အခိၚ်ပေဲါရုဲမာဲ ညးလဵု အန္တရာဲဇၞော်ရော

ဒဵုဗျု

ဂိတုနောဝေမ်ဗာ ၈၊ တ္ၚဲစန်

 “တၠပညာမန်ဂမၠိုၚ် လညာတ်တုပ်မံၚ်ကဵုအစာလိက်ဏံဖအိုတ်ရတှေ် လ္ပစၟဳအခေါၚ်ဗၠးၜးရ။” (Win Bo)

“ယဝ်ခါရလညာတ်ဏံဒးမံၚ်တှေ် မန်ပိုဲ ဗတိုက်မံၚ်ကဵုပၞာန်ဗၟာပွိုၚ်(၇၀)သၞာံပြၚ်ဂှ် အဓိပဲါဍေံဟွံမွဲရ။” (Banyarsoe Saimon)

 

လညာတ်အဲမချူပတိုန်ထ္ၜးလဝ်“တၠအဝဵုပၞာန်ဗၟာ သရိုဟ်စှေ်မှ ဍုၚ်မန်မံက်ဂတဝ်ဟာ” ပ္ဍဲ ဂိတုနောဝေမ်ဗာ ၆၊ တ္ၚဲသ္ၚိသဝ်၊ ၂၀၂၁” နကဵုက္ဍိုပ်သာ်ဝွံဂှ် ညးတအ်ညးၜါတၠ နာဲဝေန်ဗိုဝ်ကဵု ဗညာသဵု သာဲမန် ဟီုခၠေဝ်ပါ်ပဲါသ္ၚဳဂၠိပ်နၚ်လညာတ်ညးတအ် ဗွဲလ တူတေံဂှ်တုဲ ပိုဲၜတ်ကၞာတ် လညာတ်ကီု ပရေၚ်ဆဵုဂဗကီုတုဲ ဆက်သဳကၠဳပါ်ပဲါအာထေက်ရောၚ် ညာတ်ကေတ်တုဲ လိက်ပ ရေၚ်လညာတ်ဏံ မဒးထပ်ကလေၚ်ချူဏာလဝ်ရ။ ပ္ဍဲအရာဝွံ ဗွဲကိုပ်ကၠာ မိက်ဂွံဟီုဏာဂှ် ညးတအ်ဗၠေတ် အဲဒး သာ်ဝွံ ပၠုပ်စိုတ်တုဲ ချူဟွံသေၚ်ရ။ လတူလညာတ်မပါ်ခြာတအ်ဂှ် ပိုဲပတိုန်ထ္ၜးတၚ်နၚ်တုဲ ပါ်ပရအ်လညာတ်တုဲ ညးမဗှ်လိက်တအ် ဒးပါ်ပဲါကေတ်ရ။ ပ္ဍဲသဘၚ်ပေဲါမွဲမွဲလေဝ် ဆေၚ်ဍာ်ၜဴညးခိုဟ်၊ ဆေၚ်လဵုခၞာညးခိုဟ်၊ ဆေၚ်ပုၚ်ညးခိုဟ် သာ်ဝွံ ပတိုန်သာၚ် ဗုက်တုဲ ပစူပတိုန်မလိက်ဆေၚ်အိုတ်ရ။ မၞိဟ်ဗဵုပေဲါ ကြေဝ်ပ္ဍဲပေဲါတအ်ဂှ် ဆေၚ်ဇကုဒးစိုတ်ဂှ် လုပ်ဂဇံရာန်စ သီုလဟိၚ်စိုတ် မာန်ရ။ လညာတ်ဟီုဂှ် ညးမွဲကဵုမွဲ ကာလလဵုဟွံတုပ်ညးသကအ်ပေၚ်ၚ်ရ။ ကာလလဆောဝ်တုပ်ညိည၊ ကာလလ္ဆောဝ် တုပ် ဂၠိုၚ် သာ်ဝွံ နွံအဆံၚ်အဆံၚ်အိုတ်ရ။ ဆဂး ပ္ဍဲအကြာပိုဲ ယေန်သၞာၚ်ပရေၚ်ဍုၚ်ကွာန် မသဳကၠဳလှာဲဂတးလညာတ်ညးသကအ် ကျေဝ်ဝ်ဂေါဝ်ဝ်ဂှ် ဒှ်ကၠုၚ်မဂး နွံကဵုသိက္ခာကဵုဂကူပိုဲရ။ လညာတ်ဗၠေတ်ဒးဂှ် ဟွံမိက်သ္ပအဓိကတုဲ ဂုန်ဖဵုကောန်ဂကူနွံဟွံမွဲဂှ် ဟေၚ် မိက်ဂွံသ္ပအဓိကရောၚ်။

အခိၚ်ကာလဗော်အေန်အေဝ်ဒဳ ဂွံအဝဵုပွိုၚ်မသုန်သၞာံဂှ် ညးတအ်ဂှ် အန္တရာဲဇၞော်နူကဵုဒပ်ပၞာန်ဗၟာဏီ သာ်ဝွံ လညာတ်တၟိတၟိမွဲ မံက်ဂတဝ်ကၠုၚ်အကြာပိုဲတအ်ရ။ ဖိဒ္ဒရာဂှ် ပိုဲကောန်ဍုၚ်အရၚ်တအ် က္ဍိုက်ပ်တုဲ ဒးဗၟံက်ရုပ်ရဴရောၚ်၊ ပတှေ်ဗၟာတအ်ဟွံဂွံရောၚ် လညာတ်ပရေၚ်ဍုၚ်ကွာန်တၟိ မဒုၚ်သဇိုၚ်ကဵုပရေၚ်ဆဵုဂဗ ကိုပ်ကၠာဟွံစိုပ်ပေဲါရုဲမာဲက္ဍၚ် ကတဵုဒှ်ကၠုၚ် ပ္ဍဲအကြာဗွိုၚ်ပရေၚ်ဍုၚ် ကွာန်ဂကူမန်ပိုဲတအ်ဂှ်တုဲ လညာတ်ဏံ လၟုဟ်ကလေၚ်ဟောံပၠိုတ်အာရ။ မူဟိုတ်လညာတ်တံဏံ ဂွံမံက်ဂတဝ်ကၠုၚ်ရော ပိုဲပိုက်တမ်ဂၠာဲရိုဟ်ဂှ် တၚ်နၚ်နာနာသာ် မံက်ဂတဝ်တိတ်ကၠုၚ်မာန်ရ။ အခိၚ်ကာလအေန်အေဝ်ဒဳ ဒှ်မံၚ်ဗော်ဒစဵုဒစးတေံ လ ညာတ်တအ်ဏအ် ဟွံမံက်ကၠုၚ်တုဲ အခိၚ်ညးတအ် ဂွံအဝဵုရောၚ်မံက်ကၠုၚ်ဂှ်လေဝ် ပိုဲဒးကလေၚ်ဗစာရဏာရောၚ်။ ဂလာန် က္ဍိုပ်သကိုပ်ဗော်အေန်အေဝ်ဒဳတအ် မဟီုပတိတ်လဝ် ပ္ဍဲအကြာမသုန်သၞာံဝွံ ပိုဲကလေၚ်သ္ၚဳဂၠိပ်ဖအိုတ်ရောၚ် ယဝ်ဒှ်မဂးလေဝ် ပိုဲကဵုသွဟ်ကၠးကၠးမာန်ဂၠိုၚ်ရ။ တုဲပၠန် ပ္ဍဲခေတ်အေန်အေဝ်ဒဳ တိုန်ဂွံအဝဵုဂှ် မၞိဟ်၊ ပူဂဵု ပိုဲဂကူမန်တအ် က္ဍုဟ်မၠေံဂၠိုၚ်အိုတ် ဟီုဂှ် ညးဂှ်ရော ယဝ်ရသၟာန်မဂး ဗွဲမဂၠိုၚ် ဟီုသွဟ် (မိကောန်ဆာန် ) သာ်ဝွံမာန်ရောၚ်။ ပ္ဍဲမွဲအယုက်ပိုဲဏံ ကောန်ဂကူမန်တအ် ဗီုက္ဍုဟ်မၠေံမိ ကောန်ဆာန်ဂှ် ဟွံကေၚ်ဆဵုမွဲလှေ်ရ။ မိကောန်ဆာန်ဂှ်ညးဂှ်ရော ဒၞာဲဏံ ဟွံမိက်ဆက်သၟာန်အာရ။ မူဟိုတ်ဂွံက္ဍုဟ်မၠေံညးဂၠိုၚ်ရော သာ်ဝွံလေဝ် ဟွံမိက်ဆက်သဳကၠဳအာရ။ 

တၚ်နၚ်ဗွဲသၟဝ်တေံ ပိုဲသဳကၠဳပတို်န်ထ္ၜးမဂး ခိုဟ်ရောၚ်။

(၁) ဗော်အေန်အေဝ်ဒဳ အလဵုဇကုအံၚ်ဆာန်စုကျဳ အာစိုပ်ဂတမုက်ရုၚ်ဂလုတ်ဂၠးတိတုဲ စဵုဒၞာကုဒပ်ပၞာန်ဗၟာရ။ ယဝ်ရညးဟွံစဵုဒၞာ အာဟီုခၠေဝ်သှ်မဂး အခိၚ်ဂှ် သကိုပ်ပၞာန်မေန်အံၚ်လှာၚ်တအ် ဒတုံဇြဟ်ဗၚ်မာန်ရောၚ် ပိုဲတအ် ညာတ်ကေတ်လဝ်သာ် ဂှ်အိုတ်ရ။ အခိၚ်ပိုဲဒးဗတိုက်သရိုဟ်တၠအဝဵုပၞာန် ညံၚ်ယာက္ဍိုပ်ဟွံဂွံမာန်ဂှ် က္ဍိုပ်သကိုပ်အေန်အေဝ်ဒဳတအ် ဟွံဗတိုက်ရောၚ်ဂှ် ဟီုမာန်ရ။ ကောန်ပၞာန်ဗၟာညး ဟွံကလိလောန်လဝ်ဒုဟ် မပ္တံပလီုကောန်သမ္ဘာ ကေုာံ ပြိုက်ဂစိုတ်ရောၚ်ဂှ်လေဝ် ဟီုစဵုဒၞာပၠန်ရ။ ဂလာန်အံၚ်ဆာန်စုကျဳမဟီုခၠေဝ်ပလန်လဝ် ပ္ဍဲအာၚ်သဳဂျေတအ်ဂှ် ယဝ်ရပိုဲကလေၚ်လ္ၚတ်ရံၚ်မဂး ဗၞတ်ဂလိုၚ်လဵုညး ဆာန်မံၚ်ဒပ်ပၞာန်ဗၟာ မဒှ်ဒပ်ပၞာန်အပါညးမထ္ၜုတ်လဝ်ဂှ်မဂး တီကၠိုဟ်ကေတ်မာန်ရ။ ဟိုတ်နူညးဟီုစဵုဒၞာဒပ်ပၞာန်ဗၟာ မကြမ် ကြရုန်မဵုဂှ်တုဲ အလုံညးလိုက်မွဲ မေတ္တာပ္ဍုၚ်ကၠုၚ်လတူညးတုဲ ကလေၚ်သီကေတ်ထောံ တဆိပ်ကြာနာနာ မဇိုန်ဏှၚ် လဝ်ကုညးအိုတ်ဏီရ။ ဒဒှ်ဗီုဏံ ပ္ဍဲလိုက်ဂၠးတိပိုဲဏံ ကြပ်ဟွံဆဵုမံၚ်ရ။ ဒုၚ်က္ဍုဟ်ကဵုဗော်သွးဂၠးတိတုဲ ညးစဵုဒၞာကုဒပ်ပၞာန်ဂှ် ဗီုဏံ ဍေံကတဵုဒှ်ကၠုၚ်မာန်ရောၚ် ပိုဲတအ်ဟွံထေၚ်စှေ်စိုတ်အိုတ်ရ။ လၟုဟ်ပိုဲဒးဗတိုက်သရိုဟ်ဒပ်ပၞာန်ဂှ်ပၠန်မဂး ပိုဲကဵုညး ညံၚ် ကဵုဒစဵုဒစးမံၚ်ဇၞော်ဇၞော်ရ။ စိုပ်မွဲတ္ၚဲ ညးကလေၚ်ကလိဂွံအဝဵုပၠန်မဂး ညးဟွံဟီုစဵုဒၞာကုဒပ်ပၞာန်ဗၟာညးရပုဟ်ဂှ် ဂံၚ်ဟီုဟာ။

ဗီုပိုဲက္ဍုဟ်မၠေံဒပ်ပၞာန်ဗၟာအိုတ်အစောန်ဂှ် ညးဟွံက္ဍုဟ်ညိညတုဲ ဆာန်မံၚ်အိုတ်အစောန်ရောၚ်ဂှ် ၜတ်ကၞာတ်မာန်ရ။ အလဵုဇ ကုညး အာခၠေဝ်သှ်မာန်ရောၚ် အခိၚ်ဂှ်ဂှ် မၞိဟ်ပတှေ်ကေတ်အောန်ကွေံကွေံရ။ အခိၚ်ညးအာခၠေဝ်သှ်ဂဗုတ်ဂှ် က္ဍိုပ်သ ကိုပ် ဂကူဗၟာတအ် ညာတ်ဒုဟ်အောန်ကွေံကွေံရ။ ကောန်ဍုၚ်အရၚ်တအ်လေဝ် ကဟဳမံၚ်ဗွဲမဂၠိုၚ်ရ။ ဂလာတအ်ဂှ် ကောန်ဍုၚ် အရၚ်ဟွံသေၚ် သာ်ဝွံစွံလဝ်စိုတ်ဒှ်မာန်ရောၚ်။ ဒပ်ပၞာန်ဗၟာ ပရေံမံၚ်ဂလိုၚ်ဂှ်လေဝ် အခိၚ်ဂှ် မူဟိုတ်ပိုဲကောန်ဍုၚ်အရၚ်တအ် ဟွံ ဟီုဗျိဂရိုဟ် ညံၚ်ရဴမသီအဝဵုဂှ်ရော။ ဟွံဒစဵုဒစးကဵုပြဝဒပ်ပၞာန်ပရေံ မဒှ်အဆံၚ်ပရေံလောန် ပ္ဍဲဂၠးတိဂှ် ဒှ်ပြဝဗတိုက် သရိုဟ်ဖျေံဒပ်ပၞာန်ဗၟာဂးမာန်ဟာ။ မေန်ကိုဝ်နာၚ်တအ်လေဝ် မူပဟွံဒစဵုဒစးကီုရော။ အခိၚ်ဂှ် လုပ်စမံၚ်လပါ်အေန်အေဝ်ဒဳကဵု ပၞာန်ဗၟာဖအိုတ်ရ။ လညာတ်ပိုဲတအ်ကဵု လညာတ်ညးဂၠးတိတအ်ဂှ် အခိၚ်ဂှ်မဂး ဒစဵုဒစးမံၚ်ပေၚ်ၚ်ရ။ ကာလအေန်အေဝ်ဒဳ ဒး ဒုၚ်သီအဝဵုမှ နာဲမေန်ကိုဝ်နာၚ်တအ် မံက်ကၠုၚ် ပ္ဍဲမဳဒဳယျာဗၟာတအ်အိုတ်ရ။ အခိၚ်အေန်အေဝ်ဒဳဂွံအဝဵုဂှ် မဳဒဳယျာဗၟာတအ် ဒတဴ လိုၚ်ကရောံအေန်အေဝ်ဒဳဖအိုတ်တုဲ ဟွံသ္ပကေၚ်ကာကဵုကောန်ဍုၚ်အရၚ်တအ်ရောၚ်ဂှ်လေဝ် နာဲလွဳဝၚ် မဒှ်ပူဂဵုမကေၚ် ကၠောန်လဝ်ပ္ဍဲဌာနပရိုၚ်အေရာဝတဳဂှ် ဟီုပါ်ပဲါလဝ်နွံကီုရ။ ဂကူဝတအ် ဗၠးၜးတိတ်မံၚ်ညိညဂှ် မဳဒဳယျာဗၟာတအ် ဟွံပေၚ်စိုတ်လး လးရောၚ်ဂှ်လေဝ် လ္ၚတ်ကေတ်မာန်ကီုရ။ ဌာနပရိုၚ်သြၚ်လောန် ပ္ဍဲမတ်မလီုဂှ် ဟိုတ်နူအေန်အေဝ်ဒဳ ဒးဒုၚ်သီအဝဵုဂှ်တုဲ ညး တအ်စိုတ်လီုဗွဲမလောန်ဏီရောၚ်။ 

 ညးဂၠးတိတအ်လေဝ် ရံၚ်ကဵုမုက်အေန်အေဝ်ဒဳတုဲ ဟွံဂံၚ်ဟီုပါ်ပဲါ စပ်ကဵုဂစိုတ်ကမၠက်တၞောဝ်မၞိဟ်တအ်ဂှ်ရ။ အခိၚ်တေံဂှ် အလဵုဇကုကံၚ်သဳဂီုကၠီုယူအေန် အာစိုပ်ဂၠိုက်ဂၠာဲစၟဳတ်ဏီရဟွံသေၚ်ဟာ။ ရံၚ်ကဵုဒဒှ်သာ်ဝွံတအ်ဂှ်မဂး ဗော်အေန်အေဝ်ဒဳ ဗတိုက်ပလီုမံၚ်တၠအဝဵုပၞာန်ဗၟာ၊ ဒပ်ပၞာန်ဗၟာဟွံသေၚ်၊ သီုစဵုဒၞာမံၚ်ကုဒပ်ပၞာန်ဗၟာပေၚ်ၚ်ရောၚ် ဟီုဟွံမာန်ဟာ။ ဗေဲရေတ်ချိတ် သေန် မဒှ်ကလုတ်အမေရိကာန်တြေံ ဟိုတ်နူဟီုဗၟံက်ဒးပရော ဂလာရောဟေန်ဂျာညိဂှ်ဗက်ဂှ် ဒးဒုၚ်ကဟုက်ကဵုအံၚ်ဆာန် စုကျဳရောၚ်ဟွံသေၚ်ဟာ။ ခေတ်ကာလအေန်အေဝ်ဒဳ ဖံက်ပကဝ်အခေါၚ်မၞိဟ်ဂှ် အလုံဂၠးတိမွဲ သ္ပလဝ်မဇ္ဇျဟ်၊ ပိုဲကောန်ဍုၚ် အရၚ်တအ် အာစိုပ်ဒဒိုက်ဇၞော်ကဵုဇြဟတ်ရ။ ဝန်ဇၞော်ဍုၚ်သအာၚ်အမေရိကာန် ပမ်ပဳယောလေဝ် ရံၚ်ကဵုမုက်အံၚ်ဆာန်စု ကျဳတအ်ဂှ်တုဲ ဟွံစၟတ်သမ္တီ နဒဒှ်ဂျေန်နောသာ်၊ ဟွံသ္ပသမ္တီ နဒဒှ်ဂစိုတ်ကမၠက်တၞောဝ်မၞိဟ်ကီုရ။ ယဝ်ရအံၚ်ဆာန်စု ကျဳ ထေဲအာမဂး ဖေက်ကၠဟ်ထောံအမေရိကာန်တုဲ အာပံၚ်ဗဒကဵုကြုက်ဟာဂှ် ကေတ်ဟွံဒးရ။ ကိုပ်ကၠာအေန်အေဝ်ဒဳ ဟွံဂွံအဝဵုဂှ် ဓဝ်ပတှေ်ကောန်ဂကူတအ် နွံမံၚ်ဗွဲမဂၠိုၚ်ကီုလေဝ် ကာလညးတအ်ဂွံအဝဵုဂှ် ကောန်ဂကူတအ် ဓဝ်ပတှေ်လတူညးတအ် ကြပ် အိုတ်အာရောၚ်ဂှ် ညာတ်ကေတ်ကၠးကၠးမာန်ရ။ အခိၚ်ကာလအေန်အေဝ်ဒဳဂွံအဝဵုဂှ် ကောန်ပၞာန်ဗၟာ မစဴကၠုၚ်နူပေဲါဗတိုက် ကချေၚ်တအ် သမ္မတနာဲထေန်ကျဝ် ဟီုသၟိတ်တဴ “လုပ်ပေဲါဗတိုက် ဂံၚ်ၚ်သကာသကာ” ကော်ဗတ်ဗၟာ (ရွတ်ရွတ်ခွျန်ခွျန်) ဂှ်တုဲ ကောန်ဂကူတအ် ဒှ်ဒေါသအိုတ်ရ။ ဒးလၞိန်ဗပိန်ကုကောန်ဍုၚ်အရၚ်တအ်ဂှ် ဒှ်ကမၠောန်ဂကူဗၟာညးတအ်ဖအိုတ်ရောၚ် ဟီုဟွံမာန်ဟာ။ 

(၂)ကိစ္စကေၚ်ကာရခေၚ်ဂှ် က္ဍိုပ်သကိုပ်အေအေတအ် တဲကၠာဂှ် ဇကုအံၚ်ဆာန်စုကျဳ စၟတ်သမ္တီညးတအ် နဒဒှ်ဂကောံ ပလီုပလာ်မာန်ရောၚ်ဂှ် ဟွံညာတ်ကေတ်အိုတ်ဂှ်တုဲ မိက်ဂွံတီကေတ်လညာတ်ညးဗွဲတိုက်ရိုက်ရ။ ဆဂး ဗွဲကြဴဏံ တီကၠး ကေတ်ဂှ်တုဲ အေန်အေဝ်ဒဳလေဝ်ကီု ဒပ်ပၞာန်ဗၟာလေဝ်ကီုဂှ် တုပ်သၟဟ်ကဵုလေံဒုက် မနွံၜါအရံၚ်သာ်ဗ္ဂေတ် ကဵုသာ်တ္ၚေက်ရ။ နကဵုလေံဒုက် သာ်တ္ၚေက်ဒုက်လေဝ်ဂိ၊ နကဵုလေံဒုက်သာ်ဗ္ကေတ် ၜုၚ်တက်လေဝ်ဂိ သာ်ဝွံ က္ဍိုပ်သကိုပ်အေအေတအ် ဟီုပ တုပ်ကၠုၚ်အိုတ်ရ။ က္ဍိုပ်သကိုပ်ရခေၚ် နာဲအေမံၚ်လေဝ် သီုဒုဟ်ဟွံမွဲမွဲသာ် အေန်အေဝ်ဒဳတအ် ဖျေံလဝ်ထံၚ်မွဲအယုက်ဏီရ။ ထ္ၜးဟိုတ်သွက်ဂွံပါ်တိတ်တုဲ ဒက်ပတန်ဍုၚ်ရခေၚ်တၞဟ်ခြာရ။ ဒှ်သာ်ဂှ်မဂး သွက်ရခေၚ်တအ်ဂှ် အလဵုအသဳကဵုပၞာန် ညးလဵု အန္တရာဲဇၞော်ရော၊ တုပ်တုပ်ဟီုဟွံမာန်ဟာ။ ယဝ်ရဟီုဟွံမာန်မဂး အေန်အေဝ်ဒဳဂှ် ဇၞော်ဂၠိုၚ်ညိဒှ်မာန်ရောၚ်။

 (၃) တၠုၚ်လအာမတုပ်သာ်ဂှ်ကီု ကာလဒပ်ပၞာန်ဗၟာထပက်ပၞာန် ပ္ဍဲကချေၚ်ဂှ် ဗော်အေန်အေဝ်ဒဳ ဟွံဟီုဗျိဂရိုဟ်ကုဒပ်ပၞာန်ဂှ်တုဲ နကဵုအလဵုဗော်ကချေၚ်တအ် ဒဵုကဵုဒးနုက်တိတ်ထောံနယူအေန်အာဖ်သဳဏီရ။ ဟိုတ်နူအန္တရာဲထပက်ပၞာန်ဇၞော်လောန်ဂှ်တုဲ ဒပ်ဥမၚ်ညးတအ် မခိုၚ်ဗိုန်ဇၟအ်(ဂျဳဂန်)ဂှ်လေဝ် သရိုဟ်အာရ။ ဂွံစဵုဒၞာနူဘဲထပက်ပၞာန်မာန်ဂှ်တုဲ ညးတအ်ဒးအာပံၚ်ကဵုဂ ကောံမဟာမိတ်ပၞာန် သၟဝ်ကျာဏီရ။ အခိၚ်ဂှ်ဂှ် အလဵုအသဳအံၚ်ဆာန်စုကျဳတအ်ကဵုဒပ်ပၞာန်ဗၟာတအ်ဂှ် တုပ်ပ်ရရောၚ်ဂးတုဲ ပ္ဍဲဝေါဟာရတၟိမွဲ ဗတ်အေၚ်္ဂလိက် မုက်လိက်တုပ်ပ် မတွံဂး the same page ဂှ် ဂွံဗှ်ကေတ်ရ။ ယဝ်ရဒးဟီုအရေဝ်အ ရာပ်ဂွံကၠိုဟ်လောဲသွာမဂး အလဵုအသဳအေန်အေဝ်ဒဳကဵုဒပ်ပၞာန်ဗၟာတအ်ဂှ် ဗၟာတုပ်ပ်ရ။ လညာတ်တုပ်ပ်ရ။ တုဲပၠန် ပဝ်လဇြဳဂ ကူဗၟာ စပ်ကဵုကောန်ဍုၚ်အရၚ်တအ်ဂှ် တုပ်ပ်ဖအိုတ်ရောၚ် သာ်ဝွံလေဝ် ဟီုအိုတ်ပၠန်ရ။ ဒပ်ပၞာန်ဗၟာ ဗီုဒးစိုတ်ဍဵုဍိုက် ကောန် ဍုၚ်အရၚ်တအ်မာန် ပ္ဍဲအခိၚ်ဂှ်ဂှ်တုဲ နကဵုဗော်အံၚ်ဆာန်စုကျဳတအ် ဗက်စဵုဒၞာပ္ဍဲအဆံၚ်ဂၠးတိမာန်ရ။ အလဵုအသဳဍုၚ်ဂၠးတိ တအ်လေဝ် ဟွံမိက်သ္ပအရီု ကဵုကံ ကုသဵုကောန်ဍုၚ်အရၚ်တအ်ဂှ်တုဲ ဆၜိုတ်ကလၚ်ဂလာန်အံၚ်ဆာန်စုကျဳတအ်သၟးရ။ ဟိုတ် ဂှ်တုဲ အလဵုအသဳအေန်အေဝ်ဒဳဂှ် အန္တရာဲသွက်ကောန်ဂကူတအ်ဂှ် ဇၞော်လောန်ရောၚ်ဂးရ။

(၄) စပ်ကဵုလိက်ကသုက်အေန်သဳအေဂှ် ကရေၚ်၊ ချေၚ်၊ သေံဇၞော်တအ် က္ဍိုက်ပ်တုဲ လုပ်ချုက်လိက်၊ ဗော်ဍုၚ်မန်တၟိ၊ ကချေၚ်တအ် သှေ်အာဂှ် ဟိုတ်နူမိက်ဂွံအာတ်အခေါၚ်အရာကောန်ဍုၚ်အရၚ်တအ်ဂၠိုၚ်ၚ်ရ။ အခိၚ်ကၠောန်သ္ပသဘၚ်ဂှ် ဟိုတ် နူအေန်အေဝ်ဒဳ တိုန်စိုပ်ထံက်ဂလာန်ကီုဂှ်တုဲ ဂၠးတိတအ် လုပ်စလပါ်အေန်အေဝ်ဒဳတုဲ ဗော်ဍုၚ်မန်တၟိ သီုကချေၚ် ဒးဒုၚ် ကရေပ်ဓရတ်ဇၞော်ကဵုဇြဟတ်ရ။ ဗော်အေန်အေဝ်ဒဳလေဝ် ဟဳဗက်ကဵုလိက်ကသုက်ဂှ်တုဲ လုပ်စလပါ်ပၞာန်ဗၟာပေၚ်ၚ်ရ။ ဗွဲကြဴဏံ ဟိုတ်နူဒးဒုၚ်ကရေပ်ဂရတ်ဂၠိုၚ်ဂှ်တုဲ ဗော်ဍုၚ်မန်တၟိလေဝ် ဒးချုက်လိက်ကသုက်ဂှ်ကီုရ။ ဂကောံယူအေန်အာဖ်သဳလေဝ် လ မျီုအိုတ်အာ အခိၚ်ဂှ်ဂှ်ကီုရ။ 

(၅) အတိုၚ်သၞောဝ်၂၀၀၈ဂှ်မဂး ကောန်ဍုၚ်အရၚ်မဇၞးမာဲဂၠိုၚ်တအ် အခေါၚ်ဒှ်သကိုပ်ဝန်ဇၞော်တွဵုရးနွံကီုလေဝ် ဆဂး ဗော်ရ ခေၚ်တအ် ဟွံဂွံတိုန်ဒှ်သကိုပ်ဝန်ဇၞော် ပ္ဍဲတွဵုရးညးတအ်ဂှ်တုဲ ဒၞာဲဂှ် အေန်အေဝ်ဒဳရောၚ် တိုန်္ၚာပ်ကေတ်ထောံရ။ မၞိဟ်ဇၞး ကေတ်သီုဖအိုတ်ဂးတုဲ မာဲညးတအ်အလုံဍုၚ်ဂှ် ဟိုတ်နူဂၠိုၚ်အိုတ်ဂှ်တုဲ ညးတအ်ဟွံမိက်ပရအ်အဝဵုရ။ ယဝ်ရအာမံၚ်နဲကဲဏံရ မဂး ပိုဲကောန်ဍုၚ်အရၚ်တအ် ကာလလဵုလေဝ် ဒှ်သကိုပ်ဝန်ဇၞော်တွဵုရးဟွံမာန်ရ။ ဟိုတ်ဂှ်တုဲ ဗော်ကောန်ဍုၚ်အရၚ်တအ် မိက်ဂွံပံၚ်တဲကဵုကျဖောတ်ကီု၊ ဒပ်ပၞာန်ကီုတုဲ မိက်ဂွံကေတ်ဇၞးလတူအေန်အေဝ်ဒဳရ။ ၜိုန်ဂှ်လေဝ် အေန်အေဝ်ဒဳ ကၠတ်လဝ်မာဲ ပ္ဍဲတွဵုရးတအ်ဂှ်တုဲ ကေတ်ဇၞးဏာမမာဲကုကောန်ဍုၚ်အရၚ်တအ်ရ။ ပ္ဍဲရခေၚ်ဂှ် ဖေက်ကျတုဲ သီုကၟာတ်ဒၞာထောံ ဟွံကၠောန်ဗ ဒှ်ကဵုပေဲါရုဲမာဲဏီရ။ ကိုပ်ကၠာဟွံစိုပ်ပေဲါရုဲမာဲဂှ် မူဟိုတ်ကောန်ဍုၚ်အရၚ်တအ် မိက်ဂွံပံၚ်ကဵုကျဖောတအ် ကေုာံ ပၞာန်ရော၊ ဂလာန်ဝွံ ဟိုတ်နူအေန်အေဝ်ဒဳ ဟွံလဂူတပ်တး ကုကောန်ဍုၚ်အရၚ်တအ်ရောၚ် ဟီုမာန်ရ။

(၆) ဒပ်ပၞာန်သီအဝဵုအလန်ဏံဂှ် မူဟိုတ်ရော၊ ဟိုတ်နူမိက်ဂွံဍဵုဍိုက်ကောန်ဍုၚ်အရၚ်တအ်ဟာ ဂလာန်သၟာန်သာ်ဝွံ မိက်ဂွံ သၟာန်ရ။ ယဝ်ရမိက်ဂွံဍဵုဍိုက်ကောန်ဍုၚ်အရၚ်တအ်မဂး ညးစၞးဗော်မန် ကေုာံ ရခေၚ်တအ်ကီု၊ ကရေၚ်(မာန်ညိၚ်မံၚ်) ကီု တအ်ဂှ် ပါလုပ်ကၠောန်ပ္ဍဲကံၚ်သဳပၞာန်မာန်ရောၚ်ဟွံထေၚ်ရ။ အခိၚ်ဂှ်ဂှ် ဗော်မန်ပိုဲ အဃောလညာတ်ကၠေဟ်မံၚ်ကဵုအေန်အေဝ် ဒဳတၟိတၟိဂှ်တုဲ ညးတအ် အဃောထေဲမံၚ်ကဵုအေန်အေဝ်ဒဳ ဟိုတ်နူပလီုကၠေံပေဲါကောံဓရီုအကြာၜါလပါ် နပွမထ္ၜးဟိုတ် ဟွံလ ဂူတပ်တးရ။ 

(၇) ပၞာန်ဗၟာလေဝ် ဂုန်ဖဵုဂကူပိုဲဟွံမွဲ၊ ဗော်အေန်အေဝ်ဒဳလေဝ် ဂုန်ဖဵုဂကူပိုဲဟွံမွဲ တုပ်ပ်မဂး လညာတ်မဂး ဒးဗတိုက်သရိုဟ်တၠ အဝဵုပၞာန်ဗၟာရောၚ်၊ ဟွံဒးဗတိုက်တၠအဝဵုအေန်အေဝ်ဒဳရောၚ်ဂှ် ဟွံဒးရ။ ပိုဲဗတိုက်မံၚ်ကဵုဒပ်ပၞာန်ဗၟာ ပွိုၚ်(၇၀)သၞာံဂှ် ဂုန်ဖဵု ဟွံမွဲရောၚ် သာ်ဝွံ ပိုဲတအ် ဟွံဒုၚ်ဂိုၚ်ကေတ်ရ။ ဆၜိုတ်ဂှ် ဟွံရုမ်ဂပ်ဏီရောၚ် မိက်ဂွံဟီုရ။ နကဵုသွာၚ်ပၞာန်ဂှ် ဒပ်ပၞာန်ဗၟာ ကၟာတ် လဒဵုလဝ်အခေါၚ်ပု်ိဲ၊ နကဵုသွာၚ်ပရေၚ်ဍုၚ်ကွာန်ဂှ် ဗော်အေန်အေဝ်ဒဳ ကၟာတ်လဒဵုလဝ်ပိုဲဂှ်တုဲ တုဲတုဲကၠုၚ်တေံ နကဵုဂၠံၚ် အဓိက ၜါဏံ ဗၟာတအ် ကၟာတ်လဝ်ပိုဲရောၚ်ဂှ်တုဲ ပၞော်တိတ်ပိုဲတအ် ဟွံမွဲရ။ အန္တရာဲပၞာန်ဂှ် မသုန်စှော်၊ အန္တရာဲအေန်အေဝ်ဒဳ ပရေၚ်ဍုၚ် ကွာန်ဂှ် မသုန်စှော် ယဝ်ဒှ်မဂး အေန်အေဝ်ဒဳ အောန်စှေ်အာမွဲမဂး အန္တရာဲဂကူပိုဲ ယအ်စှေ်အာမ သုန်စှေ်ကၠိုပ်ကၠံရောၚ် မိက် ဂွံဟီုရ။ ပ္ၚံက်ပေဲါဗတိုက်ပရေၚ်ဍုၚ်ကွာန်ဂှ် ဒးဗတိုက်ကဵုအေန်အေဝ်ဒဳ ဝါတ်လောန်ဂှ်တုဲ သီုဒးကူချပ်ဖျေံဗီုပြၚ် ဂွံပံၚ်ကဵု ဒပ်ပၞာန်တအ်ဏီရောၚ် ဟွံသေၚ်ဟာ။ ပရောဒဒှ်ဍာံဏံ မိက်ဂွံတီကၠးမဂး အာသၟာန်ရံၚ်ကာပၞုက် သၟာပရေၚ်ဍုၚ်ကွာန်မန် ပ္ဍဲဍုၚ် မန်တေံညိ။ ညးတအ် သှ်ကဵုဗွဲတြးမာန်ရောၚ်။ ယဝ်ရပၞာန်ဟွံသီအဝဵုမဂး အေန်အေဝ်ဒဳ ဆိၚ်လဝ်ဝေၚ်အမှုကဵု ဒံက်တာအံၚ် နာၚ်ဥူတုဲ ညးတေံ ဒးထံၚ်မာန်ဏီရောၚ်ဂှ် အခိၚ်တေံတေံ ပိုဲတအ် ဒုၚ်စသိုၚ်လဝ်သာ်ဂှ်ရ။

                        အ အာ