက်ဂွံဗတောန်အာနွံ

ပရိုင်အခေတ်မန် ၊ ဝှ် (၁၃) စွေက်

ဟိုတ်နူကောန်ကွးဘာတံ ဟွံဂွံထပက်ဂဥုဲစဵုဒၞါ ယဲ Covid19 ဏီတုဲ ဟွံဂွံပံက်ဏီကီု ပ္ဍဲကာလဒးကၟာတ်လဝ်ဘာဏံ သွက်ဂွံဗတောန်လ္ၚတ်အာပ္ဍဲသ္ၚိ Home Base Learning ဂှ် စဳဇန်လဝ်ရောင် ကမ္မတဳပရေင်ပညာ ကောန်ဂကူမန် မိကြက်နန်ဟီုရ။

" ဘာမန်ပိုဲဂှ် ကွးဘာပိုဲဟွံဂွံထပက်ဂဥုဲစဵုဒၞါဏီ ပိုဲလေဝ်ဟီုလဝ် ပိုဲပံက်မံင်ကီုရ ၊ ကၠာပိုဲဟွံဂွံပံက်ဏီ ထပက်ကဵုဂဥုဲစဵုဒၞါတုဲမှ ပိုဲဒှ်ပံက်ဏောင် ၊ တုဲတ်ှေ မွဲပၠန်ဂှ် ဘာပိုဲနွံမံင်သၟဝ်တဲ ခရိုင်ညးကဵုညး ခရိုင်ထွာဲ , ခရိုင်မတ်မလီု , ခရိုင်သဓီုဟီုတ်ှေ နူခရိုင်တံဂှ် ညးတံဆက်စၞေါန်ဏောင် ဘာဏံတ္ၚဲလဵုပံက် ၊ နကဵုပိုဲဂှ် သၠောဲလဝ်ကဵုခရိုင် တန်တဴကဵုအကာဲအရာ ဒေသညးကဵုညးတုဲ ညးတံပံက်ကီုဏောဝ် ၊ မွဲပၠန်ဂှ် ကောန်ၚာ်ပိုဲ ပိုဲကဵုလဝ်စရင်ဖိုဟ်ရ ဆဂးဟွံဂွံထပက်ဂဥုဲစဵုဒၞါဏီ ဘာအလဵုအသဳဂှ် ထပက်တုဲ ဘာပိုဲဂှ် ဟွံဂွံထပက်တုဲဏီ လ္ၚဵုဂှ် ထပက်တုဲ လ္ၚဵုဂှ် ဟွံဂွံထပက်ဏီ ၊ ဒေသလ္ၚဵုဂှ် ထပက်ဂဥုဲစဵုဒၞါတုဲ ညးတံပံက်ဘာ " ညးဟီုရ။

" ပိုယ်ဂှ် ကဵုလဝ်စရင်တုဲယျ ဂွံထပက်ဂှ် ပိုဲမင်မံင် စရင်ကွးဘာ နူတွဵုရးမန်ဂှ် (၆) ပွိုင်ဍုင် ၊ နူတွဵုရးကရေင် ပွိုင်ဍုင်လှာဒကှ် တေံတ်ှေ ညးတံကေတ်အဆက်တုဲ ထပက်ဏောင် ၊ ပ္ဍဲရးဒေသတနင်ဩဳ ပွိုင်ဍုင်ဍာ်ဗုတေံ ထပက်လဝ်မွဲအလန်တုဲယျ ၊ တွဵုရးညးကဵုညး ကဵုလဝ်စရင်တုဲမံင်ရ ဟွံဂွံစိုပ်အလန်ပိုယ်ဏီ " ညးဟီုရ။

" ဟွံဂွံထပက်ဂဥုဲစဵုဒၞါဏီလေဝ် ဒၞဲါဒေသယဲအး ယဲလေဝ်အောန် ညးတံလေဝ်ဟွံထုဲကဵုမ္ၚးဏောင်ဟီုတ်ှေ ခရိုင်ညးကဵုညး ညးတံဇန်တုဲ ကဵုအခေါင်ပံက်ဏောင် " ညးဟီုရ။

" ပိုဲဂှ် ပံက်ဘာလၟုဟ်ဏံ ၜိုန်ရဘာပိုဲဟွံဂွံပံက်ကီုလေဝ် နကဵု Home Base Learning ပိုဲလ္ၚတ်ကေတ်ပ္ဍဲသ္ၚိ နဲဏံဂှ် ပပ္တံနူ ဂိတု November ဏံ ပိုယ်ထမံက်ရုပ်ရဴ ယဝ်ပိုဲပံက်ဘာ ဟွံဂွံဏီတ်ှေ‌ ပိုဲဇန်လဝ်နွံ ၊ ယဝ်ပံက်ဘာဂွံတ်ှေ ပိုယ်ပံက်အာကီုဏောင် ဒၞဲါပံက်ဟွံဂွံဂှ် ပိုယ်အာကဵုနဲ Home Base Learning ၊ ကောန်ၚာ်ဂှ် မွဲတ္ၚဲတ်ှေ ပွိုင် (၁) နာဍဳ ၊ (၁) သတ္တတ်ှေ (၅) နာဍဳ ဒးဆဵုကဵုကောန်ၚာ်ဂှ် ၊ တုဲတ်ှေ ကောန်ၚာ်ဂှ် ဍေံလ္ၚတ်ကေတ်ပ္ဍဲသ္ၚိ ဍေံ‌ကၠောန်ကေတ်ပ္ဍဲသ္ၚိတုဲ ဍေံကၠောန်လဝ်တုဲတံ အ္စာဂှ် ဒးဗက်အာကေတ်တုဲ ဍေံကၠောန်လဝ်ၜိုတ်လဵု ဍေံကၠးၜိုတ်လဵု ပိုယ်ၜတ် ဍာ်ဒကေဝ် အပ္ဍဲဏံ ပိုယ်ဗတောန်အာကဵု (၄) ဘာသာ ဏောင် မန် , ဗၟာ , အေင်ကလိက် , ဂၞန် ၊ မုဒှ်ရောဟီုတ်ှေ ကောန်ၚာ်ဂှ် လဍေံကၠောံတန် ယးသၞာံ လဍာ်ဒကေဝ်ဍေံစိုပ်တ်ှေ ဂွံဆက်စပ်ကဵုတန်ဂတတေံ " ညးဟီုရ။

" ပိုယ်ဂှ် ဇန်လဝ် ပံက်ဘာဂွံတ်ှေ ပံက်ဏောင် ပံက်ဘာဟွံဂွံတ်ှေ ပိုဲအာကဵု Home Base Learning ဏောင် အ္စာပိုဲဂှ် ကဵုလဝ်တန်ဗတောန်တုဲလေဝ်နွံ ၊ ဟိုတ်နူယဲတုဲ ဟွံဂွံကဵုတန်ဗတောန်လေဝ်နွံ သွက်ကွးဘာပိုဲဂှ် အဝဲဍေံ ကဵု တန်ဍေံ ညံင်ဂွံဆက်အာဂွံဂှ် ပိုယ်ဇန်လဝ်နွံ " ညးဟီုရ။

ဘာပရေင်ပညာကောန်ဂကူမန် မၞုံပ္ဍဲပရေင်ကောပ်ကာဲဗော်ဍုင်မန်တၟိဂှ် ဘာတန်သၠုင် ကောန်ဂကူမန် နွံမံင် (၃) ဘာ ၊ ဘာတန်လဒေါဝ် (၁၈) ဘာ ၊ ဘာတန်မူလ ကေုာံ တန်မူလလောန် (၁၁၁) ဘာ အပံင်သီုဖအိုတ် (၁၃၂) နွံရ။

CREDIT#ဘာပရေင်ပညာကောန်ဂကူမန် #ကမ္မတဳပရေင်ပညာကောန်ဂကူမန် #မိကြက်နန် #ပရိုင်အခေတ်မန် #Men3