ဗော်ဍုင်မန်တၟိ (ဗ္တိုက်သရိုဟ်တၠအဝဵုပၞာန်) ကၠောန်သ္ပပေါဲဆဵုဂဗကု ဂကောံနာနာ

ပ္ဍဲကဵုအခိၚ်ဗော်ဍုၚ်မန်တၟိ (ဗ္တိုက်သရိုဟ်တၠအဝဵုပၞာန်) ပေၚ် (၃)ဂိတု တုဲဂှ် တ္ၚဲဏအ် ကၠောန်သ္ပဏာအစဳအဇန် ပေါဲဆဵုဂဗကု ဂကောံနာနာဂမၠိုၚ် လ္တူလပှ်ကျာမွဲရ။ ပေါဲဆဵုဂဗဝွံ သ္ဂောံလဴကလး လၟေၚ်ကမၠောန်ဗော်ဍုၚ်မန်တၟိ (AD) ကု ဂကောံနာနာတအ်မာန်ကီု သ္ဂောံကလၚ်ရမျှာၚ် ကေတ်ကသပ်နူဂကောံနာနာတအ်မာန်ရန်တုဲ ကၠောန်ဗဒှ်ဏာလဝ်ရ။

ပ္ဍဲပေါဲဆဵုဂဗဂှ် ညးစၞးတိုန်စိုပ်ဂမၠိုၚ် နူဗွိုၚ်သၚ်၊ နူညးစၞးဂကောံနာနာအပ္ဍဲဍုၚ်မ္ၚးဍုၚ် (၃၀) ဂကောံ ကေုာံ ညးဘိက်ထေက်ဂမၠိုၚ် အပံၚ်သီုဖအိုတ် လၟိဟ် (၆၀)တၠပြၚ်တိုန်စိုပ်လဝ်ရ။ နူလ္ပါ်ဗော်ဍုၚ်မန်တၟိ (AD)ဂှ် ညးက္ဍိုက်ပ်ပရေၚ်ဍုၚ်ကွာန် ပရေၚ်ပၞာန်ဂမၠိုၚ်တအ်တိုန်စိုပ်လဝ်တုဲ ညးက္ဍိုပ်နာဲဇဲယ ဟီုဂလာန်ပံက်ပေါဲဆဵုဂဗ၊ ဒုညးက္ဍိုပ်(၁)နာဲဗညာလဴဂှ် သောၚ်ကလးအကာဲအရာပရေၚ်ချဳဒရာၚ်ပရေၚ်ဍုၚ်ကွာန်ဗော် ကေုာံ ဒုသ္ကိုပ်ပၞာန်စၠန်ထဝ်ဂှ် သောၚ်ကလးဏာ အကာဲအရာသွာၚ်ပၞာန် အပ္ဍဲပွိုၚ်တုဲကၠုၚ်(၃)ဂိတု ဏအ်ရ။ အပ္ဍဲပရေၚ်သောၚ်ကလးတအ်ဂှ် ဗီုပြၚ်တၚ်ဂွံဇြဟတ်တအ် တၚ်ကော်ဆောတအ်ဂှ်လေဝ် ပတိုန်ထ္ၜးဏာလဝ်နွံရ။

ကြဴနူညးတာလျိုၚ်တအ် သောၚ်ကလးပရေၚ်ဗော်ဍုၚ်မန်တၟိ (AD)တုဲ ညးစၞးဂမၠိုၚ်တအ် သၟာန်ကလးအကာဲအရာ ကေုာံ ရန်တၟအ်ကဵုပရေၚ်ဂုဏ်ဖဵုဂကူ၊ ဂုဏ်ဖဵုပၠန်ဂတးတုဲ ကဵုဏာလဝ်ကသပ်ကုဗော်နွံကၠုၚ်ရ။ ပေါဲဆဵုဂဗဝွံ ကၠောန်ဗဒှ်ဏာ ပွိုၚ် (၃)နာဍဳ စနူအခိၚ် နူဂယး (၈:၃၀) ဒဵုစိုပ် (၁၁:၃၀) နာဍဳရ။