ဘာလၟေၚ်ပရေၚ်ကမၠောန်အုပ်ဓုပ် လၟေၚ် (၃) အာစိုပ်ဒတုဲ ၊
ပရေၚ်အုပ်ဓုပ် ခရိုၚ်၊ ပွိုၚ်ဍုၚ်တအ် ခိုၚ်ကၟောန်ကၠုၚ်ရောၚ် စၟဳစလဝ်
======================
ပရိုၚ်ဍုၚ်မန်တၟိ၊ ဂျူလာၚ် ၁၄ ၊ ၂၀၂၃။
ဘာလၟေၚ်ပရေၚ်ကမၠောန်အုပ်ဓုပ် လၟေၚ် (၃) ပံက်ဗ္တောန်မံၚ် ပ္ဍဲဌာအုပ်ဓုပ်ဗဟဵု ဗော်ဍုၚ်မန်တၟိဂှ် ပ္ဍဲစၟတ်တ္ၚဲ (၁၄) ဂိတုဂျုလာၚ်ဂှ် အာစိုပ်ဒတုဲ မဒှ်ရောၚ် ဂွံပရိုၚ်ရ။
ပ္ဍဲဘာလၟေၚ်ပရေၚ်ကမၠောန်အုပ်ဓုပ်ဝွံ ဗွဲတၟေၚ် သွက်ဂွံသၠုၚ်စရာဲဍာ်ဒကေဝ် ပရေၚ်အုပ်ဓုပ် ကောပ်ကာဲကမၠောန် ၊ ကောပ်ကာဲဍုၚ်ကွာန် ကုသၞာဲဒဴ ကေုာံ ညးတာလျိုၚ် ယိုက်ဝန်ပ္ဍဲဌာနနာနာ ဗော်ဍုၚ်မန်တၟိတအ် ရန်တုဲ ပံက်ဗ္တောန်ကၠုၚ်ရောၚ်ဂှ် ညးလျိုၚ်ဌာနဇၞော် အုပ်ဓုပ်ဗဟဵု နာဲအေမန် ဟီုလဴကု ဌာန်ပရိုၚ် ဍုၚ်မန်တၟအ်ရ။
“ပ္ဍဲမွဲဒမြိပ် ဗော်ဍုၚ်မန်တၟိပိုဲ စပ်ကဵု သၠုၚ်စရာဲ သွက်သွာၚ်အုပ်ဓုပ်ဂှ် ဟွံကေၚ်ကၠောန်ကၠုၚ် မွဲလှေ်ပုဟ်၊ ညးတာလျိုၚ်တအ် သၞာဲဒဴတအ် စရာဲဍာ်ဒကေဝ် ပေၚ်မှလေဝ် မွဲကရောံကု ညးဍုၚ်ကွာန် ညးတအ် ဂွံဖန်ဖက် ဆန်ၜန် ပရေၚ်ဖောအ်ဗြေဝ် တဴတက်ဍုၚ်ကွာန်မာန်” သာ်ဝွံ နာဲအေမန် ဟီုရ။
ပ္ဍဲမွဲဒမြိပ်ဘာ ပွိုၚ်မွဲဂိတုဂှ် နက္ဍိုပ်လိက်မ္ဂး (၁၀) က္ဍိုပ်လိက် စပ်ကဵု ပရေၚ်ပညာ၊ ထတ်ယုက်၊ အကံက်အခေါန်၊ စရၚ်လၟိဟ်မၞိဟ်၊ ဂီုကၠီု၊ ဂြိုပ်ဆု ၊ ပြုပြေၚ်ဍုၚ်ကွာန် ကေုာံ ဖန်ဖက် ဖောအ်ဗြေဝ်ဍုၚ်ကွာန်၊ သြန်ဂအုံကွာန် ၊ သၞောဝ်ဓရ် ၊ ပရေၚ်စန်ဒက်ကေုာံ လလောၚ်ပရိုၚ် တအ်ဂှ် နနဲလဵု ညးတာလျိုၚ်ဗော်ကု ညးဍုၚ်ကွာန်တအ် ဗွဲမ ကိတ်ညဳ ဂွံဆန်ၜန် ကၠောန်ၜိုတ်အာမာန်ဂှ် နဲကဲနာနာ ၊ သဘဴဓရ်နာနာ တအ်ဂှ် နနဲသဳကၠဳ သၠဲဂတးလညာတ် ဂတးဂတန် ရေၚ်သ္ကအ် ဗ္တောန်လဝ်ကဵု နွံကီုရ။
မ္ၚးနူဂှ်ပၠန် ပ္ဍဲဘာလၟေၚ်ပရေၚ်ကမၠောန် အုပ်ဓုပ်ဝွံ ဗွဲတၟေၚ် မူဝါနာနာ၊ သၞောဝ်၊ စေဝ်ပၞောန်နာနာ ပ္တိတ်လဝ် နူဗော်ဍုၚ်မန်တၟိဂမၠိုၚ်ဂှ် ဗွဲတြး ညံၚ်သၞာဲဒဴ၊ ညးယိုက်ဝန်တအ် ဂွံတီ ဂွံသ္ပအစာံ ပ္ဍဲအရာစဳရေၚ်ကေၚ်ကာ အုပ်ဓုပ်တအ် ကေုာံ နဲကဲ အုပ်ဓုပ်ကောပ်ကာဲရုၚ် ၊ ကမၠောန် ၊ နဲကဲစရၚ်ဒဒၚ်တအ်ဂှ် ဗ္တောန်ကဵုလဝ်ရောၚ် ဂွံတီကေတ်ရ။
“အဓိကတှ်ေ က္လေၚ်ကၟောန်ပခိုၚ်ပတိုန် ဒးဟီုဟဂှ်လေဝ်၊ ဗော်ဖျေံလဝ်နွံမံၚ်ရ ၊ ပ္ဍဲဒၞာဲလ္ၚဵုတအ်ဂှ် ညးတာလျိုၚ် ကဆံၚ်ကဆံၚ်တအ် ကၠောန်ဗက်မံၚ် ဟွံစိုပ် ၊ ဟွံတီ ၊ ကၠောန်ဟွံဒး တအ်ဂှ် ၊ ညာတ်တိုန်ကၠုၚ် သ္ပဒး သတိတုဲ ပိုဲတအ် သ္ၚဳဂၠိပ်ကၠုၚ်မာန်၊ ဗွဲတၟေၚ် စပ်ကဵု ရပ်စပ် အမှုဂဗုတ်တအ်ဂှ်တုဲ ညးတာလျိုၚ်တအ် ဂွံနၚ် ဒဒိုဟ်ကလၚ် နူဘာဏအ်တုဲ ပ္ဍဲအရာ ရပ်စပ်တအ် အမှုဂဗုတ်တအ်ဂှ် သာတုဲ ခိုဟ်တိုန်ကၠုၚ်ရောၚ်” သာ်ဝွံ သၞာဲဒဴ တိုန်စိုပ်လဝ် ဘာမွဲတၠ ဟီုလဴကု ဌာန်ပရိုၚ် ဍုၚ်မန်တၟိရ။
ညးတာလျိုၚ် ဒးဖန်ဖက်အုပ်ဓုပ် စဳရေၚ်မံၚ် ကမၠောန်ပွနာနာသာ် ပ္ဍဲအရာလုက်စုက်မံၚ်ကု ညးဍုၚ်ကွာန်ဒေသ နဇိုၚ်နတဲတအ်ဂှ် ညံၚ်ဂွံဖန်ဖက်ကၠောန်ၜိုတ်အာ အတိုၚ် မူဝါဒ၊ စေဝ်ပၞောန်နာနာဗော်ဍုၚ်မန်တၟိ ဍိုက်က်ပေၚ်ၚ်မာန် ကေုာံ ညံၚ်စရာဲဍာ်ဒကေဝ် ဂွံသၠုၚ် သာ်ဝွံ ရန်တုဲ ဗော်ဍုၚ်မန်တၟိ ကော်ဘိက် သၞာဲဒဴကေုာံ ညးတာလျိုၚ်တအ် တိုန်စိုပ် တန်ဗ္တောန်ဝွံရောၚ် သာ်ဝွံ သၞာဲဒဴဂှ် ဟီုလဴကီုရ။
ပ္ဍဲဘာလၟေၚ်ပရေၚ်ကမၠောန် အုပ်ဓုပ်ဏအ်ဂှ် ညးမယိုက်ဂၠေၚ်မံၚ် တာလျိုၚ် ပ္ဍဲပွိုၚ်ဍုၚ်၊ ခရိုၚ်၊ ဗွိုၚ်မ္ၚးဍုၚ်၊ ဗွိုၚ်ပ္ဍဲဍုၚ် တအ်သၟးဟွံက နူကဵု သွာၚ်ဒပ်တအ်လေဝ် ဒးတိုန်စိုပ် ကတ်ဗ္တောန် ပ္ဍဲတန်ဗ္တောန်ဏအ်ရ။ ညးမယိုက်ဂၠေၚ်မံၚ် တာလျိုၚ် ပ္ဍဲသွာၚ်အုပ်ဓုပ်မ္ဂး ဒးဒှ်ကဆံၚ် ကမ္မတီခရိုၚ်၊ ညးယိုက်ဂၠေၚ်မံၚ် တာလျိုၚ် ပ္ဍဲသွာၚ်ဒပ်မ္ဂး ဒုသ္ကိုပ်ဒပ်ပါ် အောန်အိုတ် ဒးဒှ်လဝ်တုဲဟေၚ် ဒးဒုၚ်ရုဲစှ် သွက်ဂွံကဵုတိုန်စိုပ် တန်ဗ္တောန်ဏအ်ရ။
ဘာလၟေၚ်ပရေၚ်ကမၠောန်အုပ်ဓုပ် မပံက်တုဲဒှ်အာလၟုဟ်ဝွံ မဒှ် လၟေၚ် (၃) မဒှ်တုဲ ပံက်ဗ္တောန်ကၠုၚ်လဝ် ပ္ဍဲစၟတ်တ္ၚဲ ဂျောန် (၁၈) ဂှ်တုဲ တုဲဒှ်အာ ပ္ဍဲ စၟတ်တ္ၚဲ ဂျူလာၚ် (၁၄) မဒှ်ကီုရ။
ကၠာနူဘာဏအ် ပ္ဍဲတန်ဗ္တောန် လၟေၚ် (၁) ကေုာံ လၟေၚ် (၂) တုဲကၠုၚ်တေံဂှ် ကမ္မတဳပွိုၚ်ဍုၚ် မကေတ်မံၚ်တာလျိုၚ် ပ္ဍဲဗော်ဍုၚ်မန်တၟိ သၟးဟွံက သီုကဵု အုပ်ဓုပ်ကွာန် မနွံမံၚ် ဒေသအုပ်ဓုပ် ဗော်ဍုၚ်မန်တၟိ ဂမၠိုၚ်တအ်လေဝ် ဒးတိုန်စိုပ် ကတ်လ္ၚတ်လဝ် တန်ဗ္တောန်ဏအ်နွံရ။
No comments:
Post a Comment