သၞာံ ၂၀၂၄၊ ဂိတု ဖေဖဝ်ဝါရဳ (၂၂)
ည:မဒှ်ည:က္ဍိုပ်ကမ္မတဳဆက်ဆောံမဟာမိတ်၊ ဝန်ဇၞော်ဍုၚ်သ္အာၚ် ဒဝ်ဇြေန်မာအံၚ် နူအလဵုအသဳ NUG ကု ဂကောံ တအ်ဝွံ သွက်ဂွံဆက်ရေၚ်တၠုၚ်ပံၚ်တောဲကၠောန်ၜိုတ်အာ ပရေၚ်ကမၠောန်ပၠန်ဂတ:တအ်မာန်တုဲ တ္ၚဲဏအ် ဆဵုဂဗ လဝ်ကု ည:က္ဍိုပ်ဂကောံအာက္ဍိုပ်ပရေၚ်ဍုၚ်ကွာန်ပရေၚ်ပၞာန် ဗော်ဍုၚ်မန်တၟိ(ဗ္တိုက်သရိုဟ်တၠအဝဵုပၞာန်) နာဲဇဲယ ကေုာံ ဂကောံတအ် နကဵုအောန်လာၚ် ကိုပ်ကၠာတဲနွံရ။
ပ္ဍဲပေါဲဆဵုဂဗသဳကၠဳဂှ်ဝွံ လ္ပါ်ဗော်ဍုၚ်မန်တၟိ (ဗ္တိုက်သရိုဟ်တၠအဝဵုပၞာန်)ဂှ် ည:က္ဍိုပ်နာဲဇဲယ၊ ဒုည:က္ဍိုပ် (၁) နာဲဗညာလဴ၊ ဒုည:က္ဍိုပ် (၂) နာဲလျ:ဂကူ ကေုာံ ည:လျိုၚ်ဆက်ဆောံမဟာမိတ် နာဲဗညာမန်တအ် တိုန်စိုပ်တုဲ လ္ပါ်အလဵုအသဳ NUG ဂှ် ည:က္ဍိုပ်ကမ္မတဳဆက်ဆောံမဟာမိတ်၊ ဝန်ဇၞော်ဍုၚ်သ္အာၚ် ဒဝ်ဇြေန်မာအံၚ် ကေုာံ ဂကောံတအ်ကီု၊ နာဲနိုၚ်ထူအံၚ် ည:ကေၚ်ကာအပ္ဍဲ နူဌာနဝန်ဇၞော်ပရေၚ်စဵုဒၞာ ကေုာံ ည:မနွံတာလျိုၚ်တအ် တိုန်စိုပ်အိုတ်ရ။
က္ဍိုပ်သ္ကိုပ်ၜါလ္ပါ်တအ်ဝွံ သွက်ပရေၚ်သ္ဂောံဗ္တိုက်သရိုဟ်တၠအဝဵုပၞာန်ကဵု တၠအဝဵုအိုတ်သီုတအ်ကီု၊ ပရေၚ်သ္ဂောံဒက်ပ္တန် ကၟိန်ဍုၚ်ပံၚ်ကောံဖေတ်ဒရယ်ဒဳမိုကရေဇြဳတအ်မာန် နဒဒှ်မဟာမိတ်ဂှ် စပ္တံအပ္ဍဲအရာပရေၚ်ဍုၚ်ကွာန်၊ ပရေၚ်ပၞာန်၊ ပရေၚ်ကလုတ်တမာန်၊ ပရေၚ်ဘဏ္ဌာတအ် ညံၚ်ဂွံပံၚ်တောဲကၠောန်အာကမၠောန်မာန် ဂွံတၚ်တုပ်စိုတ်ည:သ္ကအ်တုဲ ပရေၚ်ပံၚ်တောဲကမၠောန်မဟာမိတ်တအ်ဂှ်လေဝ် ညံၚ်ဂွံဆက်သဳကၠဳအာည:သ္ကအ်လၟိုန်မာန် တုပ်စိုတ်ည:သ္အအ်အိုတ်ရောၚ် ဂွံတီကေတ်ရ။
No comments:
Post a Comment