ကဝ်လိက်ကောန်ဂကူမန် ထ္ပက် MoU ကု တက္ကသိုလ် Payap သွက်ဂွံပံၚ်တောဲအာ သွာၚ်ပရေၚ်ပညာကဆံၚ်သၠုၚ်

ကဝ်လိက်ကောန်ဂကူမန် ထ္ပက် MoU ကု တက္ကသိုလ် Payap သွက်ဂွံပံၚ်တောဲအာ သွာၚ်ပရေၚ်ပညာကဆံၚ်သၠုၚ်

===================================

ဂိတုပှော် ၊ ၁၄ စွေက် ၊ သၞာံ ၁၃၈၅။ ဂိတုဖေဖဝ်ဝါရီ ၈ ၊ သၞာံ ၂၀၂၄။

သွက်ကွ:ဘာ ကတ်လ္ၚတ်မံၚ် ပ္ဍဲဘာ ကဝ်လိက် ကောန်ဂကူမန် ဂွံက္ဍကၠောံ ဂါံစိုပ်အာ ကဆံၚ်ပညာ ဂၠ:ကဝ်မာန် ရန်တုဲ အပၞောတ်ရုန်ဂစာန်မံၚ် သွက်တက္ကသိုလ် ဍုၚ်သ္အာၚ်ဂမၠိုၚ် ဂွံသ္ပစၟတ်သမ္တီကု ဘာကဝ်လိက် ဂကူမန်မာန်ဂှ် တ္ၚဲဏအ် ဂွံကၠုၚ် ပေါဲအံၚ်ဇၞ: အလန်ကကိုပ်ကၠာအိုတ် ထ္ပက်ကၠုၚ် လိက်ကသုက် တၚ်တုပ်စိုတ် MoU ကု တက္ကသိုလ် Payap ဍုၚ်သေံ မာန်ကၠုၚ် မဒှ်ရ။

အခန်ကၞာ ထ္ပက်လိက်ကသုက် MoU အကြာ ဘာကဝ်ကလိက် ကောန်ဂကူမန် ကေုာံ တက္ကသိုလ် Payap ဂှ် ကၠောန်ဗဒှ်ကၠုၚ် ပ္ဍဲဍုၚ်ဇံၚ်မာဲ ကၟိန်ဍုၚ်သေံ ပ္ဍဲစၟတ်တ္ၚဲဏအ် ဂိတုဖေဖဝ်ဝါရဳ ၈ ၊ ပ္ဍဲတက္ကသိုလ် Payap ဂှ်ရ။

သ္ပစၞ:ကဵု ဌာနပညာဗဟဵု ဗော်ဍုၚ်မန်တၟိတုဲ လျိုၚ်ပညာလေဝ်ဒှ် ကေၚ်ကာဗော်ဍုၚ်မန်တၟိလေဝ်ဒှ် မိသာဍာ က္ဍိုက်ပ်တုဲ ည:စၞ:ဂမၠိုၚ်ပါလုပ် မွဲကရောံကီု၊ သီုဂအုပ်ဘာ ကေုာံ ဒုဂအုပ်ဘာ ကဝ်လိက် ကောန်ဂကူမန် နာဲပညာမန် ကေုာံ မိရတ်ဆာန်တအ် ပါလုပ် တိုန်စိုပ် အခန်ကၞာ ထ္ပက်လိက်ကသုက် MoU ဂှ်ရ။

အပ္ဍဲတၚ်တုပ်စိုတ်လိက်ကသုက် MoU ဂှ် ပါလုပ် တၚ် (၈) တၚ် မဒှ်တုဲ စပ်ကဵု − နတက္ကသိုလ် Payap သွက်ဂွံသ္ပ စၟတ်သမ္တီ စရာဲဍာ်ဒကေဝ် ကွ:ဘာကဝ်လိက် ကောန်ဂကူမန်ဂမၠိုၚ် နကဆံၚ် ည:ကတ်လ္ၚတ် တက္ကသိုလ် ကဆံၚ်သၠုၚ်တုဲ၊ သွက်ဂွံသ္ပစၟတ်သမ္တီ ပရေၚ်သၠောဲပြံၚ် စၟတ်ကွ:ဘာ (Credit Transfer) ၊ သွက်ဂွံဒုၚ်တဲ ကွ:ဘာ ကဝ်လိက်မန် ည:နွံပၟိက် မိက်ဂွံဆက်တိုန် တက္ကသိုလ် Payap တအ်ပါလုပ်ကီုရ။

ဆဂှ်သၟ: ဟွံက အကြာ တက္ကသိုလ် Payap ကု ကဝ်လိက် ကောန်ဂကူမန် သွက်ဂွံ ထမံက်အာ သၞောတ် Dual Degree ကေုာံ Join Degree ၊ အကြာ တက္ကသိုလ် Payap ကု ကဝ်လိက် ကောန်ဂကူမန် သွက်ဂွံသၠုၚ် ပတိုန် ပရေၚ်ပံၚ်တောဲ စပ်ကဵု နဲကဲတန်ဗ္တောန် ကေုာံ ကွတ်အုပ်ဓုပ် ကောပ်ကာဲ တက္ကသိုလ်၊ နတၚ်တုပ်စိုတ် ၜါ်လ္ပာ် သွက်ဂွံ ပံၚ်တောဲ ဓမံက်အာ ရုပ်ရဴ စပ်ကဵု ကမၠောန်ဖောအ်ဗြေဝ် ပညာ တၚ်နၚ် သာ်တအ်လဝ် ပါလုပ်မံၚ်ကီုရ။

ဘာကဝ်လိက် ကောန်ဂကူမန်ဂှ် ဒက်ပ္တန်ကၠုၚ် ပ္ဍဲသၞာံ ၂၀၂၂ ဂှ်တုဲ ပံက်လဝ်ဘာ ဗ္တောန်ကဵုမံၚ် ပ္ဍဲတိဍာ်ဗၠ:ၜ: ဗော်ဍုၚ်မန်တၟိအုပ်ဓုပ် ဗဒိုပ်ညဳသာတုဲ သွက်ဘာသာ (၆) ဘာသာ နကဆံၚ် Associate Degree ဂှ် ဗ္တောန်ကဵုမံၚ် နွံရ။

စပ္တံနူသၞာံ ၂၀၂၄ ဏအ်တုဲ ဘာသာ ဂဥုဲ (သူနာြပုသိပ္ပံ) မွဲဘာသာ ထပ်ဗပဵု လဝ်တုဲ လတူဘာသာဏအ် နကဆံၚ် ဒဳဂရဳ ပေၚ်ၚ် ညံၚ်ဂွံကဵုမာန်ဂှ် ဗ္တောန်ကဵုမံၚ် နွံကီုရ။

အကြာ ဌာနပညာ ကောန်ဂကူမန်၊ ကဝ်လိက် ကောန်ဂကူမန် ကေုာံ တက္ကသဵု ဇံၚ်မာဲ (Chiang Mai) တအ်ဂှ် ၜိုန်ရ ဟွံဂွံ ထ္ပက်လဝ် လိက်ကသုက် တၚ်တုပ်စိုတ် ဏီကီုလေဝ် ပရေၚ်ပံၚ်တောဲ သွာၚ်ပညာဂှ် ပံၚ်တောဲ ကၠောန်ၜိုတ်မံၚ် နွံမံၚ်တုဲ ညံၚ်ဂွံဂွံ တၚ်တုပ်စိုတ် ကဆံၚ် ထ္ပက်လိက်ကသုက် MoU မာန်ဂှ်လေဝ် အဃော ဂိုတ်ဂစာန်မံၚ် မဒှ်ရ။

ဆဂှ်သၟ:ဟွံက ကုတက္ကသဵု Purdue, Fort Wayne မၞုံကၟိန်ဍုၚ် အမေရိကာန်ဂှ် ည:တာလျိုၚ် ဌာနပညာ ကေုာံ ကဝ်လိက်တအ် အာလ္ၚတ်လဝ် ပ္ဍဲအမေရိကာန် ပ္ဍဲဂိတု သေပ်တေန်ဗာ သၞာံ ၂၀၂၃ တေံတုဲ ပ္ဍဲသၞာံ ၂၀၂၄ ဏအ် ညံၚ်ဂွံဂွံ တၚ်တုပ်စိုတ် သွက်ဂွံထ္ပက် လိက်ကသုက် မာန်ဂှ် အဃော ဂိုတ်ဂစာန်မံၚ် မဒှ်ရ။

ပရိုၚ်ဍုၚ်မန်တၟိ